ВАКЦИНАТА НЕ ГИ ЗАШТИТИ Седум пензионери починале од колумбискиот сој во Белгија

Седуммина жители на пензионерски дом во Белгија починаа откако се заразиле со колумбиска варијанта на коронавирусот, и покрај тоа што биле целосно вакцинирани, рекоа денеска виролозите кои го анализирале вирусот.

Оваа варијанта на коронавирусот, B. 1.621, за прв пат се појавила во Колумбија и е потврдена последните недели во Соединетите држави, додека сè уште е ретка во Европа.

– Седум луѓе кои починале во пензионерскиот дом во белгискиот град Завентем, недалеку од Брисел, биле во осумдесеттите или деведесеттите години, а некои веќе биле во лоша здравствена состојба – рече Марк Ван Ранст, виролог на Универзитетот во Левен, кој ја анализирал варијантата на вирусот од тој дом.

Тој додава дека е загрижувачки што починале иако биле целосно вакцинирани.

Научниците сè уште не знаат дали колумбиската варијанта се пренесува полесно од другите, рече тој.

Во Белгија, таа варијанта учествува со помалку од 1 процент од познатите случаи на ковид-19, рече тој, во споредба со 2 проценти во САД и уште повеќе во Флорида.

Во Завентем, 21 жител на пензионерски дом и неколку вработени се заразиле. Вработените во домот имале само благи симптоми.

Ван Ранст вели дека во Белгија, доминантната варијанта на делта вирусот, која првпат се појави во Индија и е одговорна за 95 проценти од случаите на инфекција, е проследена со алфа или британската варијанта, којашто претходно доминираше.