В САБОТА СКОПЈЕ ОСТАНУВА БЕЗ ВОДА Арсовска смирува, ветува брза санација на дефектот
Овој дефект, кој се санира еднаш во 50-60 години, е само еден од четирите кои ќе бидат отстранети во текот на викендот. Нема да трае подолго од една редовна санација и нема да има потреба од дотур на вода“.
Градоначалничката на Скопје, Данела Арсовска, уверува дека санацијата на главниот цевковод, закажана за сабота, нема да предизвика големи прекини во водоснабдувањето и ќе биде завршена во рок од 24 часа.
На прес-конференција пред акцијата за засадување дрвца кај новиот Мега Парк во општина Карпош, Арсовска изјави: „Станува збор за зафат кој има сложен оперативен план и вклучува затворање на една од главните доводни цевки на магистралниот цевковод. Овој дефект, кој се санира еднаш во 50-60 години, е само еден од четирите кои ќе бидат отстранети во текот на викендот. Нема да трае подолго од една редовна санација и нема да има потреба од дотур на вода“.
Таа ги повика сите да не шират паника, потенцирајќи дека службите на Град Скопје и Водовод, имаат долгогодишна експертиза во справување со вакви ситуации.
Од Јавното претпријатие Водовод и канализација соопштија дека санацијата се врши поради излевање на вода на улицата Никола Парапунов во Карпош 4. Главниот цевковод ќе биде затворен в сабота, на 21 декември, во кругот на касарната во Ѓорче Петров, за да се санираат неколку сериозни дефекти.
Иако засега не е прецизирано кои улици или населби ќе останат без вода, службите уверуваат дека работата ќе биде завршена во најкус можен рок.