УВОЗОТ НА СТРАНСКИ РАБОТНИЦИ ПРОБЛЕМ И ЗА ТУРСКИТЕ БИЗНИСИ ВО ЗЕМЈАВА Мицкоски вели дека тоа е приоритет и на владата
Премиерот смета дека барањата на турските компании во земјава се логични и дека владата веќе работи на нив.
Стопанската комора на Македонија-Турција (МАТО) има логични барања, кои не се надвор од очекувањата на владата, изјави премиерот Христијан Мицкоски, по одржувањето на бизнис
форумот „Дијалог помеѓу бизнис секторот и Владата“.
– Логични се барањата, за дел од нив веќе се работи, веќе се во процес. Генерално, дозволи за работа за работници од надвор, дозволи за градење, што се нашите приоритети. Мислам дека тоа се логични барања, не е нешто коешто е надвор од она кое што ние како Влада го правиме, Вложуваме максимални напори сето тоа да биде реализирано и мислам дека дел од тие работи веќе се реализираат. За дел до крајов на годината, така што не беше нешто надвор од очекувањата – рече Мицкоски.
Дефицитот на кадар во Македонија најмногу се забележува во градежништвото, угостителството и во производството.
– Честопати работодавачите имаат специфични барања кои ги нема расположливиот кадар кој е на евиденција на Агенцијата за вработување. Бараат разни сертификати и тие се главна причина за да се одлучат да го поплнат работното место со странски државјанин. Одлуката е на самиот работодавач – изјавија неодамна од Агенцијата за вработување.
Досега се издадени 5.000 позитивни мислења за вработување странски државјани, а годишната квота е 20.000.