УСТАВНИТЕ ИЗМЕНИ СЕ ВАШ ИЗБОР Сите партии се одговорни за иднината на земјата, порача Урсула фон дер Лајен во Скопје

Сите партии треба да ги поддржат уставните измени, оти сите имаат одговорност за иднината на Северна Македонија, рече претседателката на ЕК, Урсула Фон дер Лајен при посетата на Скопје. Освен за политика, таа предложи и План за економски раст.

– Изборот е Ваш! Северна Македонија е суверена земја и прави сопствени избори – порача претседателката на Европската комисија (ЕК), Урсула Фон дер Лајен, како одговор на прашањето што ќе се случи ако до декември годинава земјата не ги усвои уставните измени, потребни за интеграцијата во Европската Унија.

Фон дер Лајен вели дека сите партии во земјата треба да поддржат уставните измени и да го искористат отворениот прозорец, но засега за тоа нема потребно мнозинство да се изгласа во Собранието.

– Се работи за вашата иднина, за вашиот избор и сите партии имаат одговорност за иднината на Северна Македонија. Ние сакаме Северна Македонија да биде членка на ЕУ и се надевам дека движењето напред ќе биде добро и поддржано од широко мнозинство – рече Фон дер Лајен, додавајќи дека процесот на пристапување се заснова на услуги, па „колку побрзо одат реформите, толку побрзо ќе влезете во ЕУ“.

Со посетата на Скопје претседателката на ЕК ја започна турнејата низ Западен Балкан. Во рамки на турнејата планирано е таа на регионалните лидери подетално да им го претстави Планот на ЕУ за раст на Западен Балкан.