УСТАВЕН НЕ ГО УСВОИ ПРЕДЛОГОТ НА АПАСИЕВ И КРМОВ Пратениците ќе продолжат да примаат надоместоци за патарина и за сопствен автомобил
Според Димитар Апасиев и Борис Крмов, подносители на иницијативата, привилегијата да се користат надоместоци за трошоци за патарини и за користење автомобил во лична сопственост за службени цели се косат со одреди од Законот за Собрание и Законот за пратеници, односно за овие трошоци пратениците веќе земаат плата.
Уставниот суд на денешната седница не донесе одлука по иницијативата на пратениците од Левица, Димитар Апасиев и Борислав Крмов, кои ги оспоруваат точките 3 и 4 од Одлуката за висината на надоместокот на пратениците за користење на автомобил во лична сопственост за службени цели и надоместок на трошоци за патарина. Судиите не донесоа одлука, бидејќи го немаше потребното мнозинство на гласови.
– Судот не донесе одлука од причини што предлогот не доби потребно мнозинство гласови. Во иницијативата беа оспорени точките 3 и 4 од Одлуката за висината на надоместокот на пратениците за користење на автомобил во лична сопственост за службени цели и надоместок на трошоци за патарина (“Службен весник на Република Македонија” бр.106/2006, 143/2007 и 161/2018), информираат од Уставниот суд.
Според подносителите на иницијативата ваквата привилегија се коси со неколку одредби од Законот за пратеници и Законот за Собранието, каде прецизно се наведени финансиските привилегии на народните избраници, меѓу кои не се споменати трошоци за патарини.
Во иницијативата, меѓу другото е посочено дека за извршената општествена должност и придонесот кон заедницата, пратеникот добивал плата и надоместок на плата.
Според подносителите на иницијативата, Собранието со носење на оспорената комисиска одлука донесена на седница на кадровско работно тело составено само од 13 пратеници излегувало од рамките дадени во Уставот и наведените закони предвидувајќи надоместок на трошоците за патарина којшто надоместок како таков воопшто не бил предвиден ниту со Устав ниту со закон.