УШТЕ ДОКУМЕНТИ ПРОНАЈДЕНИ ВО КАНЦЕЛАРИИТЕ НА БАЈДЕН Ќе влезе ли ФБИ во неговиот дом, како што тоа го направи со Трамп?

Адвокатите на американскиот претседател Џозеф Бајден пронајдоа нови доверливи документи во неговата канцеларија, откако пред неколку дена признаа дека минатата есен нашле десетина досиеја, јави Си-Ен-Ен. Сега, некои републиканци бараат од ФБИ да изврши рација во домовите на претседателот Џо Бајден. 

Сè уште не е познато кога и каде адвокатите на Бајден ги пронашле дополнителните документи.

Првичното откривање на доверливи документи во поранешната канцеларија на Бајден поттикна потрага на други локации каде што можеби биле оставени документи од неговото време како потпретседател.

Конгресната комисија вчера најави дека ќе го испита случајот.

Претходникот на Бајден, Доналд Трамп пред извесно време изјави дека невладината на Бајден примила средства од Кина и дека кинеските власти ги имале увид во документите.

Чекајќи го одговорот на ФБИ, републиканското мнозинство во Претставничкиот дом реши на своја рака да ја започне долго најавуваната истрага против претседателот Џо Бајден и неговото семејство.

– Сега кога демократите веќе немаат еднопартиско владеење во Вашингтон, доаѓа надзорот и одговорноста – рече конгресменот Џејмс Комер, претседател на Комисијата за надзор на Претставничкиот дом.

Комитетот испрати серија писма во кои бара информации од Министерството за финансии за финансиски трансакции на членовите на семејството Бајден, кои се посочени како сомнителни. Тие извештаи се рутински, а владата автоматски издвојува поголеми финансиски трансакции, што само по себе не е доказ дека е сторено кривично дело.

Републиканците, исто така, побараа сведочење од поранешните директори на Твитер кои одлучија како социјалната мрежа ќе се справи со извештајот на Њујорк пост од октомври 2020 година за Хантер Бајден, помладиот син на претседателот Бајден. Републиканците тврдат дека објавувањето на приказната било задушено од политички причини.

Комер, републикански конгресмен, рече дека има „загрижувачки прашања” за деловните зделки на Хантер Бајден и братот на претседателот Џејмс, што налага подлабока истрага.

Републиканските членови на Конгресот веќе една година ги анализираат пораките и финансиските трансакции пронајдени при претресот на лаптопот на Хантер, а сега имаат право да издаваат обврзувачки покани и да спроведат поагресивна истрага.

Даноците и странските деловни трансакции на Хантер Бајден се веќе под федерална истрага. Хантер никогаш не држел позиција за претседателската кампања или во Белата куќа, но неговото членство во управниот одбор на украинска енергетска компанија и обидите да обезбеди деловни зделки во Кина долго време покренаа прашања за тоа дали тој го искористил влијанието на неговиот татко за да го стори тоа.

Џо Бајден рече дека не разговарал со својот син за неговите работи во странство.