УНЕТ одбележува 25 години постоење, ќе донира веб решенија за 3 угостителски фирми

Првиот македонски интернет провајдер УНЕТ одбележува 25 години постоење и по тој повод ќе додели изработка на три веб решенија за три фирми од угостителскиот сектор кој е најпогоден од економската криза што ја предизвика вирусот ковид-19.

– Деновиве, кога го одбележуваме нашиот 25-годишен јубилеј, се вонредно тешки за сите нас, не само како граѓани на оваа држава, туку и како стопанственици кои се соочуваме со огромни потешкотии во реализирањето на нашите деловни планови и цели. Нашиот јубилеј ќе го одбележиме на тој начин што во месецот на нашето формирање април, за еден од најафектираните сектори од оваа криза поради пандемијата на COVID-19, угостителството, одлучивме да доделиме изработка на три веб решенија, целосно бесплатно за три фирми од угостителскиот сектор – вели Пешева.

Со овој гест УНЕТ ги насочува своите ресурси кон ранливите сектори во обид да манифестира единство и сплотеност која е толку потребна во овие предизвикувачки времиња.

УНЕТ ја воспостави првата интернет конекција во Македонија пред 25 години на 20 април 1995 година, во време кога населението не само што во најголем дел немаше воопшто слушнато за интернет мрежата, туку и не поседуваше персонални компјутери.

Во 25-те години развој, покрај сите промени, предизвици и можности, УНЕТ и ИТ инфраструктурата на државата рапидно се развиваа, издигнувајќи нѐ како нација во една од технолошки најнапредните во регионот. Денес, преку 80% од населението активно користи интернет, а ИКТ индустријата е регистрирана како еден од најсилните придонесувачи во БДП.

– Започнавме скромно, ентузијастички, нашите цели пред 25 години првенствено се сведуваа на тоа да го едуцираме населението за тоа што е интернет мрежата, за што се користи, како се користи електронската пошта итн. – објаснува Анета Пешева, основач на УНЕТ и претседател на УО на МАСИТ.

Денес, УНЕТ е компанија која креира уникатни веб решенија со примена на современи технологии, нуди услуги за хостирање, регистрирање на домени, како и корисничка и техничка поддршка за своите корисници.