Украина плати највисока цена во Втората светска војна

Украина. Втора светска војна. Прослава или оддавање почит?

Според проценките на историчарите, за време на Втората светска војна вкупниот број на човечките жртви бил меѓу 50 и 80 милиони луѓе. Најпогодените земји во Европа во Втората светска војна биле:

Русија – 14 милиони (13%)
Украина– 8 милиони (19%)
Германија – 7 милиони (8,5%)
Полска – 6 милиони (17%)

На почетокот на мај, Украина, заедно со Европа и целиот демократски свет, го слави Денот на сеќавањето и помирувањето.

Украинците двојни жртви

Втората светска војна за Украина започна на 1 септември 1939 година, со германската инвазија на Полска. До 120.000 Украинци во редовите на армијата на Полска ја започнаа светската борба против нацизмот, од нив 8.000 загинаа во текот на првиот месец на војната. Исто така, на 1 септември, нацистите го бомбардираа Лавов и другите западноукраински градови, кои беа дел од Полска.

СССР влезе во Втората светска војна на 17 септември 1939 година. На тој ден, советските трупи, во дослух со германското раководство, влегоа на територијата на Полска и ги окупираа Западна Украина и Западна Белорусија.

Нацистичко-комунистичката соработка беше уништена на 22 јуни 1941 година, со германската инвазија на СССР. Во текот на годината од почетокот на германско-советската војна, Украина беше окупирана од трупите на Третиот рајх. Протерувањето на нацистите започна во есента 1943 година и заврши на крајот од 1944 година. Украинската насока беше главната на Источниот фронт: 50 до 75 отсто од сите дивизии на Вермахт и половина од сите советски сили оперираа овде.

И покрај желбата на Русија да ја приватизира победата, сувите бројки сведочат за друго. Украина плати највисока цена во оваа војна.

Вкупните демографски загуби на Украина – вклучувајќи ги убиените, жртвите од концентрационите логори, депортираните, евакуираните и протераните заедно со нацистите кои се повлекуваа – се меѓу најголемите во Втората светска војна. Од 41,7 милиони луѓе кои живееја пред војната во Украинската Советска Република (УССР), до 1945 година останаа само 27,4 милиони. Од 2,8 милиони советски луѓе земени во нацистичкото ропство, 2,4 милиони беа Украинци.

Украина се претвори во урнатини. И сето тоа беше направено не само од нацистите, туку и од советските трупи за време на повлекувањето – беа уништени цели градови и села, индустриски објекти и слично. Обемот на сталинистичките репресии во предвоените години и во првите месеци од војната во Галиција и Волињ, за време на повлекувањето, не беше помалку импресивен.

Депортацијата на Украинците од страна на Советскиот режим во Сибир, Казахстан и Далечниот исток – тоа е уште повеќе од 1 милион жители на УССР, главно од западните региони.

Треба да се потсетиме дека Украинците се спротивставуваа на нацизмот и го победуваа не само во состав на Црвената армија. Околу 120.000 Украинци ја пречекаа нацистичката инвазија во септември 1939 година како дел од полската армија. Во следните години, повеќе од 130.000 Украинци се бореа во другите армии на антихитлерската коалиција (САД, Велика Британија, Канада, Франција, итн.). Стотици илјади наши сонародници се бореа против нацизмот и во Движењето на отпорот. Многумина од нив го дадоа својот живот во битките за ослободување на Романија, Полска, Бугарија, Чехословачка, Унгарија, Австрија, Југославија.

Во 1945 година, Украина и Белорусија беа поканети да станат земји-основачи на ООН заедно со другите нации-победници во Втората светска војна, што стана доказ за признавање на колосалните жртви на украинскиот и белорускиот народ.

Цинична изјава на Путин

Но, замислете колку е циничен сегашниот руски режим!

Претседателот на Руската Федерација Владимир Путин изјавува дека победата во војната би била можна и без Украинците.

За Русија, Втората светска војна е митот што таа го создаде и би сакала да го прилагоди, за да го демонстрира своето измислено величие. Сепак, Втората светска војна беше борба на сите народи кои беа дел од СССР и треба да се обрне внимание на фактот дека генерално главните воени дејства се водеа на етничко белоруски и украински територии.

Дедо ми ја помина целата војна до Берлин. Тој имаше многу награди, но за него 9 Мај никогаш не беше празник. Особено на овој ден, тој не сакаше да зборува за војната, затоа што за него тоа не беше празник, туку трагедија, тоа беше болка за неговите паднати другари. Мора да паметиме и да оддаваме почит на светлиот спомен на починатите.

Затоа, за нас, Украинците од различни генерации, се навредливи и шокантни изјавите на сегашното раководство на Русија дека победата во војната би можела да се добие и без Украина. Ваквите зборови се навреда за сеќавањето на паднатите воини и веќе се традиционално за режимот изопачување на фактите од историјата. Но, бројките зборуваат самите за себе.

И она што го прави нашиот северен сосед сега е продолжение на култот на војната што беше негуван во Советскиот сојуз. Оние симболи, кои модерната Руска федерација ги користи како наводно во спомен на загинатите во Втората светска војна, денес станаа симболи на агресија против Украина во Донбас и окупацијата на Крим. И сега Русија манипулира со сеќавањето на изминатата ужасна војна за понатамошно милитаризирање.

Не е случајно тоа што слоганот на одбележување овој датум во Украина и Европа е „Никогаш повеќе“, додека Русија прославува во духот „Ако е потребно, ќе повториме!“

Наталија Задорожњук Амбасадор на УКраина во Северна Македонија

Тешко е да се замисли во 21 век, но повеќе од 40.000 луѓе станаа жртви на вооружената агресија на Руската федерација против Украина, од нив повеќе од 14.000 загинаа. Уште 1,5 милиони граѓани на Украина станаа внатрешно раселени лица, а бројот на жртвите во овој вооружен судир, невиден за модерна Европа, постојано расте.

И тоа се дејства на земјата која е постојана членка на Советот за безбедност на ООН, која, додека ги повикува другите да го почитуваат меѓународното право, самата го крши брутално и цинично.

Почитувајќи го сеќавањето на сите оние кои загинаа за време на најкрвавата војна во историјата на човештвото, ние, Украинците, како никој друг во Европа, ја разбираме цената на мирот. И за Украина 8–9 мај се денови на сеќавање, помирување и почит кон оние кои ги загубиле животите во Втората светска војна. Целта е достојно да се испочитува подвигот на украинскиот народ, неговиот извонреден придонес во победата на антихитлерската коалиција во Втората светска војна, да се искаже почит кон сите борци против нацизмот, да се овековечи споменот на паднатите војници. Ние им оддаваме почит на загинатите херои не со лажно-циничните звуци на фанфари, концерти или огномети, не со песни и ора, туку со смирено „благодарам“, искрена молитва за оние кои се бореа за обнова на мирот во Европа во 1940-тите години.

Не е случајно тоа што слоганот на одбележување овој датум во Украина и Европа е „Никогаш повеќе“, додека Русија прославува во духот „Ако е потребно, ќе повториме!“.

(На фотографијата: Украинецот Алексеј Берест го поставил Знамето на победата над Рајхстагот во Берлин)