УКРАИНА НЕМА СИЛА ДА ГО ВРАТИ КРИМ Зеленски вели дека е реалист и во поглед на членството во НАТО

Украина има реалистичен пристап кон идното членство во НАТО и е свесна дека во моментов нема доволно сили или широка меѓународна поддршка за враќање на Крим, но нејзината позиција за статусот на полуостровот останува непроменета, изјави украинскиот претседател Володимир Зеленски во интервју за а Би-би-си.

– Ние сме реалисти. Навистина сакаме да бидеме во НАТО. Според мене, тоа е фер. Но, знаеме со сигурност дека САД, како и некои други земји, искрено кажано, во моментов не ја гледаат Украина во НАТО. А Русија, без сомнение, никогаш не сака да не види таму – рече Зеленски.

Зборувајќи за Крим, тој призна дека Украина во моментов нема воен или политички капацитет да го врати полуостровот под своја контрола.

– Дури и денес, кога станува збор за Крим, немаме сила целосно да го вратиме нашиот украински полуостров Крим. Можеби го кажав тоа на првата средба и верувам дека бев во право – рече украинскиот претседател.

Тој нагласи дека недостигот на загарантирана поддршка не значи промена на основните украински принципи, вклучително и ставот за територијалниот интегритет на земјата. Според него, прашањето за Крим и нивото на согласност во рамките на меѓународната дипломатија за неговиот статус сѐ уште се сложени.

– И искрено, да, денес немаме сила за сето тоа. Немаме доволно поддршка за сето тоа. Но, тоа веќе го кажав на првата средба. Мислам дека можев да го потврдам тоа на последната средба со Путин – изјави Зеленски.

Украинскиот претседател, исто така, рече дека е подготвен да одржи избори, но нагласи дека нивната легитимност и спроведување зависат од безбедносните услови и промените во законот. Тој додаде дека поддршката на САД, Европската Унија и украинскиот парламент е неопходна за организирање избори во воени околности.