УБИЛ ВОЛК ВО СОПСТВЕНИОТ ДВОР! Жител на кочанско Оризари имал блиска средба со диво животно

Педесет и едногодишниот Сашко Арсов од кочанската населба Оризари попладнево убил волк што му влегол во дворот од семејната куќа, јави Канал 5.

Дивото животно непријатно го изненадило затоа што не очекувал блиска средба со него во централниот дел на населбата, а во тој момент по улицата во која живеее поминувале деца и други луѓе. Само присебноста му помогнала да го совлада волкот и да избегне сериозни повреди.

– Во моментот кога го забележав помислив дека се работи за куче од расата германски овчар кое шета со другите бездомни кучиња во населбата. Кога почна да ми приоѓа сфатив дека се работи за млад волк, кој се симнал од падините на планината и влегол во дворот. Успеав да го шутнам со ногата и да го оддалечам за миг, а потоа со камен и стап што случајно ги најдов во близина, го удрив неколку пати во пределот на главата. Вознемирен сум од случката и не сакам ни да помислам за можните последици ако животното се појавеше навечер или пак ако наидеше некое дете или жена – вели Арсов.

Жителите на Оризари потврдија дека во изминатите неколку вечери во близина на населбата слушнале завивање на волци, кои најверојатно во потрага по храна се симнуваат од Осоговијата. Граѓаните се загрижени за својата безбедност и бараат реакција од надлежните ловочуварски служби.