УБИЕЦОТ ПОВИКАЛ НА НАСИЛСТВО ПРОТИВ ТРАМП Градоначалникот на Минеаполис бара забрана за оружје по нападот во црква

Градоначалникот на Минеаполис, Џејкоб Фреј, повика на федерална и на државна забрана за оружје, откако 2 деца, на возраст од 8 и 10 години, беа убиени, а повеќе од 20 лица беа ранети во вооружен напад во католичко училиште во градот.

Неколку часа по нападот Фреј рече дека е посветен на тоа „да не биде само уште еден политичар кој вели никогаш повеќе, туку  бара конкретни промени во законите за оружје“.

Директорот на Федералното истражно биро (ФБИ), Кеш Пател, претходно изјави дека агенцијата собрала информации што укажуваат дека нападот бил чин на домашен тероризам и злосторство од омраза насочено кон католиците.

Пател откри дека вооружениот човек оставил антикатолички и антирелигиозни пораки во својот „манифест“, како и повик за насилство против американскиот претседател Доналд Трамп напишан на магазин за муниција.

Портпаролката на Белата куќа, Каролин Ливит, го опиша нападот како „страшна трагедија“, нарекувајќи го напаѓачот „луд“ и нагласувајќи дека овој напад е „срамно сквернавење на свет религиозен ритуал“.

Најмалку 3 лица, вклучувајќи го и напаѓачот, загинаа завчера, а околу 20 лица беа ранети во напад во католичко училиште во јужниот дел на градот Минеаполис во американската држава Минесота, објави функционер на Министерството за правда на САД.

– Вооружениот човек си го одзеде животот во задниот дел на црквата. Таа кукавица е идентификувана како 23-годишниот Робин Вестман, без претходно криминално досие – изјави началникот на полицијата во Минеаполис, Брајан О’Хара.