УАПСЕН ПОРАНЕШНИОТ ДРЖАВЕН ПРАВОБРАНИТЕЛ ФЕХМИ СТАФА Осомничен за поткуп од неколку десетици илјади евра
Фехми Стафа се споменуваше и како еден од заинтересираните кандидати за член на Судскиот совет.
Поранешниот државен правобранител Фехми Стафа е уапсен и осомничен за незаконски поткуп од неколку десетици илјади евра, дознава Плусинфо.
Фехми Стафа во изминатиот период се споменуваше и како еден од заинтересираните кандидати за член на Судскиот совет, на местото што се испразни по истекот на мандатот на Селим Адеми. Постапката за избор на нов член на Судскиот совет ја води Собранието, но таа сè уште не е финализирана.
Фехми Стафа беше државен правобранител на Република Северна Македонија од август 2018 година до 2022 година. Државниот правобранител е институција задолжена за правна заштита на државата и нејзините имотно-правни интереси, како и за застапување на државата во судски и други правни постапки. За време на неговиот мандат, Стафа беше вклучен во повеќе чувствителни предмети со висок јавен интерес.
Неговото име најчесто се споменуваше во јавноста во контекст на случајот „Трансмет“, односно во постапките за конфискација на имот поврзан со бизнисменот Сеад Кочан. Одлуките и правните ставови на Државното правобранителство во тој период предизвикаа реакции и критики во дел од јавноста и кај правни експерти, поради начинот на кој државата ги штитеше своите финансиски интереси.
Дополнително, во медиумите беше отворена и полемика за исплати на хонорари од Државното правобранителство кон ТВ-презентерката Бесмира Ејупи, што тогаш предизвика јавни прашања за транспарентноста и оправданоста на ваквите ангажмани. Стафа во тие случаи ги отфрлаше обвинувањата, наведувајќи дека станува збор за законски ангажмани и услуги.
По неговото заминување од функцијата во 2022 година, Фехми Стафа ретко се појавуваше во медиумите. Во изминатиот период неговото име се споменуваше само повремено, најчесто во ретроспективен контекст поврзан со постари предмети, без да биде дел од актуелни институционални или политички случувања