Уапсен гостиварец кој му се заканувал на Спасовски преку социјални мрежи

На Граничниот премин „Меѓународен аеродром Скопје“ синоќа е приведен М.М. (28) од Гостивар, кој, како што дознаваме, му се заканувал на премиерот Оливер Спасовски преку социјалните мрежи. Приведениот е предаден на Полициската станица Гостивар, затоа што се барал со централен распис од Надворешната канцеларија за криминалистички работи Гостивар.

МВР денеска соопшти дека на 06.07.2020 против него е поднесена кривична пријава за сторено кривично дело „загрозување на сигурноста“, предвидено во член 144 став 4 од Кривичниот законик.

„М.М. се сомничи дека преку социјалните мрежи упатувал закани односно ја загрозил сигурноста на функционер на Владата на Република Северна Македонија. М.М. е задржан во Полициската станица Гостивар и ќе биде изведен пред судија во претходна постапка во Основниот суд Гостивар“, се појаснува во соопштението од МВР.