УАПСЕН Е ПОТПАЛУВАЧОТ НА ПОЖАРИТЕ ВО КУМАНОВО Избегал во Скопје откако запалил три автомобили и дуќан

Полицијата ноќеска во Скопје го уапси кумановецот Ф.А (35) кој е осомничен дека во понеделникот во раните утрински часови запалил три возила и дуќан во Куманово. Едно од запалените возила беше на републичкиот обвинител Џелал Бајрами, кој е поранешен функционер на ДУИ, а запалениот деловен објект е во сопственост на членот на Советот на Општина Куманово, Фитор Јакупи, исто така од партијата ДУИ.

– Денеска (05.12.2024) во 1.10 часот во Скопје, на подрачјето на Бит-пазар, по претходно добиени оперативни информации и координација на СВР Куманово со Одделот за криминалистичка полиција при Бирото за јавна безбедност и СВР Скопје, полициски службеници од Единицата за интервентна полиција при СВР Скопје го лишиле од слобода Ф.А.(35) од Куманово. Тој се сомничи дека на 02.12.2024 во Куманово опожарил три патнички моторни возила и еден деловен објект – информираат од Секторот за внатрешни работи Куманово.

Од полицијата додаваат дека Ф.А. е приведен и задржан во Полициска станица Куманово и по целосното документирање на случајот против него ќе следува соодветна кривична пријава.

• СЕ ВЕШТАЧАТ ТРАГИТЕ ОД СИНОЌЕШНИТЕ 4 ИСТОВРЕМЕНИ ПОЖАРИ ВО КУМАНОВО Обвинителството потврди дека едно од запалените возила е на јавен обвинител

Кумановската полиција во понеделникот соопшти дека пожарите биле запалени ноќта околу 3.20 часот и тоа врз деловен објект на улицата 11 Октомври и три патнички возила на улиците Трст, Вардарска и Никола Вапцаров.