УАПСЕН Е ПИШТОЛЏИЈАТА ОД ШТИП, ПРОНАЈДЕНО И ОРУЖЈЕТО Почина застреланиот 25-годишен студент
Уапсен е странскиот државјанин кој пукаше во 25-годишен студент на градскиот плоштад во Штип. Пронајдено е и оружјето со кое било пукано. Студентот починал откако беше пренесен во Клиничката болница во Штип.
Уапсен е турскиот државјанин кој вчера извади пиштол и уби друго лице во Штип, извести Основното обвинителство во Штип. Од ОЈО Штип велат дека е најден и пиштолот.
„Основното јавно обвинителство Штип е известено од МВР дека лицето по кое се трагаше во врска со вчерашниот оружен инцидент е лишено од слобода. Пронајдено е и оружјето. Во текот на денот ќе следи постапка“, велат од Обвинитeлството.
Дваесет и пет годишниот Е.О, странски државјанин, е убиен синоќа во угостителскиот објект „Вами“ на Градскиот плоштад во Штип, потврдија од Клиничка болница-Штип.
Во болницата е донесен без знаци на живот, со неколку прострелни рани. Јавниот обвинител во текот на ноќта издаваше повеќе насоки и наредби за пронаоѓање на сторителот кој е во бегство.
На социјалните медиуми после полноќ се појавија и видеа на кои се гледа дека возило ја пробива рампата на едната од патарините на автопатот Штип-Скопје. Инцидентот во СВР-Штип е пријавен во 21.30 часот.
Дека пиштолџија е уапсен потврдија и од Министерството за внатрешни работи.
„По преземени мерки и активности, при што бил употребен и дрон, во близина на наплатна рампа Миладиновци, полициски службеници од слобода ги лишиле К.К.(21) од Република Турција зa кој постои сомнение дека е сторител на делото, како и А.Х.(22), Т.М.(22), О.М.(29) и А.О.(28), сите од Република Турција, поради сомнение дека му помогнале на К.К. да побегне од местото.
Имено, во 22.15 часот на наплатната рампа Миладиновци, во заедничка акција на СВР Штип, СВР Скопје и сообраќајната полиција, било запрено патничко возило „бмв” со штипски регистарски ознаки, во кое биле А.Х., Т.М., О.М. и А.О., при што А.Х. се дал во бегство, а другите лица биле лишени од слобода. Набргу, по преземени мерки, тој и сторителот К.К. биле пронајдени и лишени од слобода. Сите лица биле задржани во полициска станица и по целосно документирање на случајот во координација со јавен обвинител, против нив ќе бидат поднесени соодветни пријави“, соопшти МВР.