УАПСЕН БУЈАР ДАРДИШТА ОД ДУИ ЗА ПЕРЕЊЕ ПАРИ Во акција на МВР приведени повеќе од 10 лица
Извршени се претреси на повеќе локации во Скопје и во Куманово, а неофицијално, при претресите досега се пронајдени и одземени пари во различни валути, мобилни телефони, лаптопи, хард дискови, како и финансиска и друга релевантна документација.
Ноќеска и рано изутринава полицијата спроведе акција на повеќе локации низ државата, при што се приведени повеќе од десет лица. Меѓу нив има и поранешен директор, лице кое во минатото било високо етаблирано во структури поврзани со ДУИ. Станува збор за Бујар Дардишта, поранешен директор на Управата за водење на матични книги.
Бујар Дардишта е кадар на ДУИ, кој во изминатите години извршувал повеќе раководни функции во државната администрација. Најпознат е по мандатот како директор на Управата за водење на матични книги, институција која беше во фокусот на јавноста поради сериозни забелешки за начинот на работење и издавањето документи без целосна евиденција. Подоцна беше именуван и за управител во ЕСМ Дистрибуција, дел од државниот енергетски сектор. Во јавноста се перципира како партиски кадар на ДУИ кој раководел со чувствителни институции од системот, без да биде меѓу најекспонираните политички фигури на партијата.
Акцијата на полицијата започнала во текот на ноќта меѓу 17 и 18 декември 2025 година од страна на Одделот за сузбивање на организиран и сериозен криминал при БЈБ – МВР, во координација и под раководство на Основното јавно обвинителство за гонење организиран криминал и корупција.
Според досегашните информации, станува збор за сузбивање на организирана криминална група осомничена за кривични дела од областа на корупцијата и економскиот криминал.
По претходно обезбедени судски наредби, извршени се претреси на повеќе локации во Скопје и во Куманово. Неофицијално, при претресите до сега се пронајдени и одземени пари во различни валути, мобилни телефони, лаптопи, хард дискови, како и финансиска и друга релевантна документација.
Во моментот, според неофицијални информации, во тек се претреси и во два правни субјекти на подрачјето на Скопје и на Куманово. Повеќе детали од полицијата се очекуваат во текот на денот.
Од Обвинителството за гонење организиран криминал и корупција потврдија дека под раководство на јавен обвинител од ОЈО ГОКК, полициски службеници од Одделот за сузбивање на организиран и сериозен криминал при БЈБ-МВР од ноќеска спроведуваат активности на повеќе локации во Скопје и во Куманово, поради постоење основано сомневање за сторени кривични дела од финансиско економска природа. Повеќе детали ќе бидат споделени по завршување на теренските активности.