📽 УАПСЕН АЛБАНСКИОТ ПАБЛО ЕСКОБАР Кланот на Дритан Ѓика владеел со светскиот нарко-пазар, запленети се милиони долари, оружје и луксузни возила

Меѓународниот наркобос Дритан Ѓика е уапсен во Абу Даби – потег кој најверојатно ќе го разниша кланот Кинахан бидејќи Обединетите Арапски Емирати повеќе не се безбедно засолниште за криминалци, како што некогаш беа, објави Сандеј ворлд.

Албанскиот трговец со кокаин, кој се смета за еден од водечките во светскиот шверц на дрога, е уапсен како дел од „Операција Пампа“, соопшти шпанската полиција. Во рамки на истрагата, разбиена е и неговата албанска криминална организација со база во Еквадор.

Во Шпанија и во Еквадор биле уапсени 40 лица, извршени се 62 претреси, при што се запленети над 500.000 евра, 2,3 милиони долари во кеш, воено оружје и 12 луксузни возила. Осум членови на бандата веќе биле осудени во јануари за перење пари.

Ѓика се криел 14 месеци, откако исчезнал од својот дом во Гвајакил, Еквадор, каде што од 2009 година управувал со својата наркокартелска мрежа. Првично престојувал таму со туристичка виза, а останал 15 години, станувајќи еден од најбараните луѓе во земјата поради шверц на кокаин кон Централна Америка и Европа.

47-годишниот Ѓика бил уапсен на 26 мај 2025 година во Абу Даби. Бил предмет на две „црвени потерници“ од Интерпол за трговија со дрога, перење пари и за организиран криминал.

Уапсен е и близок соработник на Ѓика

Во заедничка акција на шпанската полиција, Европол, Интерпол и на властите на Обединетите Арапски Емирати, уапсен е близок соработник на Ѓика кој е еден од главните водачи на меѓународната мрежа за трговија со дрога, објави албански Политико.

Според странските медиуми, станува збор за блискиот соработник на Дритан Ѓика. Името на соработникот сѐ уште не е откриено, но се знае дека лично ги координирал контактите со снабдувачите на кокаин, како и транспортот, складирањето, дистрибуцијата и логистиката преку мрежата што оперирала од Еквадор кон Европа.

Шпанските медиуми откриваат дека тој имал договор со колумбиски картели за испорака на 4.000 килограми кокаин месечно, наменет за европскиот пазар.

Централниот истражен суд веќе побарал негова екстрадиција во Шпанија, каде што ќе му се суди заедно со другите членови на организацијата.

Ѓика користел легитимни бизниси за да пере пари

Според Министерството за внатрешни работи на Еквадор, мрежата на Ѓика била „високо организирана“ со управен тим и со логистичка поддршка. Тој користел легитимни бизниси за да пере пари и за да ги прикрие своите активности. Се наведува дека користел фирми во Шпанија и ОАЕ за да ги спроведува овие трансакции.

Дополнително, Ѓика наводно имал заштита од поранешниот шеф на полицијата во Еквадор, а неговиот партнер Рубен Черес бил вклучен во корупциски скандал, поврзан со зетот на поранешниот претседател Гиљермо Ласо.

Организацијата користела бројни европски пристаништа за увоз на дрогата, вклучувајќи ги Амберг, Ротердам, Алгесирас, Хамбург, Санкт Петербург, Дуќа, Џоја Тауро и Констанца, каде имале соработници, најчесто поврзани со албанската мафија.

Уапсените врски не застануваат тука – Ѓика е последниот во низа високорангирани нарко-босови, уапсени во ОАЕ. Членови на „суперкартелот“, како што се Ридуан Таги и Рафаеле Империјале, беа уапсени во ОАЕ и екстрадирани во Холандија и во Италија.

Во март, и балканскиот мафијаш Едис Гачанин беше уапсен во Дубаи и се соочува со екстрадиција во Холандија за издржување 7-годишна затворска казна. Минатиот месец, Шон Мекговерн – десната рака на Даниел Кинахан – беше екстрадиран во Ирска каде што се соочува со обвинение за убиство.

Неговото апсење се случи само неколку дена пред Обединетите Арапски Емирати да потпишат договор за екстрадиција и меѓусебна правна помош со Ирска. Мекговерн е највисокопозиционираниот член на кланот Кинахан кој досега се соочил со ирското правосудство.