ТРОШЕТЕ ГАС, НЕ ДИЗЕЛ ИЛИ МАЗУТ, ДА НЕ СЕ ГУШИМЕ! Порака од министерот за животна средина до компаниите

Министерот за животна средина и просторно планирање Насер Нуредини смета дека компаниите треба да продолжат да користат гас, а не да се оди на понееколошки варијанти како дизел и мазут. Тој тврди дека гас има.

– Има гас, јас го кажувам тоа бидејќи доаѓам од сектор инвестиција, сите знаеме дека има гас – рече Нуредини.

Сепак, тој потсети дека има процедури кои треба да поминат во mинистерството, а досега, како што информира, околу пет големи компании побарале да ја сменат дозволата со која во случај на недостиг од гас ќе користат дизел.

– Ако компаниите имаат А интегрирана дозвола мора да направат барање за измена на дозволата и процедурата трае околу три месеци. Значи, ние мора да процениме прво дали таа измена е во согласност со законот – рече Нуредини на настан за садење 20 дрвца кои се донација од Еко-свест.

Нуредини порача дека и покрај енергетската криза сите треба да се свесни за животната средина.

– Имаме за жал загадување, но ако гледаме како било претходните години имаме, намалување на аерозагадувањето. Тоа значи дека нашите политики што се обидуваме да ги направиме, измена на греење на болници, на полициски станици, градинки и училишта, имаат позитивен ефект. Не можам да кажам што ќе биде утре, но морам да кажам дека сме во енергетска криза. Имам разбирање и за граѓаните кои се најзагрозени во вакви кризи, но апелирам на свесност од сите институции, приватниот сектор и граѓаните, рече Нуредини.