ТРОЈЦА СОВЕТНИЦИ МУ ПРЕДЛОЖИЛЕ ПЛАНОВИ ЗА УКРАИНА НА ТРАМП Еве што содржат нивните мировни решенија

Тимот на новоизбраниот американски претседател Доналд Трамп разгледува мировни предлози за војната во Украина од тројца клучни советници. Предлозите ќе бидат во центарот на вниманието како што Трамп ќе биде инаугуриран во Белата куќа, пишува Ројтерс.

Медиумот тврди дека Трамп го советуваат пензионираниот армиски генерал-полковник Кит Келог, идниот потпретседател на САД Џеј Ди Венс и Ричард Гренел, поранешниот вршител на должноста шеф на разузнавањето на Трамп.

Советниците ќе пробаат да ги принудат Москва и Киев на преговори со моркови и со стапови, пишува Ројтерс.

Гаранции за Украина, но не и членство во НАТО

Првиот предлот, планот на Келог, кој е направен заедно со поранешниот функционер на Советот за национална безбедност, Фред Флејц, и претставен на Трамп претходно оваа година, повикува на замрзнување на сегашните борбени линии.

Според овој план, Трамп би доставувал повеќе американско оружје за Киев само доколку Украина се согласи на мировни преговори. Во исто време, тој ќе ја предупреди Москва дека ќе ја зголеми американската помош за Украина доколку Русија ги одбие преговорите. Членството на Украина во НАТО ќе биде ставено во мирување.

На Украина, исто така, ќе ѝ бидат понудени американски безбедносни гаранции, кои би можеле да вклучат зголемување на снабдувањето со оружје по постигнувањето на договорот, според тој предлог.

Оружје за Украина ако Путин не седне на столчето

Во јунско интервју за Тајмс радио, британска дигитална станица, Себастијан Горка, еден од новите заменици советници на Трамп за национална безбедност, рече дека Трамп рекол дека ќе го принуди Путин на разговори со закана за испорака на оружје без преседан во Украина.

Горка, контактиран по телефон, го нарече Ројтерс „ѓубре од лажни вести“ и одби да елаборира.

Планот Келог, кој зависи од зголемувањето на помошта за Украина доколку Путин не дојде на маса, може да се соочи со удар во Конгресот, каде некои од најблиските сојузници на Трамп се противат на дополнителна воена помош за источноевропската нација.

Демилитиразирана зона и автономни региони

Вториот предлог е на Џеј Ди Венс, десната рака на Трамп. Ди Венс во гостување кај американскиот подкастер Шон Рајан во септември изјави дека договорот најверојатно ќе вклучува демилитаризирана зона на постојните линии на фронтот, која ќе биде „силно зајакната“ за да се спречат понатамошни руски упади.

Исто така, според Ди Венс, на Киев ќе му биде одбиено членството во НАТО.

Третата идеја потекнува од Ричард Гренел, поранешен амбасадор на Трамп во Германија, познат и по своите заложби на Балканот. Гренел се залагаше за создавање „автономни зони“ во источна Украина за време на тркалезната маса на Блумберг во јули, но не даде детали.

Тој, исто така, посочи дека членството на Украина во НАТО не е во интерес на САД.

Гренел допрва треба да обезбеди позиција во новата администрација, иако сè уште го има увото на Трамп за европските прашања, изјави за Ројтерс висок советник за надворешна политика на Трамп.

Неименуваниот извор рекол дека Гренел бил еден од ретките луѓе на состанокот во Њујорк меѓу Трамп и Зеленски одржан во септември.

На Зеленски му се брза, на Путин не

Американските аналитичари и експерти сметаат дека делови од трите предлози сигурно ќе бидат одбиени од украинскиот претседател Зеленски, имајќи предвид дека Зеленски објави сопствен „План за победа“ и крај на војната во кој се вели дека Украина треба да поканета во НАТО.

Минатата недела, министерот за надворешни работи на Украина испрати писмо до своите колеги од НАТО во кое ги повика да упатат покана за членство на состанокот на министрите за надворешни работи во вторник.

Зеленски, соочен со недостиг на работна сила и зголемени територијални загуби, посочи дека можеби е отворен за преговори.

Од друга страна, Путин, веројатно нема да се брза и ќе чека да види какви отстапки може да понуди Трамп за да го привлече на преговарачка маса, смета Јуџин Румер, поранешен врвен американски разузнавачки аналитичар за Русија.

Ројтерс во мај објави дека Путин е подготвен да ја запре војната со договорен прекин на огнот кој ги препознава сегашните линии на фронтот, но е подготвен да се бори доколку Киев и Западот не одговорат.

Европа ќе му ја помати водата на Трамп

Русија веќе го контролира целиот Крим, откако еднострано го зазеде од Украина во 2014 година и оттогаш зазеде околу 80% од Донбас – кој се состои од Доњецк и Луганск – како и повеќе од 70% од Запорожје и Херсон, и мали делови од регионите на Миколаев и Харков.

Некои европски сојузници изразија подготвеност да ја зголемат помошта за Украина, а американскиот претседател Џо Бајден продолжува да испраќа оружје и неодамна му даде зелено светло на Киев да гаѓа цели во Русија со ракети со долг дострел.

Ова може да му ја помати водата на Трамп во напорите да го седне Киев на преговарачкото столче.