Тројца руски лекари мистериозно паднале од прозорец

Тројца здравствени работници испаднаа од болничките прозорци во Русија, во последниве две недели, од засега непознати причини, што го поттикнува прашањето за состојбите во кои работат лекарите и медицинските професионалци додека се борат со пандемскиот коронавирус.

Двајца од овие медицински работници починале, а еден се бори за живот.

Сите три инциденти, според „СNN“, се под истрага од страна на руските власти, а настаните предизвикаа интензивни дискусии во медиумите и на социјалните мрежи.

Александар Шулепов, лекар од брза помош во Воронеж, град на околу 500 километри јужно од Москва, е во критична состојба откако падна од прозорец на вториот кат во болницата каде што работеше и беше лекуван откако му беше откриено дека е позитивен на ковид-19.

Шулепов беше хоспитализиран на 22 април откако тестот утврди дека е позитивен за ковид-19, истиот ден неговиот колега Александар Косјакин сподели видео во кое раскажува дека Шулепов дека бил принуден да работи и покрај тоа што бил болен.

По приемот во болница, Шулепов негираше во друго видео дека го принудиле болен да работи, но постои сомневање дека тој го сторил тоа поради притисок.

Неговиот колега Косјакин бил сослушан од полицијата под сомнение дека шири лажни вести, а во саботата, 24 април, Шулепов, искусен лекар од брза помош, паднал од прозорецот и заработил скршеница на черепот.

Ова е трет сомнителен случај кој го истражува полицијата, а станува збор за смрт на лекари со паѓање од прозорец.

Наталија Лебедева, лекар во центарот за обука на космонаути, исто така паднала од прозорецот во болницата каде се лекувала од ковид-19, а нејзините колеги веруваат дека таа се самоубила затоа што се чувствувала виновна што вирусот се проширил меѓу здравствените работници во болницата за космонаути.

Нејзината смрт беше прогласена за „трагична несреќа“.

Неколку дена подоцна, Јелена Непомњашчаја, главен лекар во реконструираната болница за третман на пациенти кои се заболени од коронавирусот во Сибир, почина по падот од прозорец кратко време по разговорот со службените лица во болницата.

Таа се спротивставила на тоа нејзината болница да ја прими заразените бидејќи чувствувала дека не се обучени за тоа и немаат доволно заштитна опрема.

Официјалните лица го негираа ова, велејќи дека болницата требало да биде резервна опција, а персоналот бил обучен и опремен.

Во Русија се пријавени 145.268 пациенти инфицирани со ковид-19, а меѓу нив се и стотина медицински работници.