Ако немаме соодветни шприцеви, од секое шишенце на „Фајзер“ ќе пропадне по една вакцина

Во Македонија досега не пристигна ниту една вакцина против ковид-19, додека останатите земји веќе ја започнаа имунизацијата на населението против коронавирусот, без разлика со која вакцина од кој производител. Како што е веќе познато вакцините пристигнуваат во шишенца кои содржат повеќе дози, иако кај нас веќе три години се користи методата една вакцина – една инекција, од здравство велат дека здравствените работници имале посебен тренинг за манипулација на самата вакцина – земање, доза и растворање.

Американската компанија „Фајзер“ до неодамна тврдеше дека од едно шишенце може да се извлечат пет дози од вакцината, а според најновите информации, доколку се користи соодветна медицинска опрема може да се добие и шеста доза.

Поради ова прашавме во Министерството за здравство дали во нашиот здравствен систем се набавени вакви специјални шприцеви со кои може да се искористи „мртвиот простор“, а притоа да се добие шестата доза, поради тоа што има несогласувања меѓу земјите од ЕУ за ова со производителот.

– На вакциналните пунктови ќе биде стандардна постапка за давање вакцина. На истите пунктови работат искусни здравствени работници. Начинот на апликација на таков тип вакцина им е веќе познат, бидејќи во нашата земја само во последните 3 години се користи „сингл шот“ или една вакцина една инекција. Работењето со повеќедозажни вијали слични на сегашните вакцини против ковид не е непознато – ни одговорија од Здравство.

Од Министерството додаваат дека здравствените работници имале посебен тренинг за манипулација на самата вакцина – земање, доза и растворање, како и дека се подготвени за процесот на вакцинација, веднаш штом ќе пристигнат дозите.

За да се користи шестата доза од шишето, потребни се специјални шприцеви со мал „мртов простор“. Мртвиот простор е количина на производ што останува во шприцот кога клипот ќе се истурка целосно.

Производителот на медицинска опрема, американската компанија „Бектон Дикинсон“ (БД), вели дека има малку такви шприцеви на залиха.

– Малите шприцеви за мртви простори традиционално беа многу барани – рече портпаролот на компанијата и додаде дека производствениот капацитет е ограничен и ќе биде потребно време да се зголеми.

На прашањето од Плусинфо од кој производител се набавуваат шприцеви кај нас за вакцинацијата и дали ќе може да се искористи шестата доза од вакцината на „Фајзер“, не добивме конкретен одговор од нашето Министерство за здравство, туку само дека сѐ е подготвено.

– Нашиот здравствен систем е подготвен и има адекватен медицински материјал за претстојната вакцинација, а тековно ќе набави и дополнително доколку што е потребно. Производителот на вакцината доставува упатство за користење по кое задолжително нашите здравствените работници ќе се придржуваат – велат од Министерството за здравство.