ТРАМП ПРЕДЛАГА МИР ПРЕКУ БИЗНИС, САД ЌЕ ИНВЕСТИРА ВО РУСИЈА Запрепастените Европејци гледаат „втора Јалта“ во американските планови

Во последните недели, администрацијата на американскиот претседател Доналд Трамп им презентираше серија документи на своите европски сојузници кои изложуваат визија за реконструкција на Украина и враќање на Русија во глобалната економија, предизвикувајќи жесток конфликт на преговарачката маса.

Американскиот план, детално опишан во неофицијалните додатоци на мировните предлози, предвидува користење на замрзнатите руски пари за проекти во Украина кои би биле водени од американски компании и реинтеграција на руската економија со помош на американски инвестиции, пишува Вол Стрит Џурнал.

Американска визија: Од бизнис до мир

Документите, кои ги видоа американските и европските претставници, ги детализираат плановите на американските финансиски компании да користат околу 200 милијарди долари замрзнати руски средства. Парите би финансирале проекти во Украина, вклучително и изградба на огромен центар за податоци, кој би се напојувал од нуклеарната централа Запорожје, која моментно е под руска окупација.

Вториот дел од планот нуди визија за извлекување на Русија од нејзината изолација, при што американските компании ќе инвестираат во стратешки сектори како што се рударството на ретки метали и дупчењето нафта во Арктикот, но исто така ќе помогнат во обновувањето на руските енергетски текови кон Европа.

Американскиот преговарачки тим ја гледа заедничката економска активност и енергетската меѓузависност како основа на својата филозофија „бизнис за мир“. Претставник на Белата куќа изјави дека претседателот Трамп и неговиот тим работат на постигнување договор за завршување на војната, за која велат дека се влече предолго.

Неверување во Европа

Предлозите беа пречекани со неверица во Европа. Некои европски претставници кои ги виделе документите рекоа дека не се сигурни дали да ги сфатат сериозно. Еден претставник ги спореди со визијата на Трамп за екслузивна ривиерна населба во Газа. Друг, зборувајќи за предложените енергетски договори, рече дека тие се економска верзија на конференцијата од 1945 година на која победниците во Втората светска војна ја поделија Европа.

– Како Јалта е – рече тој.

Европа, која се обидува да се одвикне од рускиот гас уште од почетокот на војната во Украина во 2022 година, не сака да продолжи да купува енергија од земјата што ја смета за своја најголема безбедносна закана. Европските претставници стравуваат дека пристапот на САД ќе ѝ даде на Русија одмор што ѝ е потребен за да ја зајакне својата економија и воена моќ.

Германската влада, исто така, нагласи дека европските санкции забрануваат каква било работа или финансиски трансакции поврзани со поправка на гасоводот Северен тек. Германскиот канцелар Фридрих Мерц во понеделник изјави дека е „скептичен кон предлозите на САД“.

Битка за замрзнатите руски милијарди

Во срцето на конфликтот се замрзнатите руски пари, од кои повеќето се во сопственост на европските институции. Европските претставници сакаат да ги искористат парите за да обезбедат кредити за Украина, за да може да купи оружје и да ја одржи државата во функција. Од друга страна, Вашингтон вели дека таков пристап брзо би ги исцрпил средствата.

Наместо тоа, САД планираат да ангажираат директори и милијардери од Волстрит за да ги инвестираат парите, со што ќе го зголемат износот достапен за инвестиции. Еден американски претставник вклучен во разговорите рече дека износот под управување на САД би можел да порасне на 800 милијарди долари.

– Нашата сила е во тоа што навистина го разбираме финансискиот раст – вели тој.

Доколку преовлада визијата на САД, таа ќе ги надмине европските планови и ќе ја зацврсти економската реинтеграција на Русија. Резултатот, како што опишаа неколку функционери, е френетична трка со времето за спроведување на европските планови пред САД да ги наметнат своите решенија.

Забрзана дипломатија, клучни состаноци

Дипломатијата се интензивираше во последните недели. Трамп вчера разговараше со францускиот претседател Емануел Макрон, германскиот канцелар Фридрих Мерц и со британскиот премиер Кир Стармер за мировниот процес и навести можно патување во Европа овој викенд.

– Мислам дека имавме некои несогласувања и ќе видиме како тоа ќе се одвива. Не сакаме да губиме време – им рече Трамп на новинарите.

Пратеникот на Трамп за Русија, Стив Виткоф, и неговиот зет, Џаред Кушнер, се консултираа со врвни директори на Волстрит за оживување на економијата на Украина. Нивните планови вклучуваат предлог украинските ветерани да го положат оружјето и да заработуваат плати на ниво на Силиконската долина, водејќи центри за податоци изградени од американски компании.

Двајцата Американци минатата недела поминаа часови со рускиот претседател Владимир Путин, инсистирајќи дека Русија мора да покаже подготвеност да се стреми кон дипломатско решение, пред да може да има корист од олеснувањето на санкциите. И европските лидери разговараа со Виткоф, а нови средби се закажани викендов во Париз и во понеделник во Берлин.