Трамп му твитна на главниот епидемиолог Фаучи: „Време е за отказ“

Американскиот претседател Доналд Трамп на Велигден јавно ја изрази својата фрустрација поради последната изјава на главниот експерт за заразни болести Антонио Фаучи, откако епидемиологот кажа дека многу повеќе животи ќе беа спасени од коронавирусот доколку земјата порано се затвореше.

Трамп ја ретвитна пораката „Време е за отказ“ и ги отфрли критиките поради спорниот иницијален одговор на пандемијата, која досега во САД уби повеќе од 22.079 лица и зарази 557.300 Американци, пренесе „Њујорк тајмс“.

Претседателот Трамп често пати не е задоволен од изјавите на Фаучи, но тоа вчера го покажа најексплицитно во пораката на Твитер што им ја ретвитна на своите 76 милиони следбеници.

Во Твитер пораката на поранешната републиканска кандидатка за Конгрсот, ДеАна Лорејн, пишува „Фаучи сега зборува дека Трамп можел да спаси повеќе животи доколку порано ги послушаше медицинските стручњаци, а тој истиот Фаучи на 29 февруари на луѓето им зборуваше дека не треба да се загрижени од коорнавирусот“. Покрај пораката таа напиша „Отказ Фаучи“.