ТРАЈАНОВ ВЕЛИ ДЕКА КОВАЧЕВСКИ Е НЕСЕРИОЗЕН Идејата за широка коалициска Влада ќе доживе колапс
Демократски сојуз наведува дека подолго време промовира и се залага за формирање на коалициска влада поддржана од сите парламентарни партии, при што ќе се почитува уставното начело за соодветна и правична застапеност на сите етнички заедници.
Во оваа насока, истакнува ДС, коалициската влада треба да направи темелни реформи и тоа:
– Прво, да донесе нов Устав, бидејќи постојниот го гуши демократскиот развој на државата и наместо граѓански концепт воспоставува поделби по етничка основа, партизација и блокада на институциите и владеење на правото.
– Второ, длабоки и суштински реформи на правосудниот систем кој е некредибилен, партизиран и корумпиран, без системски решенија за одговорност за тие што ги кршат законите.
– Трето, изградба на заокружен и ефикасен систем за борба против тешките облици на криминал, кој ги разорува институците,создава социјални разлики и го кочи развојот на државата. Во последните 20 години одлеани се над десет милијарди евра во странство од неколку поединци и компании, без да понесат одговорност и имотот да им се конфискува.
– Четврто, коренити реформи во јавната администрација, преку намалување на бројот на пратеници (од 120 на 90), намалување на бројот на министерствата (не повеќе од 12), укинување на бројните паралелни институции, како што се агенции, дирекции, регулаторни тела итн.
– Петто, создавање услови за младите да имаат можности да отворат бизнис и останат во Македонија.
Во суштина, спроведување на реформи за да се имплементираат стандардите на ЕУ, клучни за подобар живот и благосостојба за сите.
„Оваа идеја, СДСМ со наводната понуда за вклучување на опозицијата во Владата, ја злоупотреби и во целост ја искомпромитира. Во суштина се работи за неискрен пристап и класична манипулација, сѐ со цел да ја избегне одговоронста од колапсот на евроинтеграциските процеси и огромното незадоволство на граѓаните од вкупните состојби и обидот за промена на Уставот под диктат на Бугарија, без да се обезбедат реципроцитет и гаранции за македонскиот идентитет, билатералните прашања наметнати од Бугарија да не можат да се користат за нови блокади и целосна имплементација на одлуките на Судот во Стразбур, поврзани со правата на здружување на Македонците во Бугарија“, соопшти ДС.
Партијата оценува дека идејата за широка коалициска влада ќе доживе колапс поради што Владата треба да поднесе оставка и да се одржат предвремени парламентарни избори.
„Инаку, доколку Димитар Ковачевски имаше сериозен пристап, досега требаше да поднесе оставка и да започне постaпка за избор на нова влада“, додаваат од Демократски сојуз.