ТОШКОВСКИ Е ГОРД ШТО ГРАЃАНИТЕ ЗАБАВИЛЕ СО ВОЗЕЊЕТО Ќе се отвори пункт за пријавување проблеми со „Безбеден град“
Тест периодот покажува дека Македонија има сила да биде нормална земја. Граѓаните покажаа дека можат поинаку и дека сега се вистински Европјани. Намалени се бројките на сообраќајки на територија на Град Скопје, а особено со тешки телесни повреди и со смртни последици, рече министерот Тошковски.
Министерот за внатрешни работи Панче Тошковски изрази задоволство од резултатите од тест-периодот на проектот „Безбеден град“, истакнувајќи дека граѓаните значително ја намалиле брзината на возење, а бројот на сообраќајни незгоди во Скопје е во опаѓање. Единствената цел на проектот е спасување човечки животи, нагласи тој.
– Тест периодот покажува дека Македонија има сила да биде нормална земја. Горд сум што македонските граѓани покажаа дека и во тест период кога ќе се вметне едно решение, граѓаните сфатија и го забавија возењето во рамки на главниот град. Граѓаните покажаа дека можат поинаку и дека сега се вистински Европјани. Намалени се бројките на сообраќајки на територија на Град Скопје, а особено со тешки телесни повреди и со смртни последици – изјави Тошковски одговарајќи на новинарско прашање по отворање на реконструираната полициска станица во Бутел.
Тој нагласи дека почитувањето на ограничувањата на брзината е клучно за намалување на тешките последици во сообраќајот, посочувајќи ја и глобалната статистика.
– Ако ја земеме глобалната статистика, при возење со 60 километри на час скоро и да нема преживеано лице, односно од 10 повредени лица при сообраќајка сите починале. При возење со 50 километри на час од 10 поврдени преживеале само двајца и со брзина на возење од 30 километри на час од 10, преживеале 8 луѓе – рече Тошковски.
Проблемите со кои се соочуваат возачите откако се вклучија камерите на проектот „Безбеден град“ ќе можат да се пријавуваат на посебен пункт или на интернет страница. Тошковски најави дека во склоп на управните служби на МВР (кои се во МТВ), ќе се отвори пункт за пријавување на сите грешки од системот со кои граѓаните се соочиле. Освен физички, возачите ќе можат наскоро неправилностите да ги пријават и на интернет страница, а министерот најави и мобилна апликација за пријавување проблеми поврзани со „Безбеден град“.
Тошкоски рече дека се работи на отстранување на сите неправилности и оти од 1 февруари возачите свесно ќе придонесат за безбедноста во сообраќајот.
Проектот „Безбеден град“ има за цел долгорочно да придонесе кон побезбеден сообраќај и намалување на сообраќајните несреќи низ државата.