ЗАЕВ И ФИЛИПЧЕ ФАТЕНИ ВО ТЕСНО, ИМААТ СВОИ УДЕЛИ ВО БИЗНИСОТ СО КАНАБИСОТ Има ли и трет висок поранешен функционер во наркобизнисот?

Фирмата „ЦБД Медплант“, во вистинска сопственост на Тони Котев, поранешен функционер на СДСМ и близок човек на Зоран Заев и на Венко Филипче, уште од почетокот работела со пропусти, рече денеска пратеникот на ВМРО-ДПМНЕ Бране Петрушевски.

– Иако Филипче тврдеше дека во негово време сè било во ред, нашите информации велат друго. Имено, за да се складираат 30 тони дрога треба да помине процес од околу 4-5 години, што значи дека фирмата на Котев, работела незаконски од времето на Филипче и Заев. Денес, Заев и Филипче бегаат од името Тони Котев како од ѓаволот, се прават дека не го знаат, а до вчера се сликаа со него – рече Петрушевски на денешната прес-конференција.

Фирмата „ЦБД Медплант“, доби лиценца во 2020 година, токму од Заев и од Филипче, додаде Петрушевски.

– Во тоа време и Филипче и Заев сакаа да ја направат Македонија туристичка дестинација за користење на марихуана и ја промовираа продажбата на цвет од канабис. Затоа, по нивна насока во 2023 година е сменет правилникот за одгледување на марихуана – рече Петрушевски.

Затоа ли е паниката на Заев и Филипче толку голема, праша тој.

– Дали се точни нашите информации дека овие двајца имаат удел во бизнисот со канабис и се фатени во тесно? Затоа ли повиците на Заев кон поединци во царина и патувањето на Филипче кон Грција се случуваат во тој период? Дали случајно има и плус висок поранешен функционер вмешан во наркобизнисот на Заев и Филипче? Клопчето се одмотува, крајот се гледа. Јавното обвинителство да го истражи случајот до крај. Одговорност мора да има – порача пратеникот Петрушевски.