„Тиквеш“ ги исплати лозарите и инвестираше 720.000 евра во нови насади

Винарската визба „Тиквеш“ ја заврши исплатата на своите обврски кон лозарите со кои соработува за откупеното грозје од бербата во 2019 година. Исплатата е извршена кон сите индивудуални лозари и правни лица, согласно предвидената динамика за исплата и законски утврдените рокови.

Како што соопшти Винарската визба „Тиквеш“, откупени беа 22 милиони килограми грозје.

Винарската визба „Тиквеш“ со години спроведува долгорочна соработка со лозарите базирана на едукација и поддршка при примената на современи агро-технички методи и практики во одгледување и заштита на лозовите насади. Лозарите кои ги применуваат овие методи имаа загарантиран откуп на грозјето од страна на винарницата, како и дополнителни бонуси. Стратешката соработка и партнерски однос со лозарите на компанијата ѝ овозможува да го развива своето портфолио со производство на високо квалитетни вина конкурентни на светските пазари.