ТЕКСТ ЗА ПОРАНЕШНА ПРОСТИТУТКА КОЈА РАБОТИ СО ДЕЦА ЈА ПОТРЕСЕ ХРВАТСКА Морализирачка потерница на „Слободна Далмација“

Повеќе од 300 хрватски психолози ја потпишаа реакцијата на текстот објавен во „Слободна Далмација“ за психолог од Центарот за социјална помош, кој претходно била проститутка. Случајот е објавен на насловната страница на „Слободна Далмација“ како главна тема, со возбудлив наслов „Уапсената проститутка сега работи со деца како психолог“.

Текстот, потпишан од Марко Дидиќ, беше објавен на интернет и сугерира дека поранешната проститутка, сега вработена како психолог во Центарот за социјална помош, два пати паднала во полициска стапица, но потоа го скрила своето минато.

Соговорници во текстот се сплитскиот адвокат Дамир Приморац и загрепскиот психолог Мирјана Кризманиќ. Приморац потврди дека, врз основа на расположливите податоци, се што е поврзано со вработувањето на психологот во Центарот за социјална заштита е во ред и додаде дека „нема да суди дали е морално или не“. Кризманиќ, пензионирана професорка по психологија со Филозофски факултет во Загреб, заклучи дека поранешната проститутка не може да биде „морално чиста и точна“. Сепак, нема да ѝ биде забрането да биде психолог во Центарот за социјална заштита, „но со одредени проверки и услови“. На крајот од својата изјава за „Слободна Далмација“, Кризманиќ заклучи дека овој случај е доказ дека „системот е слаб“ и дека „секој може да влезе во него“, па, како што се подразбира од целиот напис, и една валкана курва.

Психолозите реагираа на написот што предизвика многу конфузија во јавноста. Според нив, целиот напис во „Слободна Далмација“ делува патријархално и согласно со католичкиот морал, па затоа не е чудно што се споменуваат и термини како „чистота“. Бидејќи, според идеологијата на Католичката црква, секој секс надвор од бракот е нечистотија, апстиненцијата до бракот, пак, се нарекува „предбрачна чистота“, што јасно подразбира дека оние кои имаат секс пред бракот се валкани.

Психологот Кризманиќ сугерира дека нејзината колешка, која има искуство во сексуална работа, всушност не може да биде психолог во Центарот за социјална заштита, бидејќи нејзиното претходно искуство ја дисквалификува од тоа. Но, рационално кажано, работите изгледаат поинаку – психолог кој има претходно искуство со сексуална работа секако може подобро да ја разбере состојбата на луѓето за кои се грижи Центарот, бидејќи и самата се занимавала со нешто што е на маргините на општеството.

„Ако живеевме во помалку патријархално и помалку лицемерно општество, ќе беше можно овој психолог – кому „Слободна Далмација“ за среќа не ѝ го објави името – да се појави јавно како психолог со претходно искуство за сексуална работа и да не биде осудена за тоа. Таа дури може да биде пофалена или барем поддржана“, коментира порталот Индекс.

Целиот напис е напишан на тој начин што вклучувањето во проституција е претставено како најлош морален камен на сопнување, но само за жените кои се занимаваат со сексуална работа, а не и за оние кои ги плаќаат за тоа. Особено перфидно е инсистирањето дека таканаречениот психолог „работи со деца“ и импликацијата дека фактот дека некогаш се занимавала со проституција целосно ја дисквалификува.

Скандалозниот напис на „Слободна Далмација“ треба да се чита како поттикнувачка и морализирачка потерница за сите сексуални работници, како и за неименуваниот психолог, кој најверојатно ќе стане уште поголема мета на озборувања во малите градови, заклучува порталот.