ТАТКО СО „ТУАРЕГ“ ГО ПРЕГАЗИЛ 6-ГОДИШНИОТ СИН ВО ТЕТОВО Детето со тешки повреди е итно пренесено во Скопје
Несреќата се случила додека 42-годишниот татко возел наназад, а поради тешката состојба детето било пренесено од Тетово во Скопје.
Шестгодишно дете било тешко повредено откако татко му го прегазил со џип движејќи се наназад во Тетово.
Несреќата се случила вo неделата, 23 август, околу 8.30 часот. Според полицијата, 42-годишниот В.С. од Тетово управувал „фолксваген туарег“ без регистарски ознаки.
Движејќи се наназад во „рикверц“, со задното тркало го прегазил својот 6-годишен син.
Детето било пренесено во Ургентниот центар во Тетово. Поради тешката здравствена состојба, лекарите итно го префрлиле во комплексот клиники „Мајка Тереза“ во Скопје.
„На 23.08.2026 во 09:50 часот од Ургентниот центар во Тетово било пријавено дека кај нив е донесено малолетно дете со сериозни повреди. Поради тешката здравствена состојба, детето било итно пренесено во комплексот клиники „Мајка Тереза“ во Скопје. По извршените проверки, утврдено е дека несреќата се случила околу 08:30 часот, кога 42-годишниот В.С. од Тетово, управувајќи патничко возило „Фолксваген Туарег“ без регистарски ознаки и движејќи се наназад, со задното тркало го прегазил својот шестгодишен син“, соопшти СВР Тетово.
Увид извршила екипа на СВР Тетово. Полицијата презема мерки за целосно расчистување на случајот и утврдување на сите околности.