ТАРАВАРИ ИМА САМО ЕДЕН ИЗБОР Здружувањето со албанската опозиција може да го спаси од политичка гилотина

Во овој период власта се служи со најсурови методи за да спречи окрупнување на албанската опозиција. Паниката во ДУИ е дека со евентуалниот премин на Таравари во Европскиот сојуз за промени, Али Ахмети ќе доживее фатален пораз во шестата изборна единица, што ќе го принуди да си замине од политиката веднаш и без одлагање.

Затоа, Арбен Таравари е под невиден притисок од две структури. Едната структура е Зијадин Села и Кренар Лога кои за да го задржат влијанието во АА инсистираат да коалицираат со ДУИ презентирајќи му на раководството дека имаат добитен пакет за претседателските, парламентарните и следните локални избори.

Наводно, Али Ахмети им ветил дека ќе ги добијат истиот број пратеници, но под услов да бидат истите кандидати. Логично е да се претпостави дека во таков случај Ахмети би добил двојна заштита, бидејќи актуелните пратеници на АА му се под контрола уште сега.

Дополнително, на Села му е ветено дека Рамиз Мерко ќе биде жртвуван и дека тој ќе стане повторно градоначалник на Струга. Втората структура која му врши силен притисок на Таравари е ДУИ и СДСМ кои го убедуваат дека албанската опозиција не може да освои повеќе од седум пратеници и дека за АА е подобро да оди во предизборна коалиција со нив затоа што така ќе добие повеќе.

Дури, СДСМ на раководството на АА им пуштал некои од нивните агенции за мерење рејтинзи да им презентираат бројки за убедување во исправноста да останат во нивното јато.

Во што е парадоксот? Арбен Таравари самиот се доведе во ситуација да има само еден избор за да се обиде политички да преживее на среден и долг рок, а тоа е по секоја цена да се здружи со Гаши, Касами и Меџити.

ДУИ и СДСМ се многу лути што Таравари кокетира со лидерите на Европскиот сојуз за промени, особено со косовскиот премиер Албин Курти. Сметаат дека дури Таравари да остане во коалиција со нив, веќе им направил голема политичка штета и непростлив грев.

Ахмети не може да му прости што пред албанскиот премиер Еди Рама и пред меѓународниот фактор прв пат неговиот авторитет е сериозно загрозен, бидејќи им ветувал дека има целосна контрола на состојбите во албанскиот политички кампус. Притоа, од високи извори во ДУИ добивме потврда дека не му веруваат на Таравари и затоа наводно смислиле сценарио за негова елиминација од политичката сцена. Затоа, не беше воопшто случајно што директно Артан Груби го обвини Таравари дека е во седиштето на ВМРО-ДПМНЕ на средба со Христијан Мицкоски, што беше експресно демантирано.

Не постои аналитичар кој не констатира дека гласачите на АА се опозициски настроени и дека седењето на оваа партија во скутот на ДУИ им го намалува бројот на гласови. Впрочем, истото се случуваше со рејтинзите на БЕСА и Алтернатива кога беа во заедничка Влада со СДСМ и ДУИ. Постојат одредени анкети кои укажуваат дека за само неколку месеци АА има драматичен пад на процентот на своите поддржувачи. Оттука, инстинктот на Таравари дека треба да се здружи со Гаши, Касами и Меџити е точен, но клучното прашање е колку е подготвен да го издржи притисокот од внатрешните поделби во партијата чиј лидер е сѐ уште.

Меѓутоа, се чини дека тој и нема голем маневарски простор. Наредбата за негова политичка егзекуција е донесена, дури и да остане во коалиција со ДУИ и СДСМ. Веќе од спин-кујните на ДУИ и СДСМ се цртаат контурите на евентуалниот обид за дискредитација на Таравари. Се зборува дека ќе му се налепи етикета дека кокетирањето со опозицијата му било само добро осмислен рецепт за издејствување подобар финансиски пазар со Ахмети. Таквите напади ќе бидат искористени од Села и Лога да се направи преврат во АА и Таравари да се испрати во политичка историја со ставање дамка на неговиот морален кредибилитет и нанесување срам на неговото семејство.

Иако, ДУИ и СДСМ упорно се обидуваа да ја пласираат тезата дека Гаши, Касами и Меџити ќе испаднат губитници ако Таравари не премине во нивниот табор, анализите покажуваат нешто сосема друго.

Ризикот од подигнување на улогата на Таравари во евентуалното симнување на ДУИ од власт се чини дека е пресметан ризик за албанската опозиција. Нивната стратегија е преку јавното декларирање дека преговараат со Таравари за нивен претседателски кандидат да ги адресираат токму гласачите на АА кои се опозициски определени и кои посакуваат опозицијата здружено да му се спротивстави на ДУИ.

Доколку ги убедат дека направиле сѐ што е во нивна моќ да направат коалиција со АА, а дека истата не се случила заради злоупотребите на власта од страна на ДУИ и СДСМ, тие веќе ќе ги имаат нивните гласачи на свое конто. Во таков случај ДУИ и СДСМ ќе ги добијат Таравари, Села и Лога ама без гласачите на АА.

Очигледно е дека оваа игра на нерви е добро пресметана од сите актери кои ја играат. Изборите ќе покажат кој смислил подобра стратегија за конечно да профитира.