Акциите на Алфабет, матичната компанија на Гугл, вчера го забележаа најголемиот еднодневен пад во историјата на компанијата. Нивната вредност падна за речиси 13 проценти, бришејќи околу 500 милијарди долари од пазарната вредност на Алфабет. Распродажбата беше предизвикана од разочарувачките деловни резултати, забавувањето на растот на приходите од интернет пребарување и растечката загриженост на инвеститорите за огромните трошоци за развој на вештачка интелигенција, објави Вол стрит џурнал.

Акциите на Aлфабет затворија на 283,82 долари, што е намалување од 12,64 проценти.

Тоа беше втората најголема еднодневна загуба на пазарна вредност за компанија во историјата на американскиот берзански пазар. Само Нвидиа забележа поголема загуба во јануари 2025 година, кога изгуби околу 593 милијарди долари од вредноста.

Падот на матичната компанија на Гугл, исто така, ги повлече надолу американските берзански индекси, особено Nasdaq, кој е фокусиран на технологијата.

Најважниот бизнис на Гугл се забавува

Инвеститорите се особено загрижени за перформансите на рекламниот бизнис на Гугл, кој со децении е главен извор на приходи и профит на компанијата.

Приходите од интернет пребарување на Гугл се зголемија за 12 проценти во третиот квартал во споредба со истиот период минатата година. Иако тоа е раст, тој е побавен отколку на почетокот на годината. Приходите од пребарување пораснаа за 19 проценти во првиот квартал и за 17 проценти во вториот.

Одделот за услуги на Гугл, кој вклучува интернет пребарување, Јутјуб и претплати, генерираше приходи од 96,3 милијарди долари, под очекувањата на аналитичарите од 98,5 милијарди долари.

Вкупните приходи на Алфабет изнесуваа 127,6 милијарди долари, што е зголемување од 25 проценти во однос на претходната година, но под очекувањата на Волстрит. Нето добивката се намали за 25 проценти, на 26,17 милијарди долари.

Послабите резултати покренаа прашања за тоа дали Гугл може да продолжи да генерира високи приходи од рекламирање, бидејќи вештачката интелигенција го менува начинот на кој луѓето го користат интернетот.

Вештачката интелигенција го загрозува деловниот модел на Гугл

Гугл се соочува со проблем кој делумно е создаден од сопствениот развој на вештачката интелигенција.

Неговото традиционално веб пребарување функционира така што им покажува на корисниците врски до веб-страници, вклучувајќи платени реклами. Огласувачите плаќаат кога корисниците кликнуваат на нивните реклами.

Но, сè повеќе корисници добиваат информации директно преку одговори генерирани од вештачка интелигенција, без да мора да се пребаруваат и отвораат други страници.

Затоа Гугл почна да го проширува својот сопствен режим на пребарување, AI Mode, кој им нуди на корисниците одговори генерирани од вештачка интелигенција наместо вообичаениот список на резултати.

Проблемот е што компанијата моментално заработува помалку од вакви пребарувања отколку од традиционалното пребарување. Филип Шиндлер, главен директор за бизнис на Гугл, потврди за време на разговор со аналитичарите дека барањата во AI Mode моментално генерираат помалку приходи од рекламирање отколку редовните пребарувања.

Ова значи дека Гугл може да забележи раст во користењето на своите услуги, а во исто време да се соочи со притисок врз приходите од рекламирање.

Гугл троши огромни суми на АИ

Додека нејзината основна дејност забавува, Алфабет инвестира огромни суми пари во центри за податоци, компјутерски чипови и ви развој на нови модели на АИ.

Компанијата пријави негативен слободен паричен тек од 9,07 милијарди долари во третиот квартал. Тоа значи дека нејзините парични расходи за инвестиции ги надминаа парите што ги генерираше од оперативните активности во текот на периодот.

Аналитичарите очекуваа слободниот паричен тек да биде близу до нула.

Во претходниот квартал, негативниот слободен паричен тек изнесуваше 5,9 милијарди долари, што покажува колку брзо се зголемуваат потребите за готовина на компанијата.

Финансискиот директор на Алфабет, Анат Ашкенази, предупреди дека капиталните трошоци значително ќе се зголемат во 2027 година. Поголемиот дел од дополнителните трошоци се поврзани со инфраструктурата потребна за вештачката интелигенција.

Ваквите трошоци беа прифатливи за инвеститорите во последните години бидејќи очекуваа силниот бизнис за пребарување на Гугл да продолжи да го финансира развојот на нови технологии. Но, најновите резултати доведоа во прашање колку долго може да функционира тој модел.

Конкуренцијата се интензивира

Дополнителен притисок врз Гугл доаѓа од компании како што се ОпенАИ и Антропик, чии системи за вештачка интелигенција сè повеќе преземаат некои од задачите за кои корисниците ги користеа пребарувачите.

ОпенАИ започна со тестирање реклами на Чет ГПТ претходно оваа година и објави дека е на добар пат да достигне 1 милијарда долари годишен приход од рекламирање.

Според Вол стрит џурнал, повеќе од 100.000 огласувачи веќе воделе кампањи на Чет ГПТ, а рекламите се достапни во 89 земји.

Сепак, експертите за дигитално рекламирање предупредуваат дека засега нема знаци за масовно поместување на буџетите за рекламирање од Гугл кон ОпенАИ.

Многу компании само го тестираат новиот рекламен канал, користејќи дополнителни средства или помали делови од нивните постоечки буџети за рекламирање.

Сепак, зголемувањето на конкуренцијата предизвикува загриженост кај инвеститорите бидејќи Гугл повеќе нема несомнена позиција во начинот на кој корисниците наоѓаат информации на интернет.

NewStreet Research проценува дека загриженоста на инвеститорите ќе продолжи сè додека Alphabet не покаже поубедливи резултати во онлајн пребарувањето и поголема способност за генерирање приходи од вештачката интелигенција. Тие проценуваат дека ова би можело да потрае до првата половина на 2027 година.

The post ГУГЛ ГО ДОЖИВЕА НАЈЛОШИОТ ДЕН ВО ИСТОРИЈАТА Акциите паднаа за речиси 13 проценти, Алфабет загуби 500 милијарди долари од вредноста appeared first on plusinfo.mk.

Судиите во шпанското фудбалско првенство повеќе нема да ги слушаме само преку свирчето. Ла Лига реши да ги испрати и пред телевизиските микрофони по натпреварите, во обид со поголема отвореност да го заштити нивниот углед.

Новината ќе почне да се применува викендов, во 11. коло од првенството, откако судиите од почетокот на сезоната веќе даваат кратки интервјуа пред почетокот на натпреварите.

Според шпанскиот весник „АС“, договорот е постигнат меѓу Ла Лига, Шпанската фудбалска федерација и здружението на судиите.

За почеток, телевизиите DAZN и Movistar+ ќе имаат право на по едно интервју со судија во секое коло. Тоа значи дека по завршувањето на натпреварите ќе зборуваат најмалку двајца судии, а не сите арбитри што суделе во колото.

Едно од првите интервјуа е предвидено по баскиското дерби меѓу Атлетик Билбао и Реал Сосиедад, кое ќе се игра в недела од 21 часот на стадионот „Сан Мамес“.

Наместо молк, одговори пред камерите

Досега, по спорните одлуки најчесто зборуваа тренерите, фудбалерите, клупските функционери и навивачите. Судиите, пак, ретко имаа можност непосредно по натпреварот јавно да ја објаснат својата страна.

Со новиот пристап, шпанските фудбалски власти сакаат да ја намалат дистанцата меѓу арбитрите и јавноста и да покажат дека судиските одлуки не мора да останат без објаснување.

Според извештаите на шпанските медиуми, договорот предвидува и колективен аудиовизуелен надомест од 500.000 евра за судиите што ќе учествуваат во телевизиските активности.

Сепак, новиот формат не значи дека секој судија ќе мора да одговара на прашања по секој натпревар. Во почетната фаза интервјуата ќе бидат ограничени на два натпревара во колото.

АИ ги избира спорните моменти

Интервјуата се само еден дел од пошироките промени со кои шпанскиот фудбал се обидува да го направи судењето поразбирливо за јавноста.

Од минатата сезона постои емисијата „Tiempo de Revisión“ („Време за преглед“), во која Судиската комисија ги анализира најспорните ситуации од натпреварите и јавно објаснува дали одлуките биле правилни.

Интересно е што од оваа сезона изборот на ситуациите за анализа ѝ е доверен на вештачка интелигенција. Наместо комисија од поранешни фудбалери и тренери, компјутерски систем ги издвојува најзначајните спорни моменти од секое коло.

Во тие анализи судиската организација може и јавно да признае дека некој арбитер погрешил.

Шпанската лига годинава воведе и официјална топка со вграден сензор, кој го регистрира моментот на допир со топката. Податоците се користат за попрецизно утврдување на ситуациите при кои се применува полуавтоматската технологија за офсајд.

Така, покрај камерите и ВАР, во шпанскиот фудбал сè поголема улога добиваат и алгоритмите.

Новите интервјуа треба да покажат дали на судиите, покрај технолошката помош, ќе им помогне и нешто многу поедноставно — можноста самите да зборуваат за своите одлуки.

The post ЌЕ СУДАТ ВО „ЛА ЛИГА“, АМА И ЌЕ ПЕАТ ПРЕД КАМЕРИТЕ Шпанија најде начин да го одбрани имиџот на судиите appeared first on plusinfo.mk.

Премиерот Христијан Мицкоски ја потврди поддршката за изградба на дата-центри во земјава, оценувајќи дека тие, заедно со вештачката интелигенција, се клучни за идниот технолошки развој.

Во гостувањето во емисијата „Само интервју“ на Канал 5 телевизија, Мицкоски рече дека поддржува дата-центри и ќе продолжи и понатаму затоа што тоа е иднината и целиот свет својот развој го гледа преку дата-центрите и вештачката интелигенција.

– Да, сум за дата-центри и ќе продолжам да бидам затоа што тоа е иднината. Затоа што денеска светот својот развој го гледа само во дата-центрите, вештачката интелигенција и нема да дозволам, прво како инженер, второ како професор, мојата земја и моите граѓани да бидат на опашката, наместо да имаат можност да бидат на челото на поворката која ќе промовира ваков тип на индустрија – потенцира премиерот.

Тој додаде дека токму заради тоа секоја можност која ќе се укаже за ваков тип на индустрија ќе биде зграпчена, како и тоа дека во моментов се работи на неколку такви инвестиции.

Во врска со противењето на опозицијата и нивните обиди да се повикаат на граѓаните, премиерот Мицкоски нагласи дека токму тие ја распродаваа земјата, како и тоа дека граѓаните не сакаат да се идентификуваат и не сакаат да имаат ништо со оваа опозиција.

The post ДАТА-ЦЕНТРИ И ВЕШТАЧКА ИНТЕЛИГЕНЦИЈА, ТОА Е ИДНИНАТА Мицкоски најави неколку инвестиции во високата технологија appeared first on plusinfo.mk.

Додека инвеститори ширум светот со вознемиреност ги гледаат стотиците милијарди долари што се вложуваат во вештачката интелигенција, токму она што сите се плашат се случи во Кина. Технолошкиот меур таму не само што почна да се издишува, туку веќе пукна, објавија Ројтерс и Футуризам.

480 милијарди долари збришани за помалку од 4 месеци

За помалку од четири месеци, берзанскиот индекс STAR50, кој ги вклучува водечките производители на чипови и компаниите за вештачка интелигенција во Кина, падна за дури 40 проценти. Неверојатни 480 милијарди долари пазарна вредност беа збришани од берзата практично преку ноќ, а поширокиот индекс на највредните компании во Кина падна за околу 20 проценти од своите јунски максимуми.

– Берзанскиот пазар се претвори во диви шпекулации. А сега го гледаме како пука тој меур – изјави за Ројтерс Донг Баожен, менаџер на инвестициски фонд со седиште во Пекинг.

Граѓаните ги вложија своите заштеди и останаа без пари

Овој ненадеен пад е особено болен бидејќи акциите поврзани со вештачката интелигенција сочинуваа дури 42 проценти од вкупната вредност на кинескиот пазар, а учествуваа со повеќе од половина од целиот промет на берзата. За разлика од западните пазари , каде доминираат големи пензиски и инвестициски фондови, во Кина огромен дел го сочинуваат мали, обични граѓани кои веруваа во ветувањата за технолошки бум и ги инвестираа своите заштеди.

Еден од најновите примери е производителот на роботи Unitree. Интересот на граѓаните да ги купат неговите акции на дебито на берзата во август беше неверојатни 8.000 пати поголем од понудата. Денес, само неколку месеци подоцна, вредноста на истите тие акции се преполови.

Производителите на чипови исто така минуваат низ слична ситуација. Акциите на CXMT изгубија повеќе од една четвртина од својата вредност за само еден месец, додека MetaX и Moore Threads, кои скокнаа за 700 проценти откако се појавија на берзата минатата година, изгубија половина од својата вредност од јули. Производителите на оптички компоненти за центри за податоци, како што е Zhongji Innolight, паднаа за дури 60 проценти.

Санкциите и забраните на САД ги погодија кинеските компании

За разлика од американскиот технолошки индекс Nasdaq, кој падна само за 6 проценти од својот неодамнешен максимум, кинеските компании се соочија со специфични проблеми. Американските власти сè повеќе ја затвораат вратата за кинескиот хардвер и подготвуваат забрани за употреба на нивните компоненти во западните центри за податоци, прекинувајќи го пристапот на кинеските играчи до најбогатите клиенти.

– Преголемото нагласување на технологијата доведе до сериозно нарушување на пазарот. Огромен меур се формираше во еден сектор, додека парите беа целосно исцицани од сите други гранки на економијата – објаснува Лео Ванг, партнер во Qianchuang Capital со седиште во Пекинг.

Чен Веншенг, мал бизнисмен од јужна Кина, рече дека влегол на берзата убеден дека државата и нејзините фондови стојат зад тоа. Денес, тој и неговите пријатели само ги собираат своите загуби и ги префрлаат преостанатите пари во безбедни обврзници и во злато, разочарани што проектот спонзориран од Пекинг заврши со целосен колапс.

Дали ова е предвесник на она што го чека Западот?

Многу економски експерти предупредуваат дека кинескиот крах не е изолиран случај, туку јасен сигнал за тоа што ги очекува западните берзи. Имено, фундаменталниот проблем е потполно ист на двете страни од светот: компаниите инвестираат огромни суми пари во опрема и сервери, додека реалната побарувачка и профит од производите на вештачката интелигенција сè уште не постојат.

Обемот на нефинансираните трошоци е видлив и во Америка. Една од водечките светски лаборатории за вештачка интелигенција, Антопик, неодамна призна загуби од дури 80 милијарди долари во своите IPO пријави, со планови да потроши уште 1 трилион долари за центри за податоци во следните 10 години. Ваквите астрономски бројки го отежнуваат сè повеќе криењето на фактот дека дури и најголемите играчи на пазарот немаат идеја како да го направат бизнисот профитабилен.

– Сите производители на чипови и добавувачи на опрема за вештачка интелигенција на крајот ќе завршат во ценовна војна и стеснување на маржите. Нема исклучоци. Секој меур на берзата на крајот мора да пукне – заклучи кинескиот фонд менаџер Ванг Жуо.

The post ПУКА МЕУРОТ НА ВЕШТАЧКАТА ИНТЕЛИГЕНЦИЈА НА БЕРЗАТА ВО КИНА Дали ова е знак за тоа што го чека Западот? appeared first on plusinfo.mk.

Вештачката интелигенција сè повеќе го олеснува секојдневието, но има и своја мрачна страна. Интернетот станува уште поопасно место, особено за децата и младите, кои се соочуваат со нови облици на дигитално насилство.

Со помош на алатките за вештачка интелигенција, фотографиите на деца можат да се изменат и да се претворат во содржина што тие никогаш не ја создале ниту сакале да ја објават. Фотографијата дури не мора да биде јавно достапна на социјалните мрежи – доволно е некој да ја добил во доверба.

Една фотографија може да стане средство за уцена

За создавање ваква содржина веќе не е потребно напредно техничко знаење. Со неколку едноставни чекори, постојна фотографија може да се претвори во лажна сексуализирана слика или видео.

Таквата содржина може да се користи за врсничко насилство, исмевање, заплашување и уцена. Возрасните сторители, на пример, можат да се закануваат дека ќе објават компромитирачки материјал доколку детето не испрати дополнителни фотографии, не плати пари или не направи нешто против своја волја.

Во вакви случаи, не е пресудно дали фотографијата е вистинска. Доволно е да изгледа уверливо за да предизвика страв, срам и чувство на беспомошност кај жртвата.

Лажната содржина остава вистински последици

Вештачката интелигенција создава нов проблем и за родителите и за институциите. Децата може да се плашат дека никој нема да им поверува, додека возрасните мора да утврдат дали содржината е автентична и како да го заштитат детето.

Дополнителна опасност е брзото ширење на материјалите. Дури и кога некоја фотографија ќе биде отстранета, некој можеби веќе ја зачувал, направил снимка од екранот или ја испратил на други лица.

Насилството не завршува кога детето ќе ја напушти училишната клупа или ќе се врати дома. Заканите, пораките и вознемирувачките содржини можат да стигнат во секое време.

Што треба да направи детето ако е жртва на онлајн насилство и повеќе на оваа тема прочитајте на „Мајка и дете“.

The post НОВА ЗАКАНА ЗА ДЕЦАТА НА ИНТЕРНЕТ Како вештачката интелигенција отвора нови можности за злоупотреба? appeared first on plusinfo.mk.

Чет-ботот „Грок“ во сопственост на Илон Маск ги објави првите 7 минути од филмската верзија на „Одисеја“ создадена со помош на вештачка интелигенција.

Филмот е реализиран во соработка со компанијата „Вондер студиос“ и режисерот Дејв Вокер.

Објавената видеоснимка „Грок“ ја претстави како прва епизода од најавениот серијал „Одисеја“.

Маск претходно ја критикуваше неодамна објавената филмска адаптација на „Одисеја“ во режија на Кристофер Нолан, меѓу другото, поради изборот на актери, а најави и создавање сопствена верзија за која тврдеше дека ќе биде поверна на епот на Хомер.

На одредени места снимката изгледа доволно реалистично за гледачот да помисли дека навистина гледа филм со актери на море. Сепак, според дел од критичарите, видеото не успева да ги долови уметничката вредност и емоционалната длабочина на ликовите, ниту да создаде интерес како филмовите снимени со актери во реален амбиент.

Watch Episode 1 of our Odyssey series made with Grok Imagine.

Let us know in the comments if you’d like a full breakdown of how it was done!

Creative collaboration with @WonderStudiosX and director Dev Walker @glumlot_ https://t.co/xpgpkqSCpq

— Grok Imagine (@imagine) October 23, 2026

The post 🎥 ИЛОН МАСК ОБЈАВИ СВОЈА ВЕРЗИЈА НА „ОДИСЕЈА“ Филмот е комплетно генериран од вештачка интелигенција appeared first on plusinfo.mk.

Една К-поп група остана без своја членка откако на социјалните мрежи беше објавено дека е бремена и привремено ќе се повлече од музичките активности. Веста предизвика огромно внимание, но има еден поголем проблем: пејачката Мити воопшто не е вистинска личност. Таа е виртуелен лик создаден со помош на вештачка интелигенција, дел од кинеската група „Бејбиквин“ (BABYQUEEN).

Приказната стана вирална на кинеските социјални мрежи, а темата на платформата Веибо собра повеќе од 78 милиони прегледи. Она што почна како објава за бременост и привремено повлекување од сцената, набргу се претвори во расправа за границите на виртуелните личности и за тоа колку далеку можат да одат нивните креатори за да привлечат внимание.

Пејачката побарала приватност пред породувањето

На 12 октомври на профилот на групата била објавена информација дека Мити ќе ги прекине активностите поради бременоста и подготовките за породување. Во соопштението, објавено во име на фиктивната издавачка куќа „Бејбипуси ентертејнмент“ (BABYPVSSY Entertainment), било наведено дека одлуката била донесена по разговори со другите членки и тимот.

Следниот ден била објавена и порака напишана од перспектива на самата Мити, со фотографија на која виртуелната пејачка лежи во кревет во розова пижама. Таа наводно побарала од обожавателите да го почитуваат нејзиниот приватен живот и да не шпекулираат за околностите околу бременоста.

Реакциите биле бројни. Некои се прашувале како може лик создаден со вештачка интелигенција да забремени, други се шегувале со прашањето кој е таткото, а дел од публиката се сомневал дека станува збор за необичен маркетиншки потег.

 

View this post on Instagram

 

A post shared by Sixth Tone (@sixthtone)

Креаторките признале дека ја измислиле бременоста

Вистината излегла на виделина откако девојките што стојат зад проектот објавиле објаснување. Тие признале дека Мити не е бремена и дека приказната ја измислиле затоа што им станало премногу напорно да управуваат со пет виртуелни пејачки.

– Ние сме само неколку девојки кои го сакаат К-попот и сè уште сме студентки – порачале креаторките, објаснувајќи дека создавањето содржини и одржувањето на различните виртуелни личности им одземало премногу време.

Групата „Бејбиквин“ се појавила во септември годинава, инспирирана од јужнокорејската музичка сцена. Секоја од петте виртуелни членки имала сопствен идентитет и профили на социјалните мрежи, каде што биле претставувани како вистински музички ѕвезди. Зад проектот не стои голема музичка компанија, туку група студентки кои го започнале истиот од љубов кон К-попот.

Креаторките тврделе дека досега не заработиле пари од проектот. По бранот критики, признале дека приказната за бременоста не била соодветен начин да се објасни повлекувањето на една од виртуелните членки.

Од шеги до критики и интернет-вознемирување

Необичната приказна се проширила и на Редит, каде што корисниците почнале да се шегуваат со ситуацијата. Некои коментираат дека креаторките можеле да смислат покреативно објаснување за заминувањето на виртуелната пејачка, наместо да измислат бременост.

Други се прашувале дали навистина е толку тешко да се управува со личности што не постојат, додека дел од коментарите ја споредувале ситуацијата со научнофантастични серии во кои виртуелните ликови почнуваат да се однесуваат како вистински луѓе.

Но, откако се појавиле информации дека креаторките биле изложени на навреди, лични напади и вознемирување на интернет, дел од корисниците застанале во нивна одбрана. Иако ја критикувале нивната одлука да ја искористат бременоста како дел од измислена приказна, сметале дека тоа не е оправдување за нападите врз девојките.

Мити можеби ќе продолжи како инфлуенсерка за мајчинство

И покрај повлекувањето од групата, виртуелната Мити можеби нема засекогаш да исчезне од интернетот. Меѓу идеите што ги споменале креаторките е таа во иднина да продолжи како актерка или како виртуелна инфлуенсерка што ќе објавува содржини поврзани со бременоста, мајчинството и производите за бебиња.

Така, ликот кој бил отстранет од музичката група со измислена приказна за бременост би можел да продолжи да гради кариера токму врз таа приказна.

Случајот отвори и пошироко прашање за виртуелните ѕвезди, кои сè почесто имаат сопствени профили, измислени биографии и следбеници што ги доживуваат како вистински личности. Кога нивните креатори им доделуваат човечки искуства, како љубовни врски, болести или бременост, границата меѓу забавата и манипулацијата со публиката станува сè понејасна.

The post ВИРТУЕЛНА БРЕМЕНОСТ НА ВИРТУЕЛНА ПЕЈАЧКА ОД ВИРТУЕЛЕН БЕНД Милиони луѓе зборуваат за бременоста на К-поп пејачка која воопшто не постои appeared first on plusinfo.mk.

Бројот на новинари во Германија би можел да се намали за дури 50 отсто до 2035 година, покажува нова студија на медиумски експерти.

Во студијата изготвена по нарачка на германските јавни радиотелевизии АРД и ЗДФ и радиото Дојчландрадио, се посочува дека намалувањето на публиката и приходите на медиумските куќи, во комбинација со подемот на вештачката интелигенција и растечката моќ на технолошките компании, би можело да доведе до значително намалување на бројот новинарски работни места.

Студијата, претставена на конференцијата „Медиа дејс“ во Минхен, предвидува 4 сценарија според кои бројот на новинари до средината на следната деценија би можел да се намали за 12 до 50 отсто. Според извештајот, во Германија во 2023 година имало околу 40.000 професионални новинари, а во најнеповолното сценарио, до 2035 година би останале околу 20.000.

Истражувачите истакнуваат дека исходот ќе зависи од тоа до кој степен креаторите на политиките ќе ги регулираат големите технолошки компании и дали медиумските организации ќе ја зајакнат меѓусебната соработка.

Во студијата се наведува дека падот на гледаноста и приходите од рекламирање веројатно сериозно ќе ги погоди германските медиумски куќи во следната деценија. До 2035 година, публиката би можела да се намали за 18 до 47 отсто, додека приходите од рекламирање би можеле да опаднат за 10 до 43 отсто.

Се очекува големите технолошки компании и давателите на услуги засновани на вештачка интелигенција да продолжат да растат, што ќе им го отежне на весниците, телевизиските куќи и другите традиционални медиумски компании директниот пристап до публиката и остварувањето приходи од сопствените содржини.

Особено неповолни се изгледите во сценариото што истражувачите го нарекуваат „преземање од големите технолошки компании“ (Big Tech Takeover), во кое тие компании би доминирале на медиумскиот пазар.

Студијата ја изработиле истражувачите Кристијан Забел од Техничкиот универзитет во Келн и Улрике Рон од Универзитетот во Талин, врз основа на интервјуа со 34 експерти од академската заедница, рекламната индустрија, продукцијата и областа на медиумските политики.

The post БРОЈОТ НА НОВИНАРИ ВО ГЕРМАНИЈА ЌЕ СЕ ПРЕПОЛОВИ ДО 2035 ГОДИНА Медиумските куќи ја губат трката со големите технолошки компании appeared first on plusinfo.mk.

Кој е најпознатиот човек на светот? Одговорот зависи од тоа дали славата ја мериме според бројот на следбеници на социјалните мрежи, влијанието врз светските настани или препознатливоста низ генерациите. Токму ова прашање предизвика интерес на интернет, откако корисник на социјалната мрежа Икс побарал од вештачката интелигенција „Грок“ да ја отстрани најпознатата личност од една фотографија.

На фотографијата се наоѓаат осуммина познати луѓе: американскиот претседател Доналд Трамп, милијардерот Илон Маск, фудбалерите Кристијано Роналдо и Лајонел Меси, музичката легенда Мајкл Џексон, папата Лав XIV, јутјуберот MrBeast и нигерискиот милијардер Алико Данготе.

– Еј, Грок, отстрани ја најпознатата личност од оваа фотографија! – гласи барањето упатено до вештачката интелигенција.

Hey @grok remove the most famous person here !! https://t.co/dVIE5DwkPF

— Isla (@xislayy) October 25, 2026

Одговорот бил Кристијано Роналдо. „Грок“ го избрал португалскиот фудбалер, образложувајќи дека неодамнешните глобални рангирања на популарноста го поставуваат на врвот меѓу луѓето на фотографијата.

@xislayy Cristiano Ronaldo removed. Recent global fame rankings put him at the top among those shown. https://t.co/sZwEEB0AK9

— Grok (@grok) October 25, 2026

Изборот брзо привлече внимание, но и отвори нова дебата: дали бројот на следбеници навистина ја одредува светската слава?

Роналдо има повеќе од милијарда следбеници на различни социјални мрежи, што го прави исклучително влијателен во дигиталниот свет. Неговата популарност одамна ги надминува границите на фудбалот, а го препознаваат и луѓе кои воопшто не го следат спортот.

Сепак, дел од корисниците сметаат дека Мајкл Џексон би можел да биде посилен кандидат за титулата најпозната личност. Музичарот, кој почина во 2009 година, со децении беше една од најголемите ѕвезди на планетата, а неговата музика и денес ја слушаат милиони луѓе.

Доналд Трамп, пак, има поинаков вид препознатливост. Како претседател на САД, тој постојано е присутен во светските вести, а неговите политички одлуки влијаат и врз луѓето ширум светот.

На фотографијата се и Лајонел Меси, кој има огромна база на обожаватели низ светот, папата Лав XIV, чија функција е поврзана со Католичката црква и нејзините верници, како и Илон Маск, кој стана глобално познат преку своите технолошки компании и активностите на социјалните мрежи.

MrBeast, еден од најпопуларните јутјубери во светот, има огромно влијание врз помладата публика, додека Алико Данготе е едно од најпознатите имиња во африканскиот бизнис, иако неговата слава е помалку распространета надвор од континентот.

Токму затоа одговорот на „Грок“ не мора да значи дека Роналдо е неспорно најпознатиот човек на планетата. Популарноста на социјалните мрежи е само еден од начините да се измери славата, а историското влијание, политичката моќ и препознатливоста кај различни генерации се други важни фактори.

Експериментот покажува колку е тешко дури и за вештачката интелигенција да одговори на навидум едноставно прашање кога не постои единствен критериум за споредба. А кога станува збор за Роналдо, Меси, Мајкл Џексон и Трамп, веројатно секој има свој фаворит.

The post ЕКСПЕРИМЕНТ СО ВЕШТАЧКАTA ИНТЕЛИГЕНЦИЈА НА МАСК Еј, Грок, отстрани го најпознатиот човек на фотографијата! appeared first on plusinfo.mk.

Мајкрософт нуди програми за доброволно заминување со отпремнини за околу 60.000 вработени, што претставува приближно 27 проценти од нејзината глобална работна сила според последните објавени податоци. Сепак, тоа не значи дека толку луѓе ќе ја напуштат компанијата, туку дека имаат можност да ја прифатат понудата.

Технолошката компанија на овој начин настојува да ги контролира трошоците додека продолжува со огромните вложувања во вештачката интелигенција. За 2026 година таа предвидела капитални расходи од 175 милијарди долари, главно поврзани со инфраструктурата за ВИ, центрите за податоци и чиповите.

Понудата, објавена на 26 октомври, се однесува на вработени во САД, Канада, Велика Британија и Индија, во организациските единици што учествуваат во програмата. Меѓу нив се секторите за развој на решенија за вештачка интелигенција, платформата „Копилот“, финансиите, човечките ресурси, „Иксбокс“ и „Виндоус плус уреди“. Од програмата се изземени маркетингот, комерцијалниот сектор и безбедноста, а не учествуваат ниту некои инженерски групи и корпоративни оддели.

Право на понудата имаат вработени од различни хиерархиски нивоа, вклучувајќи и дел од високите раководители, до тнр. ниво 70 во интерниот систем на компанијата, вклучувајќи и дел од раководителите. Според објавените информации, нема услов за возраст или стаж, а работната успешност не е критериум за учество. Вработените треба да одлучат до првата недела на декември.

Надоместот е сличен на редовниот пакет при прекин на работниот однос и зависи од платата, стажот и нивото на работното место. Вклучува и одредени поволности, како здравствено осигурување за ограничен период и помош при преминување на ново работно место.

Ова е втор ваков доброволен пакет што Мајкрософт го нуди годинава. Во пролетта компанијата им понуди доброволно пензионирање на околу 8.750 вработени во САД, а околу 30 проценти од нив ја прифатија понудата. Во јули, пак, најави укинување на 4.800 работни места, во рамките на поширокото преструктурирање, кое особено го погоди одделот за видеоигри „Иксбокс“.

The post МАЈКРОСОФТ НУДИ ОТПРЕМНИНИ ЗА 60.000 ВРАБОТЕНИ Компанијата ги намалува трошоците додека вложува милијарди долари во вештачката интелигенција appeared first on plusinfo.mk.