Канцеларијата на државниот обвинител на Тексас поднесе тужба против „Нестле“ и нејзината американска подружница „Гербер“, обвинувајќи ги дека ги доведоа во заблуда родителите во врска со безбедноста на храната за бебиња и присуството на токсични тешки метали во нивните производи.

Според тужбата, „Гербер“ користел 67 серии оризово брашно помеѓу 2017 и 2019 година што содржеле повеќе од девет пати повисоки вредности од федералната граница за арсен во флаширана вода, објави „Свис Инфо“.

Канцеларијата на државниот обвинител на Тексас соопшти дека во истиот период, морковите што ги користела компанијата содржеле нивоа на кадмиум до 17 пати повисоки од ограничувањето за флаширана вода, додека слаткиот компир содржел нивоа на олово речиси десет пати повисоки од тоа ниво.

Обвинителството, исто така, тврди дека „Гербер“ ретко тестира производи за жива и дека во поголемиот дел од периодот што се разгледува, тестирал поединечни состојки, а не готови производи за бебиња.

Според обвинителството, државна лабораторија во Алјаска, исто така, пронашла два примерока од оризови житарки „Гербер“ со концентрации на арсен над федералната граница во 2021 година.

Обвинителството тврди дека компанијата не ги повлекла производите ниту ги предупредила потрошувачите поради присуството на тешки метали туку продолжил да ги продава.

„Компанијата претходно повлекла производи поради присуство на пластика и опасност од задушување, но никогаш поради тешки метали“, забележува државниот обвинител.

Американската подружница на швајцарскиот прехранбен гигант „Нестле“, „Гербер“, им вети на родителите дека нејзината храна за бебиња е безбедна и предмет на строги контроли, иако, според државниот обвинител на Тексас, Кен Пакстон, внатрешните тестови на компанијата покажаа присуство на токсични метали.

– Кога компанијата дава ветувања за храна за бебиња, моја должност е да ги повикам на одговорност и да се осигурам дека тие ветувања ги исполнуваат – рече Пакстон.

Оттогаш „Гербер“ почна да објавува резултати од тестовите преку QR кодови на пакувањето.

Сепак, Пакстон тврди дека количините на тешки метали во производите останале непроменети, како и тврдењата за нивната безбедност на предната страна од пакувањето.

Случајот доаѓа во време на широка дебата во САД за присуството на арсен, олово, кадмиум и жива во храната за бебиња.

Тешките метали можат да претставуваат ризик за развојот на нервниот систем кај децата, а американските регулатори претходно разгледаа мерки за намалување на нивното присуство во производите наменети за најмладите.

Федералните здравствени агенции на САД ги рангираат арсенот, оловото и живата како прва, втора и трета потенцијално најопасна супстанца за здравјето на луѓето.

Обвинителот, исто така, истакна дека медицинската токсикологија не утврдила безбедна граница за изложеност на олово и неоргански арсен кај доенчиња под која овие супстанци би можеле да се сметаат за целосно безопасни.

The post ОТКРИЕНИ ТЕШКИ МЕТАЛИ ВО ХРАНАТА ЗА БЕБИЊА Тексас ги тужи „Нестле“ и американската подружница „Гербер“ appeared first on plusinfo.mk.

Фудбалерот на Манчестер сити, Ерлинг Халанд, покрена тужба против норвешката авиокомпанија „Норвежиан ер шатл“ поради реклама во која компанијата дигитално ја додала неговата препознатлива фризура на фотографија од авион. Спорот се однесува на користење на неговиот лик и заштитените комерцијални обележја без дозвола, пишува „Дејли мејл“.

Халанд со години беше препознатлив по русата коса врзана во опашка, но на почетокот на оваа сезона се потстрижа. Спорната реклама била објавена на социјалните мрежи за време на Светското првенство, а на фотографијата се гледал авион со дигитално додадена фризура на норвешкиот напаѓач и пораката: Никогаш не сме се чувствувале повеќе Норвежани.  Објавата подоцна била отстранета.

Портпаролката на компанијата, Катарина Соли, изјавила дека не разбираат зошто случајот завршил на суд. Таа објаснила дека и тие, како и многу други во Норвешка, ја поддржувале репрезентацијата за време на првенството и дека објавите биле спонтани, инспирирани од трендовите на социјалните мрежи.

– Жал ни е што нашата поддршка заврши со тужба, но се надеваме на разумен дијалог за и во иднина заедно да можеме да ги поддржуваме нашите спортски херои – изјавила Соли.

Адвокатот на Халанд, Томас Хаген, смета дека случајот е јасен. Тој тврди дека авиокомпанијата незаконски ги искористила препознатливите обележја на фудбалерот за да продава авионски билети за време на завршницата на Светското првенство.

Халанд постигна седум гола за норвешката репрезентација на првенството, на кое Норвешка стигна до четвртфиналето. Според претходните медиумски извештаи, судската средба во Осло е закажана за 9 октомври, а авиокомпанијата се надева дека спорот ќе може да се реши со договор.

The post ХАЛАНД ЈА ТУЖИ АВИОКОМПАНИЈАТА НОРВЕЖИАН ПОРАДИ РЕКЛАМА СО НЕГОВАТА ФРИЗУРА „Никогаш не сме се чувствувале повеќе Норвежани“ appeared first on plusinfo.mk.

Фудбалерот на Манчестер сити, Ерлинг Халанд, поднел тужба против „Норвиџен ер шатл“ поради реклама со авион на кој дигитално му била додадена неговата препознатлива фризура, пренесува Индекс.

Компанијата ја објавила фотографијата на Инстаграм и на Тикток за време на Светското првенство.

Пораката гласела: „Никогаш не сме изгледале понорвешки“.

Адвокатите на Халанд тврдат дека неговите комерцијални обележја биле искористени без дозвола за рекламирање авионски билети. Тужбата ја поднеле пред судот во Осло.

Авиокомпанијата ја отстранила рекламата, но смета дека станувало збор за безопасна шега.

– Штета е што навивањето беше дочекано со тужби – изјавил портпаролот Ејвинд Хамер Мире.

Рочиштето преку видеоврска е закажано за 9 октомври.

The post АВИОНОТ ПОЛЕТАЛ „СО ФРИЗУРАТА“ НА ХАЛАНД, РЕКЛАМАТА СЛЕТА НА СУД „Никогаш не сме изгледале понорвешки“ appeared first on plusinfo.mk.

Американскиот технолошки гигант  Meтa им оневозможи на профилите на Фејсбук и Инстаграм на бразилскиот претседател Луиз Инасио Лула да Силва да објавуваат реклами, без објаснување, и тоа на десетина дена пред изборите, објави бразилскиот медиум „Бразил вајр“ (Brasil Wire), кој го става случајот во контекст на она што го нарекува „растечкаo американско мешање во претстојните избори во Бразил“.

Истиот напис тврди дека кампањата на претседателот поднела жалба и се заканила со правни мерки, нарекувајќи го блокирањето уште еден пример за американско мешање и манипулација. Според страницата, кампањата на Лула веднаш поднела жалба и побарала сметката веднаш да се врати во функција, како и објаснување, предупредувајќи дека ќе поднесе тужба доколку Meтa не ги исполни барањата.

Според штабот на де Силва, Meтa го прекршила бразилскиот изборен закон со одобрување на 87 проценти од доставените реклами на неговите ривали, генерирани со вештачка интелигенција, кои ширеле изборни дезинформации, поттикнувале насилство и ги напаѓале пратениците со говор на омраза. Цитираниот текст на „Бразил вајр“ наведува дека рекламите доаѓале од американски и други странски профили.

The post МЕТА МУ ГИ БЛОКИРА ПРОФИЛИТЕ НА БРАЗИЛСКИОТ ПРЕТСЕДАТЕЛ ПРЕД ИЗБОРИ Лула де Силва најави тужба пред американските судови appeared first on plusinfo.mk.

Поранешната Мис Јамајка Габриел Хенри ја тужи организацијата Мис Универзум поради тешките повреди што ги заработи при падот од сцената на натпреварувањето во Бангкок во ноември минатата година. Тужбата е поднесена на 21 септември во Врховниот суд во Делавер, а покрај организацијата Мис Универзум како тужени се наведени и компаниите JKN Legacy Inc. и Legacy Holding Group USA.

Инцидентот се случи на 19 ноември 2025 година, за време на прелиминарниот дел од 74. избор за Мис Универзум. Хенри, која ја претставуваше Јамајка, излезе на сцената во впечатлива портокалова вечерна тоалета. Додека се движеше по сцената и следеше кореографија што претходно ја вежбала, одеднаш пропадна низ отвор на работ од сцената. Снимката брзо се прошири на социјалните мрежи, а на други снимки се гледа како медицински екипи ја изнесуваат на носилка.

Според нејзината тужба, Хенри паднала од височина од околу метар и половина низ „необележан и незаштитен отвор“ во кој имало опрема за осветлување и бетон. Таа тврди и дека силното сценско осветлување ѝ го отежнувало гледањето, а во тужбата наведува дека и други натпреварувачки претходно изразиле загриженост во врска со осветлувањето и конструкцијата на сцената.

По падот Хенри ја изгубила свеста и била пренесена во болницата „Паоло Рангсит“ во близина на Бангкок, каде што поминала извесно време на интензивна нега. Организацијата Мис Универзум во декември соопшти дека претрпела интракранијално крвавење со губење на свеста, скршеница, повреди на лицето и други сериозни повреди. Според податоците од тужбата, таа била хоспитализирана од 19 ноември до 10 декември.

Хенри, која е лекарка и специјализантка по офталмологија, во новото интервју открива колку тешко се одвивало закрепнувањето. Во месеците по несреќата повторно учела и најосновни работи и минувала низ болници и рехабилитација. Таа вели дека повредата на мозокот трајно го променила текот на нејзиниот живот, а по несреќата не можела да продолжи со медицинската специјализација. Според тужбата, и понатаму има невролошки и когнитивни симптоми и потреба од понатамошно лекување и контроли.

– Тоа е едно од најтрауматичните нешта што ми се случиле. Не би му го посакала на најлошиот непријател – изјавила Хенри за ABC News, опишувајќи го чувството по несреќата. Таа раскажала и дека долго време ѝ било потребно повторно да почувствува дека тоа е нејзиното тело и дека „сè уште е тука“.

Во тужбата се наведуваат пет точки, меѓу кои небрежност, одговорност за безбедноста на просторот, небрежно ангажирање и надзор и нанесување емоционална болка. Хенри бара надомест за медицинските трошоци, рехабилитацијата, емоционалната болка, изгубената заработка и професионалните можности.

Од организацијата Мис Универзум велат дека сè уште не ја добиле официјално тужбата и затоа не можат да ги коментираат наводите што не ги виделе. Во нивното соопштение се наведува и дека за продукцијата на минатогодишниот избор во Тајланд, вклучувајќи ги местото, сцената и безбедноста на локацијата, биле одговорни локалните организатори MGI и Miss Universe Thailand. Организацијата тврди дека, откако локалните организатори не ги покриле болничките трошоци, таа ги платила лекувањето и рехабилитацијата на Хенри.

Хенри по несреќата речиси целосно се повлече од јавноста, но годинава постепено се враќа. Во мај се појави на хуманитарен настан во Атланта, а во август се врати на сцената на Мис Универзум Јамајка за да ја круниса својата наследничка. Таа сега вели дека закрепнувањето сè уште трае и дека се обидува постепено да продолжи со кариерата, но со изменет распоред и постојана медицинска поддршка.

The post ПОРАНЕШНАТА МИС НА ЈАМАЈКА ДОЖИВЕА ХОРОР НА НАТПРЕВАРОТ ЗА МИС УНИВЕРЗУМ „Тоа засекогаш ми го смени животот“ appeared first on plusinfo.mk.

Портпаролот на ВМРО-ДПМНЕ Валентин Манасиевски беше гостин во емисијата „Колегиум“, на телевизија Алфа и се осврна на темата за поранешниот министер за земјоделие, Љупчо Николовски, откако тој побара извинување за неговите изјави. Тој се осврна и на наодот кој Николовски го направил и постави прашања околу неговата поврзаност со СДСМ, како и за околностите во кои бил изготвен наодот.

– Таа е таа клапа, на Зоран Заев, на Венко Филипче, на Љупчо Николовски. Тоа е тоа трио кое што го води СДСМ. Тој упати барање за извинување кон мене, од одредени прес-конференции, кои што според него се невистинити. Тоа ќе си го проследат и правосудните органи. Тој не е надлежен да кажува кој кажува вистини, кој кажува лаги, си има институции државата и тие ќе си постапат – рече Манасиевски.

Манасиевски истакна дека не прифатил да му се извини, бидејќи, како што вели, неговите изјави се однесувале на конкретни прашања поврзани со стоковите резерви.

– Секако дека не му се извинив. Затоа што моите прес-конференции му нанеле него душевна болка, а тоа е затоа што се има случено отпис на кусокот на стоковите резерви, околу 2.000 тона жито и тоа го имаат одобрено на владина седница – кажа Манасиевски.

Манасиевски се повика на јавно достапни податоци поврзани со евиденцијата на стокоите резерви, при што посочи дека според информациите со кои располага, до 2019 година не бил евидентиран кусок на жито. Оттука, тој ја постави временската рамка во која, според него, можел да настане кусокот и ја поврзува со периодот кога Љупчо Николовски бил министер за земјоделство, а потоа и вицепремиер.

– Откако се случува тој отпис, односно известување до владата, кое што тие го потпишуваат на владина седница, од тоа се случува оној најголем грант дотогаш од историјата од ИПАРД програмата од 1,4 милиони евра на фирмата „Трго продукт“, или попозната по брендот „Мамас“ на Заеви, таа фирма добива од ИПАРД-програмата 1,4 милиони евра грант – истакна Манасиевски и додаде:

– Моето прашање кое што го поставив до Љупчо Николовски е дали е ова награда за него, затоа што овие му отпишале кусок, односно Заеви и Филипче, дали е награда за Зоран Заев овој грант од 1,4 милиони евра, прашање кое тој секако не го одговори, односно упати тужба за ивнинување од мене бидејќи јас сум го клеветел и тоа му нанело душевна болка.

Манасиевски го отвори и прашањето поврзано со вештиот наод кој го направил Николовски и добил мислење од докторот Стојан Бајрактаров, кој е член на СДСМ, како и повеќекратен донатор на СДСМ, токму кога Љупчо Николовски ја имал функцијата генерален секретар на партијата.

– Тука има директни индиции дека нешто можеби е инсценирано, и јас тоа го прашав Љупчо Николовски, денеска на прес-конференцијата. Дали докторот Стојан Бајрактаров по барање на Љупчо Николовски изготвил можеби лажен извештај за тоа. Станува збор за повеќекратно донирање на суми на пари, дали се големи или мали, тоа сега јас не можам да кажам. Сепак е неколкукратно и токму во време кога Николовски е генрален секретар на партијата, токму во времето кога Љупчо Николовски е член на СДСМ, на владина седница кога ги бираат директорите на државните клиники, токму со неговиот глас и останатите членови на владата, докторот станува директор на Клиниката за психијатрија – посочи Манасиевски.

Тој се осврна и на тоа како воопшто започнала темата со која подоцна тој излегол во јавноста.

– Ова е минатата година во декември, имавме серија на прес-конференции, каде што тоа беше прво изнесено, јавно преку портали, каде што беа приведени неколку лица меѓу кои и поранешниот министер Трајан Димковски. Потоа, ние се приклучивме на темата со серија на прес-конференции, каде што побаравме одговори од претходниот министер за земјоделие и поранешен вицепремиер – заклучи Манасиевски.

The post ЉУПЧО НИКОЛОВСКИ ИЗВАДИЛ ПОТВРДА ОД ЛЕКАР-ДОНАТОР НА СДСМ Манасиевски за вештиот наод за нанесена душевна болка на неговиот тужител appeared first on plusinfo.mk.

Самсунг побара од американски суд да ја отфрли тужбата на Дуа Липа, со која пејачката бара најмалку 15 милиони долари отштета поради наводно неовластено користење на нејзина фотографија на кутиите за телевизори.

Тужбата беше поднесена во мај годинава, откако Дуа Липа тврдеше дека Самсунг без нејзина дозвола користел нејзина фотографија на пакувањата на различни модели телевизори продавани во САД. Според нејзините наводи, фотографијата била направена зад сцената на фестивалот „Austin City Limits“ во 2024 година и таа ги поседува авторските права за неа.

Пејачката тврди дека за тоа дознала во јуни 2025 година, кога на социјалните мрежи почнале да се појавуваат објави за „Дуа Липа телевизор“. Во тужбата се наведува и дека нејзиниот тим повеќепати барал фотографијата да биде отстранета од пакувањата, но дека компанијата не го сторила тоа. Таа затоа бара најмалку 15 милиони долари отштета, поврзана со наводно прекршување на авторски и трговски права и неовластено користење на нејзиниот лик.

Сега Самсунг возвраќа дека на фотографијата на кутиите немало ништо што би сугерирало дека Дуа Липа ги поддржува или рекламира телевизорите. Адвокатите на компанијата тврдат дека сликите само го прикажувале интерфејсот на телевизорот, односно апликациите и пример за содржината што може да се гледа преку уредот. Фотографијата на пејачката била поврзана со каналот Xite Hits, достапен преку бесплатната услуга Samsung TV Plus.

Од Самсунг уште кога избувна спорот тврдеа дека фотографијата ја добиле од партнер кој им дал изречна гаранција дека се обезбедени потребните дозволи, вклучително и за нејзино користење на кутиите во продавниците. Компанијата затоа негира дека намерно ги прекршила правата на пејачката.

Во најновото поднесување, Самсунг бара тужбата да биде отфрлена во целост. Меѓу аргументите на компанијата е и дека нејзиниот изглед сам по себе не претставува регистриран трговски знак, како и дека нејзините наводи не се доволни за да покажат лажно создаден впечаток дека таа го одобрува или промовира производот.

Според достапните информации за поднесокот, рочиштето за барањето за отфрлање е закажано за 14 декември.

The post САМСУНГ БАРА ДА СЕ ОТФРЛИ ТУЖБАТА НА ДУА ЛИПА ТЕШКА 15 МИЛИОНИ ДОЛАРИ Пејачката тврди дека нејзина фотографија без дозвола била ставена на кутии од телевизорите appeared first on plusinfo.mk.

Криптомилијардерот Џастин Сан ја тужи кинеската актерка Џинг Тјен и нејзините родители, барајќи да му бидат вратени 30 милиони кинески јуани, односно околу 4,5 милиони долари.

Сан тврди дека парите му биле префрлени на семејството на актерката како таканаречен „брачен подарок“, односно традиционален подарок од семејството на младоженецот кон семејството на невестата пред брак. Според неговата верзија, тој и Тјен биле во врска со намера да стапат во брак, но плановите пропаднале. Кинескиот суд ја прифатил тужбата, а Сан побарал и мерка за зачувување на имотот поврзан со спорот.

Случајот дополнително го привлече вниманието откако Сан откри детали за нивната наводна врска. Во разговор со „Волстрит журнал“ тој потврдил дека со актерката се забавувал со намера да се венчаат. Според неговите тврдења, додека се подготвувале за медицински постапки во САД со цел да добијат дете, од другата страна било побарано да плати 50 милиони долари. Сан вели дека одбил, по што контактот бил прекинат и планот за брак повеќе не можел да продолжи.

Сепак, приказната има необичен пресврт. Сан на својата страница на „Икс“ објави текст со наслов „Мојата девојка Џинг Тјен“, во кој детално ја опиша нивната наводна романса, но на крајот додаде напомена дека приказната е целосно измислена и дека секоја сличност со вистински луѓе и настани е случајна. И покрај тоа, неговиот адвокат потврди дека тужбата против актерката и нејзините родители навистина постои.

Тјен не ги коментираше директно неговите обвинувања, но по објавувањето на информациите за тужбата напиша на кинеските социјални мрежи дека никогаш нема да ја продава својата љубов за пари. Таа додаде дека верува во љубовта, но и во законот, добрината и тоа дека на крајот ќе надвладеат правдата и правичноста.

Џинг Тјен има играно во повеќе големи кинески продукции, но и во холивудските филмови „Ѕидот“, „Конг: Островот на черепот“ и „Пацифик Рим: Востание“. Таа има 38 години, додека Сан има 36. Сан, кој ја основал блокчејн-компанијата „Трон“ во 2017 година, според „Форбс“ има богатство проценето на околу 8,5 милијарди долари.

Сан и претходно привлекуваше внимание со екстремно скапи потези. Тој во 2024 година стана вирален откако на саемот „Арт Базел“ во Мајами плати 6,2 милиони долари за уметничко дело со банана залепена со лента за ѕид. Сан веднаш потоа ја изеде бананата.

Покрај уметничкото дело со бананата, Сан платил 4,57 милиони долари за добротворен ручек со Ворен Бафет, како и 28 милиони долари за место на лет во вселената со „Блу Ориџин“ во 2025 година.

The post ПЛАТИЛ 4,5 МИЛИОНИ ДОЛАРИ ЗА БРАК СО ГЛУМИЦА Криптомилијардерот Џастин Сан си ги бара назад парите што му ги дал на семејството на кинеската актерка Џинг Тјен appeared first on plusinfo.mk.

„Во име на вистината, правдата и заштитата на мојот личен и професионален интегритет, јавно се обраќам со цел да ги демантирам неоснованите наводи и да упатам сериозна правна опомена до лицата кои се обидуваат да го нарушат мојот углед“, пишува во отвореното писмо естрадниот уметник Зоран Ванев адресирано до „инволвираните страни во раководството на фестивалот „Макфест“, нивните правни застапници и целокупната медиумска јавност“.

Тој тврди дека неговиот образ и транспарентноста му се најсилни правни аргументи со кои овој спор, доколку се иницира, е добиен уште на самиот почеток.

„Едвај чекав да ја отворите Пандорината кутија, бидејќи токму во неа самите ќе се закопате“, наведува Ванев во писмото и продолжува: 

Фејсбук објавата е „свиркач“, а конкретните докази се за на Суд

Повик до надлежните органи: Во однос на вашата наивна и смешна забелешка дека во мојата Фејсбук објава „немало приложено докази“ — сакам јасно да ви појаснам: социјалните мрежи не се судница. Мојата објава имаше исклучиво функција на „свиркач“ и претставуваше отворен јавен повик до надлежните истражни органи конечно да ги отворат очите, да влезат и да спроведат темелна истрага.

Судска разврска: Конкретните, неизбришливи и материјални докази со кои располагам нема да ги трошам и девалвирам по портали. Тие ќе бидат уредно, прецизно и безмилосно изнесени таму каде што им е местото – пред Судот.

Факти, а не самоволие: Зоран Ванев не пишува од самоволие. Секој мој збор е дебело поткрепен со факти за кои, во морето од ваши безбројни малверзации, можеби и самите веќе не сте свесни што сè сте направиле. Но, не грижете се, на сето тоа ќе ве потсетам кога ќе дојде време.

Процесуални повреди и најава за милионско отштетно побарување

Вонправна достава: Му порачувам на вашиот правен застапник да ги почитува елементарните норми. Правни списи и закани не се доставуваат на крајно непрофесионален начин – преку приватни лица низ Штип или преку Фејсбук објави. Доколку навистина имате правен основ, уредно доставете ја тужбата или што и да имате намислено на мојата адреса во Швајцарија.

Милионска контра-тужба: Сумата од 100.000 евра со која се обидувате да ме замолчите е само ваша правна фантазија. Јас сум државјанин на Швајцарија со титула Доктор на природна медицина, и штетата врз мојот углед е загрижувачка. Доколку мислевте дека сум несериозен човек и дека ве посочувам без причина и материјални докази, многу сте згрешиле. Следствено, моето отштетно побарување нема да биде 100.000 евра, туку можеби ќе биде милионско. Зоран Ванев не е „тиква без корење“, туку човек Патриот кој со чист образ чекори низ целиот свој живот.

Лоцирање на одговорноста и злоупотребата на буџетот

Ќе ми биде исклучителна чест, задоволство и вистинско уживање судски да го процесуирам овој случај и да го набљудувам разоткривањето на оваа мафијашка конструкција која со години профитира од парите на народот. Директно ги лоцирам:

Роберт Саздов (како уметнички директор на Макфест кој го одобрува ова неправилно и Авторско-Дискриминаторски зделки)
Јован Јованов (како главата на целата оваа мафијашка конструкција)

Доколку дојде до судска разрешница, многу ќе ми биде жал што во процесот неминовно ќе мора да бидат вплеткани и одредени луѓе од Општината. Но, од друга страна, тоа е неизбежно кога со такви луѓе како нив си имаат склучено договор за соработка.

Фактички демант за одбиените композиции

Во однос на вашите тврдења дека мојата реакција произлегува од суета поради „една одбиена песна“, најостро ве демантирам. Фактичката состојба е дека беа одбиени две песни, и тоа е апсолутно најмалиот проблем во целата ситуација.

Мојот квалитет што го поседувам како музичар е далеку пред сите во Македонија. Почнувајќи од „Јужна пруга“ која е безвременски хит, па понатаму — тоа се успеси за кои овие наведени музички имиња можат само да сонуваат“, пишува Зоран Ванев во отвореното писмо.

ЗА ОБВИНУВАЊАТА ЗА „МАКФЕСТ“ ОД ЗОРАН ВАНЕВ ЌЕ БАРААТ 100.000 ЕВРА Роберт Саздов и Јован Јованов ја носат кавгата од Фејсбук пред Граѓански суд

The post „НЕМА ДА МЕ ЗАМОЛЧИТЕ СО ЗАКАНА ЗА ТУЖБА ОД 100.000 ЕВРА“ Зоран Ванев јавно му одговори на раководството на „Макфест“ appeared first on plusinfo.mk.

Пејачката Селена Гомез се соочува со тужба од пет инвеститори во „Вондермајнд“, компанија за ментално здравје што ја основа со својата мајка Менди Тифи и со Даниела Пирсон. Тие бараат враќање на околу 1,2 милиони долари, тврдејќи дека биле доведени во заблуда.

Инвеститорите тврдат дека токму огромната популарност на Гомез била еден од адутите со кои биле привлечени да вложат пари. Пејачката требало активно да го гради и да го промовира брендот.

Според тужбата, Гомез потпишала договор со конкретни обврски, но инвеститорите тврдат дека не ги исполнила. Најавуваната апликација не била создадена, а не се реализирале ниту дел од ветените партнерства и други проекти.

Тужителите изнесуваат и посериозни обвинувања. Според нив, „Вондермајнд“ не успевал навреме да ги плаќа вработените и добавувачите. Истовремено, инвеститорите со години не биле информирани за вистинската финансиска состојба.

„Три години, додека компанијата тивко се распаѓаше околу нив, ниту еден од нејзините основачи, службеници или директори не им кажал ни збор на инвеститорите чии пари го финансираа пропаѓањето“, се наведува во тужбата.

Инвеститорите тврдат дека за размерите на проблемите дознале дури по новинарска истрага објавена во септември 2025 година.

„Вондермајнд“ беше основан пред пет години како платформа за полесен пристап до содржини поврзани со менталното здравје. Гомез претходно јавно зборуваше за сопствените проблеми со менталното здравје.

Пејачката има повеќе од 500 милиони следбеници на социјалните мрежи. Нејзиното богатство се проценува на речиси една милијарда долари, а таа стои и зад козметичкиот бренд „Рер бјути“.

The post ОД ПРОЕКТ ЗА МЕНТАЛНО ЗДРАВЈЕ ДО ТУЖБА ЗА СЕЛЕНА ГОМЕЗ Пет инвеститори бараат 1,2 милиони долари од пејачката appeared first on plusinfo.mk.