Министерот за здравство, Сашо Клековски денеска се вакцинираше протов сезонски грип во  Институтот за јавно здравје, кој е еден од пунктовите за имунизација.

– Вакцинацијата против сезонски грип е најдобра и најефикасна мерка за превенција на ова заболување. Токму затоа денеска со личен пример укажав на важноста од навремената заштита на здравјето, посебно кај ризичните групи население. Вакцинацијата докажано спречува појава на потешки форми, компликации и смртен исход од ова заболување – рече Клековски.

Охрабрува што за само една недела над 55.000 граѓани се пријавија за вакцинација, додава тој.

– Денеска стартуваше вакцинацијата во сите пунктови низ државата, така што апелирам доколку граѓаните од ризичните групи сè уште не се пријавиле за бесплатна вакцинација на сајтот vakcinacija.mk, да го сторат тоа што поскоро – апелира Клековски.

Од 14 октомври, кога беше отворена формата за пријавување, до денеска за бесплатна вакцинација против сезонски грип се пријавени 55.535 граѓани. Над 60% од пријавените се лица постари од 65 години, а околу една третина се граѓани со хронични заболувања. Најмногу граѓани се пријавиле во Скопје, Битола, Прилеп, Струмица и Тетово, информира Министерството за здравство.

Со пополнување на формата на сајтот за пријавување, граѓаните се регистрираат за вакцинација директно во системот Мој Термин. Потоа, согласно распоредот предвиден во планот за вакцинација, ќе добијат СМС порака со информација за точниот датум и час кога треба да се вакцинираат на пунктот што ќе го изберат при регистрацијата.

Бесплатната вакцинација против сезонски грип е наменета за следните ризични групи: лица над 65 години, лица со хронични заболувања, здравствени работници, бремени жени, како и деца на возраст од 6 месеци до 5 години, информираат надлежните.

The post КЛЕКОВСКИ СЕ ВАКЦИНИРАШЕ ПРОТИВ СЕЗОНСКИ ГРИП Имунизацијата почна, досега се пријавени 55.535 граѓани appeared first on plusinfo.mk.

Стручна комисија ќе го испитува медицинскиот аспект на лекувањето на Ива Михаилова, откако Државниот санитарен и здравствен инспекторат (ДСЗИ) констатирал прекршоци при постапувањето на Клиниката за неврологија.

Министерот за здравство Сашо Клековски денеска соопшти дека побарал и проширување на инспекцискиот надзор за да бидат опфатени сите здравствени услуги што пациентката ги користела во текот на 2025 и 2026 година.

Случајот се однесува на пребеганата Ива Михаилова која моментално се наоѓа во Бугарија. Нејзиното лекување во здравствените установи во Македонија стана предмет на инспекциски проверки.

Клековски, одговарајќи на новинарски прашања по промоцијата на 100 нови амбулантни возила, објасни дека првичниот надзор бил спроведен по иницијатива на Клиниката за неврологија, но дека извештајот не ја опфатил целосната историја на лекувањето на Михаилова.

– Во основа барав дополнување на извештајот на ДСЗИ, кој беше по иницијатива на Клиниката за неврологија, бидејќи не е следена целата патека и здравствени постапки кои Ива ги имала во здравствените установи во Македонија. Дополнително побарав надзорот да се прошири на една приватна здравствена установа каде што е третирана во меѓупериодот за да добиеме комплетна препорака. Веќе во оваа фаза има констатирани прекршоци и веќе во оваа фаза е побарано стручен надзор за медицинскиот дел од извештајот – изјави Клековски.

Со проширувањето на контролата, инспекторите треба да ја проследат целата патека на пациентката низ здравствениот систем, наместо да се ограничат само на постапувањето на Клиниката за неврологија.

Дополнителниот стручен надзор ќе се однесува на медицинскиот аспект на лекувањето.

Министерот се осврна и на вчерашната средба со неговата бугарска колешка во Софија, каде што разговарале за повредените во трагедијата во Кочани. Тој посочи дека случајот со Михаилова не бил тема на разговорите, бидејќи двете страни го третираат како прашање од надлежност на правосудните органи.

– Во основа постигнавме премолчена согласност дека прашањето на Ива не е здравствено прашање, туку е прашање од доменот на правдата, бидејќи особата е бегалец од правдата барана со меѓународна потерница. Како што е тоа прашање на правдата, а не здравствено прашање, не го разговаравме – рече Клековски.

На истиот настан, премиерот Христијан Мицкоски беше прашан и за навредливата изјава на бугарскиот министер за внатрешни работи. Тој одби да ја коментира, оценувајќи дека станува збор за политички настап поврзан со претседателските избори во Бугарија.

– Видете, имам што да одговорам, но мислам дека поединци не заслужуваат да бидат во центарот на вниманието. Мислам дека ваков тип на естрада којашто денеска ја гледаме таму, а којашто е поврзана со фолклорот за нивните претседателски избори, не заслужува коментар и мислам дека треба да ги игнорирате и вие како медиуми ваквите изјави на поединци – изјави Мицкоски.

Во врска со повредените од Кочани, Клековски најави дека Министерството за здравство и работната група имаат подготвено планови што наскоро ќе бидат објавени.

The post УТВРДЕНИ ПРЕКРШОЦИ ПРИ ЛЕКУВАЊЕТО НА ПРЕБЕГАНАТА МИХАИЛОВА Клековски најави стручна комисија за испитување на случајот appeared first on plusinfo.mk.

Сто нови, комплетно опремени амбулантни возила, во вредност од 460 милиони денари, се набавени за потребите на Итната медицинска помош низ Македонија. Премиерот Христијан Мицкоски и министерот за здравство Сашо Клековски најавија можност за набавка на уште 50 возила во 2027 година, а Министерството за здравство подготвува и реорганизација на службата за итна медицинска помош.

На настанот по повод набавката, Клековски истакна дека новите возила ќе заменат дел од дотраените амбулантни возила и ќе овозможат медицински третман уште за време на транспортот на пациентите.

– Зајакнувањето на службата за итна медицинска помош е еден од приоритетите на Владата и Министерството за здравство. Обезбедувањето 100 нови возила за итната помош, со кои се дополнува возниот парк и се заменуваат амортизираните возила, е значајна инвестиција во вредност од 460 милиони денари. Секое возило располага со комплетна современа медицинска опрема за интервенција, стабилизација и транспорт на пациенти – изјави Клековски.

Според податоците што ги изнесе министерот, планот е возниот парк на Итната медицинска помош да се зголеми од сегашните 140 на 200 возила. Разговорите за дополнителната набавка треба да започнат во наредниот период.

– Обновата на возниот парк продолжува. Планот е возниот парк на итната помош од сегашните 140 да се зголеми на 200 возила. Веќе почнуваме разговори за набавка на уште 50 нови возила во 2027 година. Паралелно, континуирано ги следиме кадровските потреби и критичните точки во мрежата на итната помош, за ресурсите да бидат насочени таму каде што се најпотребни – рече министерот.

Премиерот Мицкоски оцени дека новата опрема ќе им овозможи на медицинските екипи побрзо да стигнуваат до пациентите и попрецизно да интервенираат. Тој изрази надеж дека возилата ќе имаат што помалку интервенции, бидејќи тоа би значело и помал број итни медицински случаи.

– Јас би сакал уште еднаш да посакам да што помалку се користат овие возила. Се разбира, колку помалку се користат тоа значи дека ќе имаме толку помалку случаи коишто треба да се третираат со овие возила. Но, онаму каде што е потребно убеден сум дека со овие возила побргу ќе се стигнува и ќе се интервенира многу попрецизно имајќи ја предвид опремата којашто ја поседуваат овие нови возила, 100 на број – рече Мицкоски.

Дефибрилатори, монитори, респиратори, автоматски носилки

Новите амбулантни возила располагаат со напредни дефибрилатори и монитори, опрема за кислородна и респираторна поддршка на возрасни, деца и новороденчиња, како и автоматски носилки. Вграден е и хидрауличен систем за намалување на вибрациите при транспортот, а медицинскиот простор има независно греење, климатизација и систем за озонска дезинфекција.

Опремата овозможува следење на срцевата активност преку ЕКГ, мерење на пулсот и крвниот притисок, како и следење на состојбата на пациентот за време на транспортот.

Покрај обновувањето на возилата, Министерството најави и организациски промени. Во тек е процесот за издвојување на Итната медицинска помош во посебна служба, одделена од Здравствениот дом – Скопје. Предвидени се воведување парамедици во медицинските тимови, национален систем за тријажа и национален диспечерски центар со показатели за следење на ефикасноста на службата.

– Новите возила се важен чекор, но не се доволни сами по себе. Целта на реформите е секој граѓанин, без разлика каде живее, да добие навремена и еднаква итна медицинска грижа – порача Клековски.

„Не е сè решено, но ќе биде полесно“

Мицкоски, пак, призна дека набавката на возилата нема да ги реши сите проблеми во здравствениот систем, посочувајќи дека дел од нив се последица на долгогодишно запоставување.

 -Многу работи се запоставени, многу работи се уништени, многу работи се украдени, но она коешто е задача на оваа Влада е тоа што е уништено, тоа што е запоставено, тоа што е украдено да го надомести. Има уште многу проблеми за решавање, не е сè решено со овие 100 возила, се разбира можеби е помалку или повеќе олеснета состојбата, но не е сè решено – рече премиерот.

Тој се осврна и на долгогодишното запоставување на здравствената инфраструктура, посочувајќи дека обновувањето на старите проекти е дополнително отежнато поради застарената медицинска технологија.

– Низа проекти коишто со децении биле запоставувани или воопшто не се водело сметка, едниот за волја на вистината, отпочнат па заборавен, испокраден, уништен. И сега замислете вие кога ќе треба со проект којшто е започнат пред 15-20 години да го продолжите да го работите, а во суштина треба да размислувате што ќе се случува од денеска за 10-15 години во здравството. Значи, таа технологија којашто била пред 10-15 години, е сега веќе застарена, а замислете каква технологија треба да антиципирате што ќе се развива во следните 10-15 години – рече Мицкоски.

 

View this post on Instagram

 

A post shared by Plusinfo.mk (@plusinfo.mk)

Премиерот им се заблагодари на здравствените работници и лекарите, истакнувајќи дека тие неретко работат во исклучително тешки услови и вложуваат натчовечки напори за да ги извршат своите задачи. Благодарност упати и до министерот за здравство, вработените во Министерството и пратениците за нивниот придонес во реализацијата на набавката.

На крајот од обраќањето, Мицкоски повторно ја спомена можноста здравствениот систем следната година да добие дополнителни 50 амбулантни возила.

– Битно е дека имаме 100 нови амбулантни возила, нешто што би рекол одамна не е направено за здравствениот систем во Македонија и се надевам за нови 50, Сашо нели за тоа што зборувавме, ако биде сè како што треба, би требало уште нови 50 да добиеме, веќе следната година. Но, за тоа потоа, ајде еве прво да ја изработиме и таа работа, па потоа и за тоа да се пофалиме – рече Мицкоски.

The post 📽️ 📷 НАБАВЕНИТЕ 100 НОВИ АМБУЛАНТНИ ВОЗИЛА ВРЕДАТ 7,5 МИЛИОНИ ЕВРА Опремени се со дефибрилатори, монитори и респираторна опрема appeared first on plusinfo.mk.

Министерот за здравство Сашо Клековски синоќа се сретна со повредените од пожарот во дискотеката „Пулс“ во Кочани и разговарале за нивната состојба, потребите и за грижата што им е потребна и понатаму.

„Државата е тука, на долги стази. Ги најавив можностите и следните чекори. Со нас беа и д-р Катарина Мирчовска и д-р Гордана Георгиева од работната група на Министерство за здравство, чија цел е оценка, советување, организација и следење на третманите на секој пациент. Тоа е основа за натамошна грижа прилагодена на потребите на секој од нив. На средбата присуствуваше и градоначалникот на Кочани, Владко Грозданов“, објави министерот Клековски.

The post МИНИСТЕРОТ КЛЕКОВСКИ СЕ СРЕТНА СО ПОВРЕДЕНИТЕ ВО ПОЖАРОТ ВО „ПУЛС“ Прилагодена грижа за секој пациент appeared first on plusinfo.mk.

Министерството за здравство денеска ги објави протоколите за дисперзирана терапија за мултиплекс склероза. На настанот присуствуваа директорите на Универзитетската клиника за неврологија, Специјалната болница за ортопедија и трауматологија „Св. Еразмо“ – Охрид, ГОБ „8 Септември“ – Скопје и Клиничката болница Штип.

На Клиниката за неврологија се водат околу 2.000 пациенти со мултиплекс склероза, од кои околу 1.800 активно се лекуваат. Бројот на новодијагностицирани расте, во 2025 година се регистрирани 115 пациенти.

– Во моментот, 835 пациенти од 48 општини се на имуномодулаторните лекови опфатени со дисперзијата и сите тие терапијата ја подигаат или ја примаат на Клиниката во Скопје. Од нив, 491 живеат надвор од скопскиот регион и многумина патуваат секој месец, често со придружник, што значи трошок, отсуство од работа и дополнителен напор за луѓе со хронична болест. Децентрализацијата овозможува да се опслужат повеќе пациенти без Клиниката да стане тесно грло – рече министерот за здравство Сашо Клековски и додаде дека буџетот за лекови за мултиплекс склероза годинава изнесува рекордни 451 милион денари.

– Ова е модел. Тоа е олеснување за пациентите, кои терапијата ќе ја добиваат поблиску до својот дом, но и унапредување за здравствените работници во регионалните болници, чиј делокруг на работа се збогатува. Секако, ова е модел и за други области, како онкологијата – додаде тој.

Директорот на Неврологија, Јован Божиновски, истакна дека иницијативата е одговор на долгогодишните барања на Здружението за борба против мултиплекс склероза.

– Правилникот ги утврдува лековите, надлежностите, условите за центрите и постапката, а со протоколот секоја болница одделно ги презема обврските што ја засегаат. Болниците се обврзуваат да одредат одговорен невролог, фармацевт и обучени медицински сестри, да ги чуваат и издаваат лековите по пропишан режим, да ја евидентираат секоја доза и да ги пријавуваат несаканите реакции во рок од 24 часа. Клиниката ја задржува стручната, финансиската и организациската одговорност: таа ги набавува лековите, преку Комисијата за имуномодулаторна терапија одлучува за секој пациент, ја фактурира терапијата кон Фондот за здравствено осигурување и врши надзор во центрите најмалку еднаш годишно – појасни Божиновски.

Децентрализацијата опфаќа десет лекови, поделени во две групи. Во првата се лековите што пациентот сам ги применува – интерфероните, глатирамер ацетат и оралните лекови (диметил фумарат, терифлуномид, кладрибин) – и тие се подигаат месечно од болничката аптека на центарот. Во втората се биолошките лекови „окрелизумаб“, „натализумаб“ и „офатумумаб“, кои ги аплицира медицинско лице во центарот.

Терапијата се воведува на Клиниката, каде пациентот ја прима првата доза, поминува обука и потпишува согласност, а сите наредни дози ги прима во регионалниот центар. Контролите се на секои шест или 12 месеци, со дигитален конзилиум.

Во првата фаза Клиничката болница во Штип ќе ги покрива источниот, југоисточниот и вардарскиот дел (околу 128 пациенти), СБ „Св. Еразмо“ – југозападниот дел и Битола (околу 146), а ГОБ „8 Септември“ ги презема пациентите од Скопје (344).

Вкупно 618 пациенти (74 %) ќе можат терапијата да ја добиваат во регионален центар, а заедно со пациентите од граничните општини, кои сами ќе го изберат центарот, до 692 (83 %).

Преминот е доброволен – пациентот преминува дури откако ќе потпише писмена согласност, а оној што не сака да премине останува на Клиниката без никакви последици врз правото на терапија.

The post ВЕЌЕ НЕ ТРЕБА ДА СЕ ПАТУВА ДО СКОПЈЕ ЗА ДА СЕ ПРИМИ ТЕРАПИЈА ЗА МУЛТИПЛЕКС СКЛЕРОЗА Три болници се обрзаа да ги даваат лековите на пациентите appeared first on plusinfo.mk.

The post РЕЧИСИ 25.000 ЛУЃЕ СЕ ПРИЈАВИЛЕ ЗА ВАКЦИНАЦИЈА ПРОТИВ ГРИП Министерството ќе обезбеди доволно вакцини appeared first on plusinfo.mk.

Министерот за здравство Сашо Клековски денеска, по повод Светскиот ден на менталното здравје, го отвори целосно реконструираниот оддел „Машки 2″ во ЈЗУ Психијатриска болница – Скопје (Бардовци).

Одделот е со површина од околу 600 м², а за реконструкцијата се издвоени 300.000 евра.

– Пред четири децении, за време на моите студии, едно од двете најтешки искуства ми беа нечовечките услови во психијатриските установи. Работиме тоа да се смени – изјави министерот Клековски.

Со болницата е договорено, основниот буџет да вклучува средства за континуирани реконструкција, бидејќи тоа е потребно на психијатриските установи, кои со децении работеле во несоодветни услови.

Претходно се реконструирани сите оддели во Специјалната психијатриска болница Негорци, дел од Клиниката за психијатрија Скопје, а следува реконструкција на Психијатриската болница во Демир Хисар.

Министерот Клековски истакна дека грижата за менталното здравје не се сведува само на подобрување на условите во болниците. Од минатата година матичните лекари имаат превентивна цел за рано откривање на депресија кај младите. Следната година Министерството за здравство планира да започне со спроведување на проект за центри за ментално здравје на младите.

The post НЕЧОВЕЧКИТЕ УСЛОВИ ВО ПСИХИЈАТРИСКИТЕ УСТАНОВИ МОРА ДА СТАНАТ МИНАТО Реконструирано одделение во Психијатриска болница Бардовци appeared first on plusinfo.mk.

Повеќе објекти низ Македонија се осветлуваат во зелена боја во знак на солидарност со донорите и примателите на органи, ткива и клетки, по повод Европскиот ден на донирањето органи, ткива и клетки за 2026 година.

Во иницијативата се вклучија општини од повеќе градови низ државата, како и институции, кои со зеленото осветлување испраќаат порака за надеж, хуманост и можност за спасување човечки животи.

Министерството за здравство им се заблагодари на сите што ја поддржаа иницијативата, истакнувајќи дека оваа симболична гестура ја подигнува свеста за значењето на органодарителството и трансплантацијата.

„Секој донор е надеж. Секое „да“ е нов живот. Да ја шириме свесноста, да поттикнуваме хуманост и да даваме надеж за нов живот!“, порачуваат од Министерството за здравство.

Зелената светлина е симболична порака дека одлуката за донирање органи, ткива и клетки може да им даде нова шанса за живот на луѓето на кои им е потребна трансплантација.

Со вклучувањето на локалните самоуправи и институциите, иницијативата потсетува дека солидарноста и информираноста се важни за развојот на донорството и за спасувањето човечки животи.

The post МАКЕДОНИЈА СВЕТИ ВО ЗЕЛЕНО ЗА НОВ ЖИВОТ Објекти низ државата во знак на солидарност со донорите appeared first on plusinfo.mk.

Министерството за здравство информира дека, почнувајќи од овој продолжен викенд, вклучувајќи го и претстојниот празник, а потоа и во наредните викенди, Центарот за позитронска емисиона томографија (ПЕТ) ќе биде отворен за пациентите, со цел да се скрати времето на чекање за пациентите.

„Секој ден на листа на чекање е ден неизвесност за пациентот и за неговото семејство. Затоа, ПЕТ центарот, согласно предвидениот план, продолжува со работа и во викендите, со јасна цел – да се намали листата на чекање и дијагностиката да им биде побрзо достапна на тие на кои им е најпотребна“ – се вели во соопштението на МЗ.

– Оваа реорганизација се спроведува за да ги намалиме листите на чекање. Очекуваме да продолжи трендот што го воспоставивме во изминатите две години, кога двојно ги зголемивме термините. Посебна благодарност им упатуваме на сите здравствени работници и соработници, чиј труд и залагање го прават ова можно – изјави д-р Невена Маневска, директорка на ПЕТ центарот.

Позитронската емисиона томографија е современа медицинска дијагностичка метода за откривање, утврдување на распространетоста и следење на лекувањето на малигните заболувања.

The post ПЕТ-ЦЕНТАРОТ ЌЕ РАБОТИ ВО ВИКЕНДИ И НА ПРАЗНИЦИ Целта е да се намали времето на чекање appeared first on plusinfo.mk.

Неразбирливо ми е зошто речиси 18 месеци нема договор за одржување на електронскиот систем за закажување термини „МојТермин“. Веќе побарав од нашите служби да подготват јавен повик за две години, бидејќи сметам дека едногодишните договори не го обезбедуваат континуитетот што ни е неопходен за да ги направиме промените, истакна денеска министерот за здравство Сашо Клековски.

Тој рече дека неблагодарно е да коментира пропусти на претходни министри во одреден подолг временски период.

– Запознаен сум со извештајот на Државниот завод за ревизија (ДЗР). Очекувана постапка е дека сите нацрт извештаи се доставуваат до надлежните институции. Многу ја ценам работата на ДЗР. Не можам да кажам дека во извештајот има грешка или неточност. Тој е даден, сме го потврдиле, состојбата е таква. Зошто е таква може други луѓе да прашате. Кога го имавме нацртот доставен до нас побарав да направиме акциски план. Промовиравме нацрт стратегија за дигитализација во здравството и планираме масивни интервенции во делот на дигитализацијата и натамошно зголемување на продуктивноста на здравствениот систем и зголемување на задоволството на пациентите. „МојТермин“ е централен дел на тоа прашање. Во извештајот пишува дека во Управата за електронско здравство, пополнети се само 29 отсто од предвидениот број на вработени со систематизацијата – посочи Клековски одговарајќи на новинарско прашање.

Во денеска објавениот извештај на ДЗР од извршената ревизија на информациски системи на тема „Мој Термин – оптимизација на здравствените процеси и подобрување на квалитетот на здравствената заштита“ се наведува дека од 1 јануари 2021 година до 30 април годинава, системот „Мој Термин“ не бил покриен со договори за одржување вкупно 738 дена, што претставува 37,9 отсто од анализираниот период. Договорите за одржување се склучувале на годишно ниво, без обезбедување континуитет, 48 отсто од вкупните вложувања кај ЈЗУ кои користат други информациски системи се концентрирани кај три софтверски компании, што упатува на зголемен ризик од концентрација и ограничена конкуренција, а посебни слабости се утврдени во областа на ИТ безбедноста и заштитата на личните податоци.

The post НЕРАЗБИРЛИВО Е ЗОШТО 18 МЕСЕЦИ НЕМА ДОГОВОР ЗА ОДРЖУВАЊЕ НА МОЈ ТЕРМИН Клековски вели дека е неблагодарно да коментира пропусти на претходни министри appeared first on plusinfo.mk.