Колкава е куповната моќ на Македонците во споредба со Европејците, во услови кога цените на храната растат и во Македонија и низ Европа, а токму храната е една од ставките што најмногу тежат врз семејниот буџет? За пет години, храната и безалкохолните пијалоци во Македонија, според Државниот завод за статистика, поскапеле за 46 проценти, но минималната бруто плата во истиот период пораснала за 74 проценти.

Пресметката покажува дека со една минимална бруто плата во август 2026 година може да се купи околу 19 проценти повеќе храна отколку во август 2021 година. Ваквите бројки можат да бидат охрабрувачки за стандардот на граѓаните.

Слична динамика има и кај просечната плата. Според Државниот завод за статистика, просечната месечна бруто-плата во јули 2026 година достигнала 72.935 денари, наспроти 42.776 денари во јули 2021 година. Тоа е номинален раст од околу 71 процент за пет години. Истовремено, потрошувачките цени во август годинава се за околу 46 проценти повисоки од оние во август 2021 година. Податоците, оттука, покажуваат дека платите номинално растеле побрзо од цените.

Но, дали тоа значи дека куповната моќ на Македонците растела побрзо или побавно отколку во остатокот од Европа? Анализата на „Еуроњуз бизнис“ покажува големи разлики меѓу европските земји – додека во дел од нив минималните плати значително го надминале растот на цените на храната, во други работниците денес со минимална плата можат да купат помалку храна отколку пред пет години.

Храната во ЕУ за пет години поскапела 34 проценти

Според податоците на Евростат што ги анализира „Еуроњуз бизнис“, цените на храната и безалкохолните пијалоци во Европската Унија во просек се зголемиле за 34 проценти меѓу август 2021 и август 2026 година. Во споредба со европскиот просек, растот од 46 проценти во Македонија е повисок за 12 процентни поени.

Но, разликите меѓу европските земји се големи. Највисок раст во ЕУ е забележан во Унгарија, каде што храната поскапела за 57 проценти, по што следуваат Бугарија со 54 и Романија со 53 проценти.

На другиот крај е Кипар, каде што храната поскапела за 21 процент. Во пошироката споредба на 35 европски земји, најмал раст е регистриран во Швајцарија – само пет проценти.

Меѓу најголемите економии во ЕУ, цените на храната за пет години пораснале за 25 проценти во Франција, 30 проценти во Италија, 34 проценти во Германија и 35 проценти во Шпанија.

Убедливо најголем раст, сепак, има во Турција. Таму храната и безалкохолните пијалоци за пет години поскапеле за дури 752 проценти. „Еуроњуз“ ваквиот раст го поврзува со повеќегодишната висока инфлација, но и со силниот пад на турската лира, што ги зголемило трошоците за увезените производи и производствените инпути.

Врз европските цени на храната во изминатите години влијаеле повеќе фактори. Цените почнале да растат уште пред руската инвазија врз Украина во февруари 2022 година, а војната дополнително ги зголемила трошоците за енергија, ѓубрива и транспорт и предизвикала нарушувања на земјоделските пазари.

Порасна храната, но пораснаа и минималните плати

Поскапувањето, сепак, е само едната страна од пресметката на куповната моќ. Другата е колку во истиот период се зголемиле примањата. Анализата на „Еуроњуз“ покажува дека во најголем дел од 26-те земји што ги споредува, минималните плати растеле побрзо од цените на храната. Во Унгарија, на пример, законската минимална плата изразена во локална валута пораснала за 93 проценти, во Германија за 46 проценти, во Шпанија за 29 проценти, а во Франција за 20 проценти.

Уште поголеми зголемувања има во регионот. Во Србија минималната плата пораснала за 103 проценти, а во Црна Гора за 102 проценти. Во Турција растот достигнал дури 823 проценти.

Но, токму тука е важна разликата меѓу номиналниот раст на платата и она што со неа реално може да се купи. Не е доволно едноставно од процентот на раст на платата да се одземе процентот на раст на цените. Наместо тоа, треба да се спореди количината производи што можела да се купи со една плата на почетокот и на крајот на периодот.

Токму според овој показател, односно колку повеќе или помалку храна може да се купи со една минимална плата, се гледаат и најголемите разлики меѓу европските земји.

Најголемото подобрување меѓу земјите анализирани од „Еуроњуз“ е регистрирано во Србија и Црна Гора – по 37 проценти, што е повисоко од Македонија. Но, македонскиот раст од 19 проценти е повисок од оној во повеќе западноевропски земји. Куповната моќ на минималната плата во однос на храната за пет години се зголемила за 10 проценти во Ирска, девет проценти во Германија, седум проценти во Грција, шест проценти во Белгија и Холандија и три проценти во Португалија.

Во Малта, Шпанија и Франција денес со минималната плата се купува помалку храна

Растот на платите, пак, не успеал секаде да го надомести поскапувањето на храната. Во три од 26-те земји што ги анализира „Еуроњуз“, работниците на минимална плата изгубиле куповна моќ во однос на храната во споредба со 2021 година. Најголем пад е регистриран во Малта – шест проценти. Работник кој во август 2021 година можел да купи 100 условни кошнички храна, во август годинава со минималната плата може да купи 94.

Во Шпанија куповната моќ во однос на храната се намалила за пет проценти, а во Франција за четири проценти.

Сепак, самата анализа на „Еуроњуз“ има важно ограничување: таа споредува бруто минимални плати и цени на храната, без да ги земе предвид даноците, кириите, сметките, транспортот и другите трошоци за живот. Затоа не покажува колку пари реално му остануваат на едно домаќинство за храна откако ќе ги плати останатите задолжителни трошоци.

The post МИНИМАЛЕЦОТ ДЕНЕС КУПУВА 19% ПОВЕЌЕ ХРАНА Како Македонија стои во споредба со Европа appeared first on plusinfo.mk.

Обидите за потценување и омаловажување на напорите на Македонија за соборување на инфлацијата на 2,3% во јули се темелат на тезата дека ниските цени во Македонија не успеваат да ги компензираат ниските приходи на населението. При тоа, под ниски приходи во тие пропагандни математики се сметаат само платите, а не и пензиите.

Клучниот показател на кој се повикуваат тие фејк анализи со работен наслов „инфлацијата паѓа, ценовниот шок останува“ е БДП по жител коригиран според куповната моќ. Првите процени на Евростат за 2025 година ја ставаат Македонија на 43% од просекот на ЕУ. Србија е на 52%, Црна Гора на 54%, Хрватска на 78%, а БиХ на 36%. Интересно, Албанија веќе е израмнета со Македонија — исто така 43%.

Но, дали коректно се толкуваат овие бројки?

Македонските плати, номинално, навистина се меѓу најниските во Европа кога ќе се претворат во евра, но од тој податок не може да се заклучи колкава е реалната куповна моќ на вработените. За тоа мора да се земе предвид и колку чинат стоките и услугите во секоја земја. Најновите споредливи европски податоци покажуваат дека Македонија има исклучително ниско ценовно ниво, поради што позицијата на вработените значително се подобрува кога платите ќе се коригираат со цените. Тоа особено се гледа кај минималната плата, но слична слика дава и споредбата на просечните бруто-плати.

За да нема споредување баби со жаби – а многу често има, па се споредуваат нето платите во Македонија со бруто платите во други земји! – во оваа анализа се споредуваат исклучиво бруто износите на платите.

Кај минималните плати споредбата е јасна, бидејќи Евростат ги сведува националните системи на споредлива бруто-основа. За цените се користи европскиот индекс на ценовното ниво и паритетот на куповната моќ, добиени со единствена европска методологија. Националните и синдикалните потрошувачки кошнички не се споредуваат, бидејќи нивниот состав и методологијата се разликуваат од земја до земја. Евростат објаснува дека Price Level Index се добива преку споредување на цените на стоки и услуги низ Европа и дека индексот за потрошувачката на домаќинствата не е коригиран за разликите во приходите.

Првиот интересен резултат е поврзан со минималната плата. Во јули 2026 година македонскиот минималец изнесува 624 евра бруто. Во Србија тој е околу 743 евра, во Црна Гора 670, во Бугарија 620, а во Албанија 531 евро. Хрватска е многу повисоко, со 1.050 евра бруто. Гледано само од овие бројки, Македонија навистина е близу до дното. Но, истите плати изгледаат сосема поинаку кога Евростат ќе ги пресмета според паритетот на куповната моќ.

Македонските 624 евра стануваат 1.142 PPS, односно единици на куповна моќ. Српските 743 евра вредат 1.094 PPS, црногорските 670 евра – 1.014 PPS, бугарските 620 – 993 PPS, а албанските 531 – само 705 PPS. Хрватскиот минималец останува убедливо повисок со 1.339 PPS. Тоа значи дека работникот што прима минимална плата во Македонија, иако на сметката добива номинално помала бруто-заработка од работникот во Србија или во Црна Гора, со неа може да купи поголем споредлив обем стоки и услуги.

Причината се цените. Од односот меѓу евровредноста на минималецот и неговата PPS-вредност се гледа дека македонското ценовно ниво е приближно 55% од просекот на ЕУ. Кај Бугарија е околу 62-63%, Црна Гора околу 66%, Србија околу 68%, Албанија околу 75%, а Хрватска околу 78%. За Бугарија директните податоци на Евростат за 2025 година покажуваат ценовно ниво од 63% од европскиот просек.

Сликата станува уште поинтересна кога ќе се погледнат просечните бруто-плати. Последните расположливи национални статистики не се за ист месец во секоја држава, па тука е потребна мала резерва, но станува збор за периодот пролет-лето 2026 и споредбата може да се смета за релевантна.

Во Македонија просечната бруто-плата е околу 1.210 евра, додека во Србија во мај изнесувала 163.470 динари, приближно 1.390 евра. Во Црна Гора просечната бруто-плата во јуни 2026 година изнесувала 1.237 евра. Во Албанија во првиот квартал просечната месечна бруто-плата била 90.119 леки, односно приближно 970 евра според курсот во тој период. Бугарија е над Македонија со просечна бруто-плата од околу 1.400 евра, додека Хрватска е веќе далеку напред: просечната бруто-плата во мај таму изнесувала 2.178 евра. Во Босна и Херцеговина просечната бруто-плата во април била 2.618 конвертибилни марки, односно околу 1.339 евра.

Кога просечните бруто-плати ќе се стават во корелација со ценовното ниво, регионалниот поредок битно се менува. Македонската плата од околу 1.210 евра при ценовно ниво од приближно 55% има куповна сила од околу 2.200 PPS. Српската плата од околу 1.390 евра при ценовно ниво од околу 68% дава приближно 2.050 PPS, а црногорската од 1.237 евра при цени од околу 66% – околу 1.870 PPS. Напоменувам декамовие последни бројки се аналитичка пресметка врз основа на официјалните податоци за платите и PPS/ценовното ниво, а не посебно објавен показател на Евростат.

Бугарија останува нешто пред Македонија и по оваа корекција. Со просечна бруто-плата од околу 1.400 евра и ценовно ниво од 63% од европскиот просек, куповната сила на просечната бруто-заработка е околу 2.200-2.300 PPS. Разликата со Македонија, сепак, станува многу помала отколку кога се споредуваат само номиналните плати во евра. Албанија е зад Македонија и според номиналната плата и според нејзината куповна сила, бидејќи нејзиното ценовно ниво е повисоко од македонското. Босна и Херцеговина има нешто повисока номинална просечна бруто-плата од Македонија, но и повисоки цени, поради што разликата во реалната куповна сила е помала од разликата што ја покажуваат самите плати.

Хрватска е пример каде корекцијата со цените не може да ја поништи големата разлика во заработувачката. Нејзината просечна бруто-плата од 2.178 евра е околу 80% повисока од македонската. Хрватските цени се исто така значително повисоки, па дел од таа предност исчезнува, но останува доволно голема за хрватскиот просечен работник да располага со чувствително поголема куповна сила.

А каква е ситуацијата со пензиите?

Во Македонија просечната пензија во јуни 2026 година била околу 28.000 денари, односно 455 евра. Просечната старосна пензија е повисока – 29.663 денари. Официјалните податоци покажуваат дека во земјата има 350.671 корисник на пензија.

Номинално, Македонија не изгледа особено добро. Црна Гора, на пример, веќе во мај имала просечна пензија од 561,41 евро. Во Бугарија, по јулското зголемување од 7,8%, просечната пензија за 2026 година е 543 евра. Во Хрватска просекот е уште повисок: официјалната статистика за крајот на 2025 покажува 637,56 евра за пензиите според општиот закон без меѓународните договори, а просечната старосна пензија била 680,39 евра.

Но, цените повторно суштински ја менуваат сликата. Ако просечните пензии ги коригираме со ценовните нивоа за кои веќе стана збор, Македонија е неколку места повисоко во регионалниот поредок. Грубата пресметка ја става македонската просечна пензија од околу 455 евра на куповна сила од приближно 830 PPS. Бугарските 543 евра даваат околу 870 PPS, а црногорските 561 евро, поради повисоките цени, приближно 850 PPS. Разликите меѓу овие три земји се речиси незначителни. Хрватска е значително подобра, додека споредбата со Босна и Херцеговина е ризична, поради комплицираниот пензиски систем во таа земја.

Кога сè ќе се собере одземе, сосема е јасно дека разбирањето на статистиката според формулата „јас јадам месо, ти јадеш зелка, во просек јадеме сарма“ се шири или поради незнаење, или поверојатно со цел да омаловажат поволните показатели кои бележат неспорен раст на македонската економија.

Би прифатил критика дека мојата анализа има скриени методолошки слабости, дека е нецелосна и можеби недоволно прецизна. Но, тврдам дека таа е многу пореална од фејк-анализите со кои во некои медиуми се брани пропагандистичката теза дека македонските граѓаните немаат баш никаква полза од позитивните економски движења и дека кај нас и понатаму се живее полошо одошто во Албанија, Србија, Босна и Херцеговина и во Бугарија.

Тоа, едноставно, не е точно!

Да, не сме среќни со нашата живеачка, сакаме повисоки плати и пензии и пониски цени, сакаме подобар животен стандард. Но, можеби е дојдено времето и секој од нас самиот да се потруди да ги оствари своите цели. Наместо сите да кукаме и постојано да бараме и статистичка потврда дека Македонија никако не ја бива.

The post Фејк анализи за омаловажување на позитивните економски показатели – каква е реалната слика? appeared first on plusinfo.mk.

Македонија е пред сите земји од регионот кога станува збор за куповната моќ на граѓаните, рече денеска премиерот Христијан Мицкоски одговарајќи на новинарско прашање за последните обвинувања на опозицијата поврзани со најновиот извештај на Евростат.

– Што се однесува до прашањето за извештајот на Евростат за куповната моќ, изминативе денови имаше одредени пораки од опозицијата и од некои медиуми коишто имаат исто мислење со опозицијата. Се водеше плитка кампања, која повторно беше демантирана, и повторно, претпоставувам, опозицијата и дел од медиумите ќе жалат и ќе бидат разочарани затоа што Македонија не е најслаба, туку е подобра од неколку земји од Европската Унија и, би рекол, пред сите земји од регионот кога станува збор за куповната моќ на граѓаните – рече Мицкоски.

Тој додаде дека лично смета оти се гледа разлика во однос на состојбата од пред три-четири години и дека е видлив напредокот на земјата.

– Дали е тоа доволно? Не е. Дали ќе работиме за уште повеќе и уште подобро? Апсолутно. Мотивирани сме како никогаш. Тие ќе продолжат да креираат хистерија врз основа на конструкции и лаги, а ние ќе ги засукаме ракавите, како што тоа го правевме и овие 25 месеци, и ќе продолжиме посветено да работиме за земјата и за граѓаните – рече премиерот Мицкоски по потпишувањето на договорите за грант за изградба на пругата од Крива Паланка до Деве Баир.

МАКЕДОНИЈА ПРВА ВО ЕВРОПА ПО РАСТОТ НА КУПОВНАТА МОЌ Прва и по растот на минималната плата

The post ОПОЗИЦИЈАТА ЖАЛИ ШТО И ЕВРОСТАТ ГО ПОТВРДИ РАСТОТ НА КУПОВНАТА МОЌ НА ГРАЃАНИТЕ Мицкоски е мотивиран да работи за уште подобра економска состојба appeared first on plusinfo.mk.

Евростат ги објави најновите податоци за минималната плата во државите од Европската Унија и во земјите кандидати. Според стандардите за куповна моќ (PSS), најголем напредок бележат Македонија и Романија кај кои е забележан скок за 8 места, по што следи Србија која има напредок од 5 места.

Според овој параметар, Македонија е држава која е рангирана пред 7 земји членки на ЕУ – со 1.142 единици на куповна моќ се рангира пред Малта, Словачка, Унгарија и Чешка.

„Кога се споредуваат рангирањата во номинални услови и PSS низ 27-те земји, најголемите победници се Романија и Северна Македонија. Романија се искачи од 20. на 12. место, додека Северна Македонија се искачува од 24. на 16. место, при што обете напредуваат за 8 места. Србија напредува за 5 места, Хрватска и Бугарија за 3 места. Најголем губитник е Естонија, која паѓа од 16. на 26. место, додека Латвија, Чешка и Кипар исто така губат 4 места“, објави Евростат.

Од државите членки на ЕУ, според овој параметар, на прво место е Германија по што следуваат Луксембург, Холандија, Унгарија и Чешка.

Од јануари до јули 2026 година, Македонија забележала најголемо зголемување на минималната плата меѓу анализираните земји –  за 6,9 проценти. Следуваат Романија и Естонија со по 6,8 проценти, Белгија со 5,8 проценти, Грција со 4,5 проценти, Луксембург со 2,5 проценти, Франција со 2,4 проценти и Холандија со големување од 1,9 процент.

Исто така,  Македонија, Црна Гора и Србија, како држави кандидати за Европската Унија, имаат повисока бруто минимална плата од Бугарија, која е членка на ЕУ.

Податоците на Евростат покажуваат дека само 8 држави од 29 европски земји ја зголемиле бруто минималната плата од јануари наваму. На прво место е Луксембург каде бруто минималната плата изнесува 2.771 евро по што следуваат Ирска со 2.391 евро, Германија со 2.343 евра, Холандија со 2.338 евра и Белгија со 2.234 евра. Ова се 5  земји со минимална плата над 2.000 евра. Франција е блиску до таа група со 1.867 евра.

Од државите членки на ЕУ најниска бруто минимална плата има Бугарија – 620 евра, додека повисока од неа имаат некои држави кандидат како што се Македонија со 624 евра, Црна Гора со 670 евра и Србија со 743 евра минимална плата.

Во средната категорија, со плати помеѓу 1.000 и 2.000 евра: Словенија (1.482 евра), Шпанија (1.425 евра), Литванија (1.153 евра), Полска (1.119 евра), Хрватска (1.050 евра), Кипар (1.088 евра) и Грција и Португалија со по 1.073 евра.

Повеќе од половина од набљудуваните земји, 15 од нив, имаат бруто минимална плата помала од 1.000 евра. Најниската е во Украина (169 евра) и во Молдавија (313 евра). Во Турција е 621 евра, а во Црна Гора 670 евра.

Инфлацијата од јануари досега изнесувала 3,2 проценти

Кога минималните плати во Европа се споредуваат според стандардот на куповна моќ (PPS), разликите меѓу земјите стануваат помали отколку кога се гледаат само износите во евра. Овој индикатор ги зема предвид разликите во цените и трошоците за живот и покажува колку стоки и услуги може да се купат со дадена количина во секоја земја. PPS е вештачка единица што овозможува пофер споредба на трошоците за живот.

The post МАКЕДОНИЈА ПРВА ВО ЕВРОПА ПО РАСТОТ НА КУПОВНАТА МОЌ Прва и по растот на минималната плата appeared first on plusinfo.mk.

Анализата, во која Плусинфо минатата недела ги спореди најновите достапни податоци за платите во Македонија, Србија, Бугарија, Албанија и во Хрватска и прикажа колку станбени квадрати, литри бензин, киловатчасови струја, килограми пилешко месо, литри сончогледово масло, јајца и еспресо кафиња можат да купат вработените во овие балкански земји со своите просечни плати, предизвика различни коментари.

НЕ СМЕ БАШ ЗА ФАЛЕЊЕ, АМА НЕ СМЕ НИ ЗА ОЛКУ КУКАЊЕ Колку вредат платите во Македонија во споредба со Србија, Бугарија, Албанија и со Хрватска?

Во истражувањето нагласивме дека платите не се единствените примања на населението во овие земји. Тука се и пензиите, за кои рековме дека во Македонија се значително повисоки од повеќе земји во регионот. Во меѓувреме, ги собравме најновите достапни податоци за просечните старосни пензии во овие земји и ги „пресметавме“ во истите производи како и платите, со цел сликата за куповната моќ на населението да биде што пореална. При тоа, треба да се има предвид дека станува збор за земји кои „стареат“, како и другите европоски земји, а тоа значи дека бројот пензионери е висок и постојано расте.

• Колкави се пензиите?

Податоците до кои дојдовме делумно ја оправдуваaт нашата претпоставка дека македонските пензионери можат да се пофалат со пензии приближно на исто рамниште со тие во регионот, а и повисоки од некои земји. Просечната пензија во Македонија во март била 430 евра, а тоа значи дека е повисока од таа во Србија и во Албанија, малку пониска од пензијата во Бугарија (изненадување за истражувачите) и позначително пониска од таа во Хрватска (таму имаме податок за априлската пензија). Еве ги бројките:

Овие пензии ги споредивме со цените на повеќе производи, занемарувајќи го нивниот вообичаен скок во екот на туристичката сезона. Да повториме дека за некои производи (цената на станбениот квадрат, на пример), освен официјално достапни податоци, консултуиравме и анализи на медиумите од регионот. Цените на прехранбените производи ги пронајдовме на сајтовите на големите синџири маркети („Конзум“ во Хрватска, „Рода“ и „Лидл“ во Србија, „Шпар“ во Албанија итн). И секако, да го повториме и тоа дека нашето истражување на цените може да има и непрецизности. Првото истражување покажа дека читателите, за среќа, немаа позначителни замерки на тој аспект на анализата.

• Со годишната македонска просечна пензија – најмногу станбени квадрати

Ако ги изразиме просечните годишни пензии (на нивото според нивниот актуелен износ) во квадратни метри станбена површина во централните градски подрачја на метрополите на петте балкански држави, ќе ги добиеме следните резултати:

Математиката е јасна: годишната просечна пензија во Македонија може да се изрази во 3 метри квадратни станбен простор во централното градско подрачје на матрополата и според тој показател, македонските понзионери се „најбогати“ во споредба со пензионерите од другите четири балкански земји. Овде сакаме да нагласиме дека просечната пензија во Албанија е ниска и под сите наши очекувања, но износот од 190 евра се спомнува во повеќе анализи на респективни албански медиуми.

• Македонските пензии изразени во бензин и во струја – највисоки на Балканот

Цената на горивата во Македонија е неспоредливо најниска во регионот. Минатата недела регистриравме цена од 1 литар безоловен бензин од 98-100 октани. Следната најниска цена ја забележавме во Бугарија – 1,45 евра. Споредено со просечните месечни пензии, ги добиваме следнте резултати:

Значи, просечната месечна пензија во Македонија, изразена во литри гориво (безоловен бензин од 98-100 октани), е повисока од сите други земи, освен од Хрватска. Разликата меѓу Македонија и Хрватска е мала.

Споредбата на просечните пензии со цената на струјата за домаќинствата – која во Македонија е апсолутно најниска во регионот (ние ја утврдивме на 0,032 евра за 1 киловатчас) – го покажува следново:

Заклучокот се наметнува само по себе: ако се изразат во најважните енергенси што ги трошат домаќинствата, македонските пензии се повисоки од тие во Србија, Бугарија, Албанија и во Хрватска.

• Македонските пензионери можат да си дозволат повеќе од леб и кисело млеко

Сликата за куповната моќ на македонските пензионери се менува на полошо кога ќе почнеме да ги изразуваме просечните пензии во килограми и литри производи што можат да се купат со нив. Но, не толку драстично како што беше случајот со платите. Со просечната месечна пензија, Македонецот може да купи 72 килограми пилешко месо – поради ниската пензија, пензионерот во Албанија е во многу полоша состојба, но пензионерот во Хрватска во битно подобра:

Сличен сооднос добивме и кога ги споредивме пензиите изразени во литри сончогледово масло за јадење:

Кај јајцата ситуацијата е малку поинаква, поради високите цени во Софија и во Тирана (2,45 и 2,74 евра за пакување од 10 јајца). Според податоците, со просечната македонска пензија можат да се купат повеќе пакувања од 10 јајца отколку во другите земји, освен Хрватска:

Изразувањето на месечната пензија во еспресо кафиња во рестораните покажува дека македонските пензионери тука се шампиони во регионот:

• Не сме богати, но популизмот и административната контрола на цените водат во еден веќе виден, многу грд „филм“

Примањата на пензионерите во Македонија – кои, како што е најавено, би можеле да се зголемат во септември – битно ја менуваат сликата на куповната моќ на вкупното население во нашата земја. Во одговор на критиките дека со ваквите споредби создаваме погрешна, или дури и „розова“ слика на стварноста, би сакале да го кажеме мислењето на истражувачите дека луѓето во Македонија, но и во другите земји кои беа опфатени со истражувањето, се сиромашни. А сите ги споделуваме желбите платите и пензиите да бидат повисоки, а цените – пониски.

Но, сето тоа мора да има основа во реалната економија, бидејќи во спротивно се засилуваат инфлаторните притисоци, кои водат во „филмот“ кој повозрасните (пензионерите, на пример) еднаш го имаат видено во поранешна Југославија – тогаш кога неоправданите зголемувања на примањата и робустната административна контрола на цените заврши со хиперинфалција, недостиг на основните прехранбени производи, снадбување со бонови, редици пред самопослугите и пред бензиските пумпи, со целосен распад на економијата, а подоцна и со распад на државата.

Македонија живее во еден поинаков „филм“, на овој или на оној начин повеќе од три децении одржува макроекономска стабилност. Лесно ќе се согласиме дека тој „филм“ и не баш некој живот, туку повеќе – преживување. Но, кога веќе се споредуваме со другите земји, редно е споредбите да бидат реални. Желбите и очекувањата не мора да се такви.

The post ПЕНЗИОНЕРИТЕ МОЖАТ ДА УДРАТ ЈАЈЦА НА МАСЛО И ПО ЕДНО ЕСПРЕСО Колку вредат пензиите во Македонија во споредба со Србија, Бугарија, Албанија и со Хрватска? appeared first on plusinfo.mk.

Според најновите проекции на Меѓународниот монетарен фонд (ММФ), до 2029 година – земајќи ја предвид очекуваната разлика во стапките на економски раст – во однос на БДП по глава на жител според куповната моќ, Словенија ќе ја престигне Италија и ќе се приближи многу поблиску до Обединетите Кралството и Франција.

По овогодишниот реален раст на БДП од 2%, ММФ во Словенија предвидува зајакнување на економската активност од 2,5% во 2025 година, а потоа околу 2,7% за следните години.

Ваквата економска динамика, иако пониска отколку во годините пред избувнувањето на пандемијата со ковид-19 и со закрепнувањето по коронавирусот во 2021 година, според прогнозите на фондот, значително ќе ги надмине оние на членките на ЕУ во западна и јужна Европа со што постепено ќе се намали развојниот јаз на Словенија со најразвиените земји во Европа.

Според прогнозите на ММФ  оваа година словенечкиот БДП по глава на жител, изразен во стандардите за паритет на куповната моќ, е 53.290 долари, тој треба да достигне 66.680 долари веќе во 2029 година.

Ова би било повеќе од очекуваната вредност на овој индикатор за Италија, за која се очекува стандардот за куповна моќ да се зголеми од 56.910 долари оваа година на 64.830 долари во 2029 година. Исто така, треба да се забележи дека разликите во развојот во Италија се големи и дека нејзиниот северен дел е претежно една од поразвиените области во Европа, додека јужниот дел е сè уште недоволно развиен.

До 2029 година Словенија би требало многу повеќе да се доближи до Франција и Обединетото Кралство во однос на БДП по жител и куповната моќ. Во Франција, тој индикатор треба да се зголеми од 60.340 долари оваа година на 70.150 долари во 2029 година. Во Обединетото Кралство, сепак, се очекува да се зголеми од 58.880 на 68.700 долари.

Словенија пред извесно време по овој критериум ги престигна Грција, Португалија и Шпанија и оваа разлика ќе остане, односно ќе биде нешто поголема.

Словенија, иако стандардно е лидер во Централна Европа, сепак ќе биде значително зад Австрија, Германија и повеќето други членки на ЕУ во северозападна и северна Европа, каде споменатиот показател е близу или над 80.000 долари.

Генерално, Централна Европа забрзано го фаќа чекорот со Западот. Полска, на пример, брзо го намалува развојниот јаз со некои западни и јужноевропски членки на ЕУ, каде БДП по глава на жител според стандардите за куповна моќ се очекува да се зголеми од 49.060 долари во 2024 година на 63.450 долари до 2029 година. Силен раст треба да забележи Литванија. со 50.600 до 64.790, како и Чешка, од 50.470 до 62.600 долари.

The post СЛОВЕНЦИТЕ ПО 5 ГОДИНИ ЌЕ ИМААТ КУПОВНА МОЌ КОЛКУ ФРАНЦУЗИТЕ И БРИТАНЦИТЕ Кого ќе престигнат во меѓувреме? appeared first on plusinfo.mk.

Според овие податоци, БДП на Луксембург по жител, изразен во однос на куповната моќ, бил за околу 140% повисок од минатогодишниот просек на ЕУ.

Ирска имаше ниво од 112% над просекот на ЕУ, што е далеку пред Холандија (30%), Данска (28) и Австрија (23).

На дното на табелата е Бугарија во која БДП по глава на жител е 36% под просекот на ЕУ. Пред неа се Грција (-33 отсто) и Латвија (-29).

Евростат ја објаснува непроменетата позиција на Луксембург на врвот на листата на земји од ЕУ со големото учество на странската работна сила, која учествува во создавањето на домашниот бруто производ, но овие работници не се вклучени во резидентното население, кое се користи за пресметување на БДП по жител.

The post ЖИТЕЛИТЕ НА ЛУКСЕМБУРГ ИМААТ НАЈВИСОКА КУПОВНА МОЌ ВО ЕУ Кои земји се последни на списокот? appeared first on plusinfo.mk.

Според овие податоци, како што јави дописникот на МИА од Брисел, дури две третини од најпросперитетните земји во светот се наоѓаат во Европа, но и меѓу нив постои значителна разлика во приходите мерени според стандардот за куповна моќ (ППС) по домаќинство, при што жителите на западните и нордиските држави имаат значително повеќе расположливи средства за трошење од оние на југот и истокот на континентот.

Европската статистичка агенција – Евростат како расположлив приход на домаќинствата ги смета средствата што едно домаќинство ги има на располагање за трошење и заштеда по оданочувањето и по плаќањето на режиските трошоци.

На листата на европски земји во која се вклучени членките на ЕУ и на Европската зона за слободна трговија (ЕФТА), како и кандидатите за членство во Унијата, со приходот од 5.988 ППС по жител Северна Македонија е на претпоследното место, пред Албанија која има 4.385 ППС. Пред земјава се Турција со 6.210 ППС, Црна Гора со 6.328 и Србија со 6.968 ППС по жител.

Следна на листата, пред Србија, е Бугарија со 9.671 ППС и е држава со најнизок просечниот приход по глава на жител меѓу членките на ЕУ, а пред неа се Словачка со 9.826, Романија со 10.033, Унгарија со 10.217 и Грција со 10.814 ППС по жител.

На првото место на листата е Луксембург со просечниот расположлив приход по жител од 33.214 ППС, пред Норвешка со 27.090, Швајцарија со 26.389, Холандија со 25.437, Австрија со 25.119 и Белгија со 24.142 ППС по жител.

Меѓу четирите најголеми земји во ЕУ, Германија е деветта со 23.197 ППС по жител, Франција 12-та со 20.575, Италија е 17-та со 18.472 и Шпанија 18-та со 17.254 ППС по жител. Просекот во ЕУ изнесува 18.706 ППС по жител.

Хрватска, која е последната земја што се приклучи на ЕУ, со 12.277 има повисок просечен расположлив приход од шест членки на Унијата.

Споредено со 2017 година, најголем раст на просечниот расположлив приход по жител бележи Романија од 101 отсто, а потоа следуваат Србија со раст од 68 и Литванија од 66 проценти.

Единствена земја на листата што бележи пад на расположлив приход во периодот 2017 – 2022 година е Турција, каде тој се намалил за 27 отсто.

The post КУПОВНАТА МОЌ НА МАКЕДОНЕЦОТ ПОРАСНАЛА ЗА 41 ОТСТО!? Индексот на просперитет вели дека ни е подобро во споредба со 2017 година appeared first on plusinfo.mk.

Ова е коментарот на Џевдет Хајредини на Фејсбук, на изјавата на Ковачевски дека „народот сега може да купи за речиси една третина повеќе производи“.

Хајредини го демантира тврдењето на СДСМ дека во изминатите 6 години значително ја подобрил куповната моќ на граѓаните, односно дека во периодот од мај 2017 година до мај 2023 година, благодарение на економските политики на СДСМ, реалната куповна моќ на граѓаните е зголемена за 30,2 отсто.

Џевдет Хајредини е познат како прв министер за финансии во независна Македонија.

ВЕРУВАЛЕ ИЛИ НЕ За 6 години СДСМ за 30,2% ја зголемил куповната моќ на граѓаните

The post КУПОВНАТА МОЌ Е НАМАЛЕНА, А НЕ ЗГОЛЕМЕНА Џевдет Хајредини го демантира тврдењето на СДСМ appeared first on plusinfo.mk.

Во период на криза предизвикана од пандемијата, на која ѝ следеше најголемата економска и енергетска криза, кумулативно инфлацијата се зголеми за 29,1%, додека растот на просечната плата изнесуваше 59,3%“, што според СДСМ, значи дека „и покрај високиот ценовен притисок врз животниот стандард на граѓаните, куповната моќ е зголемена за 30,2 процентни поени“.

Од мај 2011 до мај 2017 година, за време на владеење на ВМРО-ДПМНЕ, инфлацијата кумулативно изнесувала 5,7 отсто, а растот на нето платата бил 9,2%, односно реалната куповна моќ на граѓаните се зголемила само за 3,5%, пресметал СДСМ.

Партијата најавува дека инфлацијата ќе се намалува, а платите и пензиите ќе растат.

The post ВЕРУВАЛЕ ИЛИ НЕ За 6 години СДСМ за 30,2% ја зголемил куповната моќ на граѓаните appeared first on plusinfo.mk.