Таткото на сопругата на обвинетиот Ѓоко Ристов, Ивица Зориќ и вештото лице Емилио Фришќиќ сведочеа денеска во Кривичниот суд како сведоци на одбраната во предметот за соѕиданите 350.000 евра што беа пронајдени во ѕид во куќата на родителите на разрешениот апелациски судија во Неготино. За овие пари на Ристов му се суди за Противправно стекнување и прикривање имот и за Перење пари.

Одбраната го прашуваше Зориќ за купување на стан на улицата Варшавска. Сведокот рече дека квадратурата на станот е околу 150 квадратни метри, бил купен за 140.000 евра и двете семејства се договориле да учествуваат со еднакви износи.

– Го уплати сватот, таткото на Ѓоко, тој беше слободен да ја следи изградбата. Заеднички го финансиравме станот, по 70.000 евра двете страни, ние за нашата единствена ќерка и сватот за својот син Ѓоко. Со изјава на нотар дека станот дополнително ќе биде впишан на мојот единствен внук Ивица Ристов Зориќ. Ние на една фамилијарна средба на сватовите им дадовме 70.000 евра, а се договоривме и да учествуваме и во опремувањето. Парите беа во евра, во банкноти од 200 и 500 евра – рече сведокот Ивица Зориќ.

Зориќ рече дека семејството имало добра материјална состојба и дека дел од имотот го наследиле од неговиот дедо, кој имал позната фабрика за чевли во поранешна Југославија и извезувал во странство.

Обвинителката Искра Хаџи Василева рече дека било симпатично да се слушнат нивните семејни практики и сакаше да праша и за стан во Охрид, но одбраната даде приговор дека тоа не е вкрстено прашање, бидејќи такво нешто не е споменато во директното испитување. Судијката Билјана Коцевска не го дозволи прашањето.

По рочиштето, прашан дали судот треба да му верува на исказот на родинината на Ристов кој не понуди материјален доказ за дадените пари, бранител на Ристов, Звонко Давидовиќ рече дека отсуството на материјален доказ за предавањето пари не би требало да има пресудно влијание, бидејќи и Обвинителството се потпира на  недоволно поткрепени тврдења.

– Најдени пари во куќа и ѕид на друго лице, тврди дека се негови, при што вели: „Не постои ни еден коруптивен предмет кој јас можам да го кажам и од каде што се земени парите“. Ние веќе неколку месеци водиме постапка на „жими мајка“ – изјави Давидовиќ.

Вештакот на одбраната Емилио Фришќиќ сведочеше дека ливчињата со испишани суми, кои беа најдени на дел од соѕиданите снопчиња со евра, ги пишувала мајката на обвинетиот судија, Донка Ристова, која тврдеше дека парите се нејзини и на нејзиниот сопругм заработени од земјоделие.

Фришчиќ објасни дека повеќе од 25 години работел во Министерството за внатрешни работи, вклучително и на раководни функции, а неговата стручност опфаќа испитување на спорни документи, ракописи и потписи, како и откривање фалсификати, хемиски бришења и други интервенции врз документи.

– Во врска со трите ливчиња со рачно напишани цифри, пронајдени во полиетиленските кеси во кои имало снопови пари, тие не се напишани од Ѓоко Ристов. Ракописот и цифрите на спорните документи не потекнуваат од раката на обвинетиот. Како автор на запишаните цифри ја идентификувам мајката на обвинетиот, Донка Ристова – рече Фришчиќ.

Адвокатката на обвинетиот Ристов праша дали при пишување, на листот хартија остануваат биолошки траги.

– Не секогаш остануваат траги. Ако лицето кое пишува со површината на кожата допира на хартијата, се оставаат епителни клетки. Но ако лицето носи ракавици и пишува и не ја допира хартијата, во таков случај нема да има ДНК, со сигурност – рече вештакот.

Според обвинителката Хаџи Василева, вештачењето е професионално изработен наод, со јасно определени критериуми и методологија, но го оцени како спин.

– Вештачењето јасно покажува дека ливчињата што биле најдени во парите се испишани од мајката на Ѓоко Ристов, Донка Ристова. Тоа дава интересен агол во вкупниот контекст на доказите, но одбраната повторно се обиде да направи спин и да ги поврзе ливчињата со ДНК-материјалот најден на фолиите  – рече таа.

Според обвинителката, одбраната се обидела да ги поврзе белешките испишани од мајката на судијата со ДНК материјалот пронајден на фолиите, за кој таа тврди дека му припаѓа на обвинетиот Ристов.

– Веројатно спинот беше на линија на некаква контаминација, но тешко е да поверуваме дека ливчињата Донка ги допирала или ги триела од обвинетиот Ѓоко, па теоретски да дојдеме до некое хипотетичко и фантастично сценарио дека оттука доаѓа до пренос на ДНК-материјал – изјави обвинителката.

Таа најави дека прашањата поврзани со ДНК доказите ќе бидат дополнително разгледувани на следното рочиште, кога треба да сведочи вешто лице предложено од Обвинителството.

Според Хаџи Василева, тогаш ќе се разгледуваат и правилата за пренесување и толкување на ДНК материјалот, кои се важни за оценување на доказите во постапката.

За исказот на Ивица Зориќ рече дека не заслужува особен коментар затоа што се однесува на факти кои се целосно неспорни, а не се предмет на обвинението.

Одбраната на денешното рочиште рече дека најверојатно ќе го повлекува предложениот сведок Љупчо Пецов-Ѓаволот, затоа што не може да го најде.

The post РАКОПИСОТ НА ЛИВЧИЊАТА КАЈ СОЅИДАНИТЕ 350.000 ЕВРА Е НА МАЈКАТА НА РИСТОВ, РЕЧЕ ВЕШТАК Според обвинителката, тоа е интересен агол appeared first on plusinfo.mk.

Сведоци предложени од одбраната на судењето против 13 полициски службеници обвинети за непостапување согласно акцискиот план во дискотеката „Пулс“ денеска сведочеа за присуството на полицијата пред и по пожарот во дискотеката. Едeн изјави дека како малолетник ја напуштил дискотеката поради полициска контрола непосредно пред избувнувањето на пожарот, друг рече дека по несреќата видел полициски службеници како помагаат во евакуацијата и расчистувањето на просторот, a трет сведочеше за тоа како полицајците им давале инструкции каде да ги транспортираат преживеаните.

Првиот сведок, кој во моментот на настанот бил малолетен, изјави дека во дискотеката пристигнал околу 1:15 часот и дека со пријателите го напуштил објектот откако биле предупредени дека надвор има полициска контрола.

– Дојде келнерот и ни кажа дека надвор имало полиција – рече сведокот, објаснувајќи дека тој и неговите другари во тој момент веќе биле кај вратата.

Тој наведе дека пред влезот бил задржан од полициски службеник кој им земал лични податоци. Според неговото сведочење, токму во тој момент од внатрешноста се слушнал повик дека има пожар.

– Некој од внатре викна дека се запалило и полицаецот ни кажа да бегаме од местото – изјави сведокот.

На прашање дали полицискиот службеник кој ги легитимирал е присутен во судницата, сведокот посочи кон обвинетиот Марјан Радевски.

На дополнително прашање дали би останале во дискотеката доколку немало полиција, одговори потврдно.

Во понатамошниот исказ наведе дека по избувнувањето на пожарот слушнал луѓе како повикуваат да се направи простор за евакуација.

– Слушнавме како некој вика „Правете место, правете место да излезат луѓе“, после тоа ние викнавме такси и си заминавме – изјави тој.

Одговарајќи на прашања од Oбвинителството, сведокот изјави дека непосредно пред пожарот видел полициски службеници кај влезот на дискотеката, но не забележал дали биле преземени други мерки освен идентификацијата на присутните. Потврди и дека нему не му била изречена прекршочна санкција.

На прашање од Судот, сведокот појасни дека полицискиот службеник им рекол да се оддалечат на безбедно место поради пожарот.

Вториот сведок сведочеше дека вечерта најпрво бил во кафулето „Булевар“, а потоа со пријателите се упатил кон дискотеката „Пулс“, каде пристигнале околу 2 часот по полноќ. Рече дека претходно забележал полициска акција во „Булевар“ и таму го видел обвинетиот Марјан Радевски, кого го познава бидејќи се од ист град.

Според неговото сведочење, подоцна го забележал Радевски и пред билетарницата на дискотеката.

– На шега му реков „вие по мене одите цело време, се видовме во „Булевар“, па потоа повторно во дискотеката – изјави сведокот.

Тој наведе дека во моментот на избувнувањето на пожарот се наоѓал во близина на влезот.

– Кога го видов пожарот ја земав јакната и излегов. Веднаш излегов, немаше гужва уште – рече тој.

Според неговите зборови, кратко по излегувањето следувала експлозија која го оттурнала по скалите.

– По кратко се случи експлозија и јас бев отфрлен долу на скалите на земја – сведочеше тој.

Изјави дека откако станал почнал да ги бара своите другари повторно стапил во контакт со обвинетиот Радевски.

– Го прашав дали ги виде другарите мои, а тој ми рече „Потргни се, не прави гужва тука или помагај“ – изјави сведокот.

Посочи дека пред влезот имало повеќе повредени лица на земја и дека заедно со полициски службеници учествувал во нивно поместување за да се расчисти пристапот.

– Марјан бараше да го расчистиме влезот кај скалите – рече тој, додавајќи дека му помогнал да се тргнат неколку лица настрана.

Сведокот изјави дека меѓу неговите другари имало и тешко повреден млад човек, кој подоцна бил лекуван во Шпанија. Откако ги пронашле сите членови на друштвото, со сопствено возило го пренеле повредениот во Штип.

Тој нагласи дека на местото имало и други полициски службеници.

– Сите таму што беа помагаа – изјави сведокот.

Третиот сведок сведочеше како добивале инструкции од полицајците да каде да ги транспортираат преживеаните.

Родител на една од жртвите денеска изјави дека покрај сведочењата, постојат и бројни видео-снимки објавени во медиумите кои, како што рече, треба да бидат оценети од Судот. Според него, клучните прашања остануваат дали воопшто требало да биде дозволено одржување концерт во објект што работел незаконски, зошто настанот не бил спречен ако не бил пријавен во МВР и дали навремено било реагирано поради употребата на пиротехнички средства.

Тој нагласи дека мора јасно да се направи разлика меѓу спасувањето и спречувањето на трагедијата.

– Спасувањето е реакција кога опасноста веќе настапила. Спречувањето е навремено постапување пред да бидат загрозени човечки животи. Семејствата очекуваат Судот да утврди не само кој помагал по трагедијата, туку и кој бил должен навреме да го спречи незаконскиот настан и опасностите што довеле до загубата на 63 човечки животи – рече родителот.

Судењето е поврзано со трагичниот пожар што избувна на 16 март 2025 година во дискотеката „Пулс“ во Кочани, во кој животот го загубија 63 лица, а 222 беа повредени. Во овој предмет се обвинети се 13 полициски службеници за Тешки дела против општата сигурност, за кои обвинителството тврди дека не постапиле согласно предвидените обврски и акцискиот план поврзан со работата на дискотеката.

Судењето го води судијката Фанка Јанчулева-Михаиловска, а застапник на обвинението е обвинителката Спасенка Андонова

The post СВЕДОЦИТЕ НА ОДБРАНАТА РЕКОА ДЕКА ПОЛИЦАЈЦИТЕ ПОМАГАЛЕ ПО ПОЖАРОТ ВО „ПУЛС“ Учестувале во евакуацијата на преживеаните и во транспортот на повредените appeared first on plusinfo.mk.

Вештакот Петре Русески, ангажиран од одбраната во случајот со пожарот во дискотеката „Пулс“ во Кочани, на денешното рочиште рече дека не смета дека постои основ за негово изземање, откако Обвинителството откри дека е обвинет за давање лажен исказ во друг предмет.

Во продолжението на вкрстеното испитување, Русески остана на ставот дека од градежен аспект објектот одговорил на својата намена и дека изведените зафати претставувале градежно-занаетчиски работи. Овој вештак го изработи градежното вештачење за одбраната на првообвинетиот Дејан Јованов и за двајца други обвинети.

Обвинителката Наташа Сарамандова на почетокот на рочиштето побара од вештакот Русески,  да одговори дали смета дека има основ за негово изземање. Таа укажуваа дека Јавното обвинителство пред да ангажира вешто лице прави проверки дали против него се води постапка или било осудувано и очекува тоа да го прават и другите странки во постапката.

Обвинителството посочи дека Русески на барање на обвинетите Николчо Коцев и Љупчо Стаменков има изработено вештачење во кое учествувала и е потпишана и Василка Каевска.

– Дали Василка Каевска, заедно со Николчо Коцев и Мирослав Грчев, покрај Вас, сте изготвувале правни вештачења и за „Инкс Дрим“ АД Струга, произнесувајќи се на материја за која сте ангажирани да вештачите и во овој предмет – праша обвинителката.

Русески одговори потврдно.

– Да, така е. Сите работиме под закон… Инаку 11 вештаци се обвинети за лажен исказ, врз основа на изјава на еден вештак. И тоа е обвинение што 2 години нема рочиште. Не сметам дека треба да бидам изземен – изјави вештакот.

Русески потоа појасни дека вештите лица Василка Каевска, како вештак од областа на архитектурата, работела со него „за полесно да одговориме на прашањата поставени од барателите“, а вештото лице Инает Ертани, геодет, бил консултант „повеќе како советодавна улога“.

Одбраната реагираше на ваквиот начин на поставување прашања, посочувајќи дека Обвинителството продолжува со малтретирање и навреда на вештакот затоа што „не располагала со прашања што ќе ги поткрепат своите наводи“.

Потоа јавниот обвинител Дарко Јакимовски продолжи со вкрстени прашања за вештакот Русески и му укажа на дел од неговото вештачење каде вели дека „се задоволени основните минимално-технички услови во објектот, дека се обавува угостителска дејност кабаре, дека се врши лесна интервенција со преградни ѕидови“, а во друг дел вели „во однос на целосната противпожарна функционалност, евакуацијата, електричната инсталација, машинската вентилација, паничното осветлување, минимално-техничките услови и другите потребни безбедносни услови… потребна е оценка од соодветни овластени стручни лица или надлежни органи од тие области. Ова мислење се ограничува на градежно – архитектонскиот аспект на објектот“.

Вештакот Русески ги потврди ваквите ставови, одговарајќи „да, така е наведено“.

– Што се однесува до тоа дали конструкцијата имала влијание врз пожарот, реков треба да се испита дали материјалите го ширеле пожарот и како градбата регирала… од мој градежен аспект објектот и материјалите во него не придонел и не била надмината неговата противпожарна околност и целосно одговорил на својата намена. Од градежен аспект нема последици на пожарот – изјави вештакот.

На прашање дали внатрешното уредување и организација на внатрешниот простор, исто така е градежен аспект, сведокот рече, „тоа рековме се градежно-занаетчиски работи“.

– Во смисла на зборот адаптација се согласувам со професорката Мирјана дека нема адаптација. Дефинитивно нема реконструкција од градежен аспект, нема промена во деловниот простор и дефинитивно се градежно-занаетчиски работи на внатрешно ентериерно уредување на просторот – рече вештакот.

На укажување од Обвинителството дека Законот за градење не познава термин „градежно-занаетчиски работи“, вештакот рече дека „градежно-занаетчиските работи не се дефинирани во Законот за градење затоа што за нив не е потребно одобрение, овластување и лиценци, а инаку за секој предмет тие се неопходни и се користат“.

Судењето за пожарот во „Пулс“ во Кочани продолжува во судницата на Кривичниот суд во Идризово со изведување докази предложени од одбраната.

Пожарот во дискотеката се случи на 16 март 2025 година за време на концерт на групата ДНК. Загинаа 63 луѓе, а 222 беа повредени.

The post ОБВИНИТЕЛСТВОТО ГО ОСПОРИ ВЕШТАКОТ НА ГАЗДА ДЕКО, БИЛ ОБВИНЕТ ЗА ЛАЖЕН ИСКАЗ Вештакот Русевски смета дека тоа не е пречка за процесот за „Пулс“ appeared first on plusinfo.mk.

Основниот кривичен суд Скопје го одби барањето на одбраната за враќање на патната исправа на поранешниот прв вицепремиер  Артан Груби, кој е второобвинет во предметот „Лотарија на Македонија“ и покрај понудеата гаранција од над 300.000 евра во недвижен имот. Мерката куќен притвор му е укината по сила на законот. но обвинетиот и натаму останува без пасош, а против него се определени дополнителни мерки за претпазливост.

Од Кривичниот суд информираат дека одлуката за укинување на куќниот притвор е донесена поради истекување на законски дозволениот рок од 60 дена, сметано од денот на поднесувањето на обвинителниот предлог.

Според член 470 од Законот за кривичната постапка, мерката притвор, односно куќен притвор, определена по поднесен обвинителен предлог, не може да трае подолго од 60 дена. Во конкретниот случај, обвинителниот предлог бил поднесен на 13 август 2026 година, поради што Кривичниот совет донел решение за укинување на мерката.

Судот го прифатил предлогот на Основното јавно обвинителство за определување дополнителни мерки за претпазливост. Со нив, на Груби му се забранува напуштање на живеалиштето, односно престојувалиштето, има обврска повремено да се јавува во судот, како и забрана за приближување и остварување контакти со одредени лица.

Останува во сила и забраната за издавање нов пасош или друг документ со кој би можел да ја премине државната граница.

ГРУБИ ДЕНЕСКА ИЗЛЕГУВА ОД КУЌЕН ПРИТВОР Понуди гаранција од 335.707 евра

The post ОБВИНЕТИОТ ГРУБИ Е НА СЛОБОДА, НЕ СМЕЕ ДА ГО НАПУШТИ СКОПЈЕ Судот не му го врати пасошот appeared first on plusinfo.mk.

И Здравко Ристов, таткото на обвинетиот апелациски судија Ѓоко Ристов денеска во Кривичниот суд, исто како и мајката Донка Ристова, сведочеше дека парите се негови и на сопругата, а не на нивниот син, како што тврди Обвинителството.

Тој рече дека нивните деца не знаеле дека чуваат 350.000 евра соѕидани зад плочки во кујната во семејната куќа во Неготино.

Парите беа пронајдени при претсрес, а Обвинителството го товари сега веќе разрешениот судија Ристов дека ги стекнал незаконски и го обвини за Противправно стекнување и прикривање имот и за Перење пари и други приноси од казниво дело.

На прашањето зошто не ги пријавил парите додека се вршел претресот, Здравко Ристов рече дека немал доверба за да ги пријави.

– На кого да пријавам, немам верба во државата. Сум се мачел за нив со овие 10 прсти. Децата не знаеја. Кога им требаше ќе им дадев, ќе ми ги вратат. На полицијата им реков дека се наши парите, мои и на сопругата – рече таткото Ристов.

Додаде дека парите во зидот ги ставала сопругата Донка.

– Јас пари не ставав. Таа беше должна. Јас печалев, невестата ги чуваше – рече тој.

Додаде и дека не им ги дал парите на децата, затоа што „можеби и ќе ги искоцкаа, ништо не се знае“.

Објаснувајќи како ја создавале големата заштеда, рече дека заработените пари ги менувал во менувачници, вклучително и во банкноти од 500 евра.

– Како сум ги печалел, така сум ги менувал – рече тој.

На прашањето како обезбедувал банкноти од 500 евра, одговори дека имал познаник на Бит-пазар кој го известувал кога имало такви апоени.

Обвинителката го праша и за заштедите во банка, каде тој и сопругата имале по речиси 15.000 евра. Ристов потврди тоа, а на дополнително прашање кажа дека парите од продажбата на тракторот и останатите земјоделски машини ги уплатиле во банка.

На прашањето како на парите не се најдени негови траги од ДНК, туку на неговиот син, тој рече дека за тоа нема шанса.

Случајот против Ристов произлегува од истрагата против адвокатот Фехми Стафа, кој беше фатен при примање 20.000 евра, дел од наводно договорени 100.000 евра за противзаконито влијание врз апелациски судија со цел да се укине мерка притвор за Љупчо Пецов Ѓаволот.

„ПРОДАВАВ ПИПЕРКИ, ПА ПАРИЧКИТЕ ГИ ПИКАВ ВО ДУПЧЕТО“ Мајката на судијата Ристов тврди дека таа чувала 350.000 евра во ѕидот

The post „ЈАС ПЕЧАЛЕВ, НЕВЕСТАТА ГИ ЧУВАШЕ ПАРИТЕ“ Таткото на судијата Ристов тврди дека соѕиданите 350.000 евра се негови, а не на синот appeared first on plusinfo.mk.

Мајката на сега веќе разрешениот апелациски судија судијата Ѓоко Ристов, Донка Ристова, во чија куќа во Неготино беа најдени соѕидани 350.000 евра, на денешното судење во Кривичниот суд тврдеше дека парите се нејзини и на сопругот Здраве Ристов. Според Обвинителството, парите се на судијата Ристов, а потекнуваат од кривични дела, за што тој е обвинет за Противправно стекнување и прикривање имот и за Перење пари и други приноси од казниво дело.

Според неа, пронајдените 350.000 евра се заштеда од повеќедецениска земјоделска работа, која ја чувале сокриена во дупка зад плочки во кујната. Ристова е сведок на одбраната.

Одговарајќи на прашањата на обвинителката Искра Хаџи Василевска, Ристова рече дека првиот претрес кај нив е  извршен на 29 декември 2025 година, кога полицијата не пронашла ништо.

Вториот претрес е извршен во јануари 2026 година, додека таа била на лекување. Раскажа дека не можела да присуствува, па нејзиниот помлад син го однел сопругот во куќата во Неготино. При второто пребарување полицијата го пронашла местото на кое ги чувала парите.

– Тоа беше горе, во горната ниша, зад фрижидерот, зад работната маса. Таму си најдов згодно место, не од сега, не од лани, туку од 1975 година и што ќе ми останеше некоја паричка, ќе ја отворев една плочка, како прозорче… Плочката беше залепена на четири места за да не падне. Се отвора како прозорче, ниту е ѕидано, ниту е кршено. Во фолија си ги ставав паричињата, колку ќе имав толку. Таму имаше 350.000 евра – рече таа.

Тие ми беа гаранција за стари години, за сè, за тешки денови, додаде таа.

– Парите беа 250.000 евра по 50 евра, а другите 100.000 евра беа по 500 и по 100 евра. Тие парички цел живот се печалени. Од секаде. Од каде ќе продадам роба, ние сме земјоделска куќа. Бостан, диња, пипер, ореви, кајсии, сè имавме. Секаде по пазар одев, додека не почнавме да се занимаваме со лозје. Секаде сум била, госпоѓо судијке, сме биле до Горни Милановац, да ви кажувам ќе се чудите. Цела Македонија сме ја поминале додека да го оформиме лозјето, а потоа имавме голем добиток од лозјето, по 40 тони – сведочеше мајката на судијата Ристов.

Таа рече дека парите што ги заработувале од продажбата на земјоделските производи отпрвин ги менувале во германски марки, а подоцна во евра.

– Ако продавам во Прилеп црвен пипер, веднаш ќе купам марки, тогаш беа марки, па евра. И за да не бидат помали пари, ги претворавме во поголеми евра, да не фаќаат место. Не ги броев, но ќе ги пикнев во дупчето од циглите. Кога ќе се стеснеше, во друго – рече таа.

На прашање кој знаел за сокриената заштеда, одговори дека никој друг не знаел за парите, освен таа и сопругот.

Рече дека нејзиниот сопруг бил многу вреден и печалел. За да објасни колку работеле, Ристова рече и дека таа плетела и до два-три часот по полноќ.

– Човек кој е вреден и ноќе произведува пари – додаде таа.

Мајката Ристова рече дека последен пат ставала пари во скривницата пред околу 4 години, односно во периодот 2023–2024 година, кога имала здравствени проблеми.

Обвинителката ја праша зошто толкава сума пари не ја чувале во банка.

– Банката не гарантира повеќе. Цела банка ја затворија, луѓето се бесат. Службеници од банките си вадат пари од сметките на луѓето, нема никаква гаранција – одговори Ристова.

Таа откри и за што планирала да ја искористи заштедата.

– Планот ми беше да платам 100.000 евра за кревет во Геријатрија. За три години ние двајца ќе ги изедеме тие пари – рече Ристова.

За хартиените белешки пронајдени заедно со парите, објасни дека самата ги запишувала износите за да знае колку банкноти има во секое пакување.

Ристова рече и дека од децата никогаш не земала ниту денар.

На прашање на обвинителката одговори дека таа ја направила продажбата на нивата на фирма за фотоволтаици, но тие пари не ги ставила во ѕидот.

– Тоа ми беше клетва од татко ми, од недвижност пари да се вложат во недвижност – рече таа.

Обвининителката поентираше дека, покрај сумата која била во ѕидот, родителите на Ристов им помогнале и на двата сина да купат станови, на што Донка Ристова одговори потврдно.

На прашањето на судијката, зошто на фолијата во кои биле замотени парите била најдена ДНК и од нејзиниот син Ѓоко Ристов, таа одговори дека тоа не ѝ се верува, бидејќи парите биле нејзини.

Случајот против разрешениот апелациски судија Ѓоко Ристов произлегува од истрагата против адвокатот Фехми Стафа, поранешен државен правобранител, кој беше фатен при примање 20.000 евра, дел од наводно договорени 100.000 евра за противзаконито влијание врз апелациски судија со цел да се укине притворот за Љупчо Пецов Ѓаволот. Стафа ја призна вината, склучи спогодба со Обвинителството и беше осуден на една година и три месеци затвор.

На минатото рочиште Стафа беше сведок на одбраната и рече дека парите со кои бил фатен се адвокатска награда и дека никогаш не му дал пари на Ристов. Рече дека го признал делото зашто се плашел од поголема казна, како и дека во истрагата му било сугерирано да каже дека парите се за Ѓоко Ристов за да се спаси од кривична одговорност.

The post „ПРОДАВАВ ПИПЕРКИ, ПА ПАРИЧКИТЕ ГИ ПИКАВ ВО ДУПЧЕТО“ Мајката на судијата Ристов тврди дека таа чувала 350.000 евра во ѕидот appeared first on plusinfo.mk.

Второобвинетиот во предметот „Државна лотарија“, поранешниот вицепремиер Артан Груби понудил гаранција од недвижен имот во вредност од 335.707 евра, за да му биде вратен пасошот, откако на 13 окмтомври ќе му истече мерката куќен притвор.

Мерката куќен притвор понатаму не може да му се продолжува, затоа што за делото за кое е е обвинет може да трае најдолго 60 дена.

Од Кривичниот суд информираат дека за понудената гаранција е отворен предмет кој е испратен на мислење во Јавното обвинителство.

„Основниот кривичен суд Скопје ја известува јавноста дека обвинителниот предлог, по кој е заведен кривичниот предмет против Груби и другите обвинети е поднесен на 13 август 2026 година. Согласно член 470 од Законот за кривичната постапка, притворот може да трае најдолго 60 дена од денот на поднесувањето на обвинителниот предлог. Поради тоа, како што беше посочено и претходно, а истото беше потенцирано и од страна на судијата кој постапува по предметот, по сила на Законот мерката куќен притвор за овој обвинет истекува на 13 октомври 2026 година“, соопшти Кривичниот суд.

Воедно, покрај мерката куќен притвор, против обвинетиот е определена и дополнителна мерка на претпазливост, односно, привремено одземање на патната исправа и забрана за издавање патна или друга исправа за преминување на државната граница, која ќе продолжи да важи и по истекот на законски предвидените 60 дена, додава Кривичниот суд.

„Во однос на оваа мерка на претпазливост одбраната до Судот достави предлог, со кој, согласно член 150 од Законот за кривичната постапка, предлага нејзино укинување со определување гаранција. Имено, одбраната понуди недвижен имот во вредност од 335.707 евра како гаранција дека обвинетиот ќе биде достапен на органите на прогонот во текот на кривичната постапка. По понудената гаранција е оформен предмет, кој е доставен на мислење до надлежното јавно обвинителство. По добивањето на мислењето, Кривичниот совет ќе постапува по предлогот, а за донесената одлука странките и јавноста ќе бидат навремено известени, соопшти Кривичниот суд.

По истрагата за проневера во Лотарија, Груби избега од Македонија, а по 14 месеци бегство, се врати на 23 февруари 2026 година. Тој беше избеган во Косово, а за преминување на косовската граница не е потребен пасош.

Обвинението протов него и останатите петмина е подигнато за кривичното дело Злоупотреба на службената положба при набавката на апарари за игри на среќа за „Државна лотарија“ во вредност од 8,2 милиони евра.

Првообвинет е поранешниот директор на „Државна лотарија“ Прпарим Бајрами, кој, исто така, беше во бегство, како и четворца членови на Управниот одбор на дравната компанија за игри на среќа.
Судењето за овој предмет е во тек во Кривичниот суд.

The post ГРУБИ НУДИ 335.707 ЕВРА ГАРАНЦИЈА ЗА ДА МУ СЕ ВРАТИ ПАСОШОТ Куќниот притвор му истекува на 13 октомври appeared first on plusinfo.mk.

Адвокатката Ивана Коцевска, бранителка на сопственикот на дскотеката „Пулс“, Дејан Јованов  Деко, реагираше на новата истрага за поткуп и повторното определување притвор за нејзиниот клиент. Таа оцени дека одлуката на Обвинителството за нова истрага била однапред подготвена.

Коцевска рече дека не е изненадена, но е вознемирена од тоа што новата истрага е отворена непосредно пред истекот на законскиот рок во кој Јованов можеше да остане во притвор.

– Не сум изненадена, но сум вознемирена. Сметам дека ова е конструкција на Обвинителството, а одлуката за притвор, според мене, е однапред донесена – изјави Коцевска.

Законскиот рок за притворот на Јованов по обвинението за пожарот во „Пулс“ истекува утре, по што тој требаше да биде пуштен. Но, со отворањето на новата истрага, овој пат за поткуп, тој доби нов притвор.

Новата истрага е за сомневања дека Јованов дал поткуп на вработен во Министерството за економија со цел да добие лиценца за работа, иако, според ОЈО ГОКК, бил свесен дека објектот „Пулс“ не ги исполнува законските услови.

Адвокатката смета дека прашањата поврзани со лиценцата и со исполнувањето на условите во објектот веќе се предмет на разгледување во постапката поврзана со пожарот во кочанската дискотека.

– Овие наводи веќе се дел од расправата во предметот за трагедијата во „Пулс“. Сметам дека под притисок на јавноста се отвора нова истрага, која претставува конструкција и измислица – рече Коцевска.

Јованов денеска доби нов 30-дневен притвор, а утре треба да биде префрлен од притворот во Куманово во притворот во Шутка.

ГАЗДА ДЕКО ОД КУМАНОВО ОДИ ВО ШУТКА Судот му одреди притвор од 30 дена во новата истрага за поткуп

The post КОЦЕВСКА СЕ СОМНЕВА ДЕКА ОДЛУКАТА ЗА ПРИТВОР НА ДЕКО Е ОДНАПРЕД ДОНЕСЕНА Адвокатката на Јованов е вознемирена, но не е изненадена appeared first on plusinfo.mk.

Кривичниот суд Скопје на предлог на Јавното обвинителство му одреди притвор од 30 дена на Дејан Јованов Деко, првообвинет за катастрофалниот пожар во дискотеката „Пулс“ во Кочани, за да се обезбеди неговата достапност во новата истрага за поткуп што ЈО ја води против него.

Јованов е во притвор за предметот за самиот пожар, за кој е во тек судење, а утре, 3.10.2026 година истекува законскиот едногодишен рок на времетраење на притворот и се очекуваше тој да биде пуштен, а Судот да му одреди поблаги мерки за обезбедување присуство на судењата. Но, вчера Јавното обвинителство за гонење организиран криминал и корупција информираше дека против Јованов се води нова истрага, поради што ЈО ќе побара нов притвор.

• ДАВАЛ ПОТКУП ЗА ЛИЦЕНЦА ИАКО „ПУЛС“ НЕ ГИ ИСПОЛНУВАЛ УСЛОВИТЕ Обвинителството бара да му биде определен нов притвор

„Судија на претходна постапка при Основниот кривичен суд Скопје, постапувајќи по предлогот на Јавниот обвинител од ОЈО ГОКК за определување мерка притвор против Д.Ј. од Кочани, по произнесување на осомничениот, во присуство на неговиот бранител, како и по ценење на фактите и доказите приложени кон предлогот, донесе решение со кое го прифати предлогот и определи мерка притвор во траење од 30 дена. Притворот е определен поради постоење на основите предвидени во член 165 од Законот за кривичната постапка (ЗКП), односно поради постоење опасност осомничениот да се даде во бегство, како и поради основан страв дека може да ја попречува истрагата со влијание врз сведоци“, соопшти Кривичниот суд.

Мерката притвор започнува да се извршува од 3.10.2026 година, имајќи предвид дека лицето во моментот веќе издржува мерка притвор во предметот поврзан со пожарот во дискотеката „Пулс“, се додава во соопштението.

„Во новоотворената истрага, за која е предложен притворот, Д.Ј. е осомничен дека сторил кривично дело Давање поткуп од член 358 став 1 од Кривичниот законик. Имајќи предвид дека осомничениот, мерката притвор определена во предметот „Пулс“ ја издржуваше во КПУ Затвор Куманово, со оглед дека првично му беше определена од Основниот суд Кочани, сега истиот ќе биде префрлен на издржување на новоопределената мерка притвор во Затвор „Скопје“, согласно Правилникот за спровод и издржување на определените мерки за обезбедување присуство“, соопшти Судот.

Судот информира и дека одбраната на Јованов ја повлекла понудената гаранција.

„Во врска со предлогот на одбраната на Јованов за укинување на претходно определената мерка притвор во предметот „Пулс“, со определување гаранција во износ од околу 200.000 евра во недвижен имот, истата од страна на одбраната денеска е повлечена. Против решението на судијата на претходна постапка со кое е определена мерката притвор, одбраната има право на жалба по која одлучува Кривичниот совет“, соопшти Кривичниот суд.

ДЕКО ПОНУДИЛ ПЛЕВНИ И ШУПИ КОИ СЕ ПРЕДМЕТ НА ИЗВРШУВАЊЕ И НЕ ВРЕДАТ 200.000 ЕВРА Обвинителството бара Судот да не ја прифати гаранцијата

The post ГАЗДА ДЕКО ОД КУМАНОВО ОДИ ВО ШУТКА Судот му одреди притвор од 30 дена во новата истрага за поткуп appeared first on plusinfo.mk.

Нови проекти за развој на АД „Државна лотарија“, вклучително и формирањето на „Ново ВЛТ“, интернет-платформата „Мегавин.мк“ и иницијативата за самостојно приредување електронски игри на среќа, биле покренати во мандатот на Перпарим Бајрами, сведочеше денеска пред Кривичниот суд Владо Петковски, директор на Секторот за игри на среќа во друштвото.

Сведокот Петковски, вработен во АД „Државна лотарија“ од декември 2017 година и актуелен директор на Секторот за игри на среќа, денеска на судењето за предметот „Државна лотарија“ изјави дека по доаѓањето на поранешниот генерален директор Перпарим Бајрами биле иницирани повеќе нови проекти за развој на портфолиото и зголемување на профитот на компанијата, но посочи дека не може да тврди од кои причини дошло до смената на претходната директорка Катица Николовска Прнакова.

Петковски, одговарајќи на прашања од обвинителството, рече дека во текот на својот ангажман во компанијата извршувал повеќе раководни функции.

– Вработен сум во Лотарија од декември 2017 година. Работам на позиција директор на продажба и комерција. Во текот на своето работење сменив неколку раководни позиции. Следната е директор на игри на среќа, потоа главен меѓусекторски директор кој опфаќаше три сектори – изјави сведокот.

На прашањето дали му се познати причините за смената на Катица Николовска Прнакова и назначувањето на Перпарим Бајрами, сведокот одговори „не можам да тврдам, да ја кажам причината зошто беа променети“.

Во врска со работењето на двајцата директори, Петковски направи споредба само во делот на развојните политики на компанијата.

– Можам да кажам само во однос на развојот на компонентите, портфолиото на Државна лотарија. Во времето на Катица речиси немаше никакви нови проекти. Откако дојде новиот директор, проактивно се ангажираше за имплементација на нови проекти со цел зголемување на портфолиото и раст на профитот на Државна лотарија – рече тој.

Според сведокот, меѓу првите иницијативи било формирањето на друштвото „Ново ВЛТ“.

-Се почна со идејата за формирање ново друштво по примерот на веќе постоечкото друштво Државна видео лотарија, каде Државна лотарија се јавува како содружник заедно со „Казинос Аустриа“. Тоа друштво функционираше речиси две години, се вика „Ново ВЛТ“ – изјави Петковски.

Тој наведе дека потоа следувале проектите „Мегавин.мк“, како интернет-платформа во целосна сопственост на Државна лотарија, самостојното приредување електронски игри на среќа и формирање три интернет-друштва преку заеднички вложувања со приватни партнери.

Објаснувајќи ја идејата зад „Ново ВЛТ“, сведокот истакна дека друштвото било формирано за приредување електронски игри на среќа, но не започнало со работа поради законски пречки.

– Требаше да функционира за приредување електронски игри на среќа, но автентичното толкување на законот не дозволи ова друштво да работи, односно да ги пушти во употреба тие ВЛТ терминали – рече тој.

Според него, намерата била Државна лотарија самостојно да ги организира овие игри.

-Идејата почна да се набават ВЛТ терминали со кои Државна лотарија ќе приредува самостојно и целиот профит ќе остане во Државна лотарија наместо да биде поделен со „Ново ВЛТ“ и „Казинос Аустриа“, изјави Петковски.

Во таа насока, додаде, биле обезбедени повеќе анализи и мислења од релевантни институции.

-Се добија низа документи од професорски мислења, физибилити студии, истражувања на пазар, мислења од владини институции, Министерството за финансии и самата Влада. Се собираа сите поткрепувачки релевантни документи иако веќе беше формирано „Ново ВЛТ“ и сметав дека не би било спорно затоа што јас учествував во сите набавки – рече сведокот.

Тој посочи дека по донесувањето на финансискиот план била спроведена јавна набавка и дека Управата за јавни приходи дала позитивно мислење.

– Врз основа на тоа се донесе финансиски план за набавка на тие апарати. Откако финансискиот план влезе во план за јавни набавки се направи јавна набавка. УЈП се произнесе позитивно, но не стигна согласност од Министерството за финансии бидејќи се донесе тоа автентично толкување на законот, по што сите процеси беа блокирани – изјави Петковски.

Во однос на потеклото на идејата за овие проекти, сведокот изјави дека тие биле предмет на дискусија на колегиумите на раководството.

– Идејата се дискутираше на колегиумот кои ги водеше директорот Перпарим Бајрами. Имаше многу идеи за проактивни проекти, но тие требаше да се проверат најверојатно со релевантни институции на Владата за да се знае законитоста и можноста да се пристапи кон нив, рече тој.

Говорејќи за односот меѓу Перпарим Бајрами и Артан Груби, сведокот рече дека нема непосредни сознанија.

– Не можам да утврдам со сигурност, немам непосредна ситуација каде можам да кажам дека тие двајца се пријатели – изјави Петковски.

Тој додаде дека директорите на Државна лотарија често комуницираат со Владата поради природата на работата на компанијата. На прашање дали некогаш Бајрами го спомнал Груби, одговори дека не се сеќава.

– Можеби го спомнал, но не го спомнал во врска со конкретни работи за Државна лотарија – рече сведокот, додавајќи дека не присуствувал на средба меѓу Бајрами и Груби.

Во текот на рочиштето, јавното обвинителство побара сведокот да биде вкрстено испитан, оценувајќи дека поради дадените одговори повеќе не може да се смета за сведок на странката што го предложила. На предлогот се спротивставија бранителите, меѓу кои Еленко Миланов, како и бранителите на Артан Груби и Јордан Апостолски. Судот го прифати барањето и судењето продолжи со вкрстено испитување на сведокот од страна на обвинителството.

Овој сведок, исто така, во истражната постапка бил испитуван и од страна на обвинителството и како осомничен.

Во предметот „Државна лотарија“, покрај Артан Груби и Перпарим Бајрами, обвинети се и Башким Авди, Методија Димовски, Скендер Мехмети, Бојан Јанев, Фатмир Рамадановски и Александар Димитриоски.

Според обвинението, тие со пречекорување на службените овластувања предизвикале штета на АД „Државна лотарија“ во износ од 596.125.511 денари.

Сите обвинети во досегашниот тек на постапката се изјаснија дека не се чувствуваат виновни.

Обвинението го застапуваат јавните обвинители Даниел Коцев и Александар Давчевски, а судската постапка ја води судијката Билјана Шуплиновска-Јовевски.

The post БАЈРАМИ ИНИЦИРАЛ НОВИ ПРОЕКТИ ВО ДРЖАВНА ЛОТАРИЈА „Ново ВЛТ“, „Мегавин.мк“ и самостојни електронски игри биле дел од плановите appeared first on plusinfo.mk.