Премиерот Христијан Мицкоски ги отфрли критиките на СДСМ за проектот со антимонот кај Крива Паланка, тврдејќи дека опозицијата „си измислила тема“ наместо да го слушне ставот на локалното население.

Тој посочи дека станува збор за рударски крај и дека поддршка за рударството, според него, има и од градоначалникот на Крива Паланка од редовите на СДСМ.

– Ќе си измислат тема — овие се за податочен центар, ќе ни ја земат водата, струјата… луѓето коишто ја разбираат оваа проблематика се смеат. Си измислија тема за антимонот. Појдете во Крива Паланка и прашајте ги луѓето. Тоа е рударско место, таму веќе го има рудникот „Тораница“, којшто, патем речено, сега конечно се среди – вели премиерот Мицкоски во гостување на ТВ Алфа.

Мицкоски го поврза ставот на локалното население со егзистенцијата на семејствата во овој рударски крај. Според него, за проблемите со рударството лично му се обратил и градоначалникот на Крива Паланка, кој е од СДСМ.

Премиерот тврди дека барањето било да се помогне во решавањето на проблемот поради опасноста без егзистенција да останат стотици или илјадници семејства. Тој го поврза прашањето и со иселувањето од градот.

– Сето ова кога ќе го анализирате, ќе дојдете до заклучок: дајте да си ја тераме нашата работа, да ги реализираме целите, програмата, сè она што го имаме зацртано. А што и да правиме, тие ќе си ја кажуваат својата лага, својата измислица — живеат во тој паралелен свет. Тие своето, ние своето. На крајот од денот ќе има избори, па граѓаните ќе одлучат – потенцираше Мицкоски.

The post ПРАШАЈТЕ ГИ ВО КРИВА ПАЛАНКА ДАЛИ СЕ ПРОТИВ АНТИМОНОТ Мицкоски го потсети СДСМ што побарал нивниот градоначалник appeared first on plusinfo.mk.

Тешка сообраќајна несреќа со трагичен исход се случила вчера (недела) околу 13 часот на магистралниот пат Крива Паланка – Куманово, во атарот на селото Градец.

Според информациите од МВР, мотоцикл со неготински регистарски ознаки, управуван од М.Н. (50) од Неготино, удрил во банкина.

Од здобиените повреди, 50-годишниот мотоциклист починал на самото место.

Несреќата била пријавена во ОВР Крива Паланка, а увид на местото извршила полициска екипа.

Се очекува надлежните да ги утврдат околностите под кои дошло до трагичната сообраќајна несреќа.

The post СО МОТОР УДРИЛ ВО БАНКИНА И ПОЧИНАЛ НА МЕСТОТО Несреќа на патот Крива Паланка – Куманово appeared first on plusinfo.mk.

Силно невреме во саботата вечерта зафати повеќе градови и населени места во североисточниот и источниот дел на Македонија. Пороен дожд, силен ветер и грмежи имаше во Куманово, Крива Паланка, Делчево, Виница, Кочани и околните населени места, а од терен пристигнуваат информации за материјални штети и проблеми во сообраќајот.

На фотографиите по невремето може да се забележат расфрлани делови од покривни конструкции и друг материјал по улиците, како и паднати гранки и дрвја. На одредени места сообраќајот бил отежнат или прекинат.

Сериозна е состојбата и во Облешево, каде што по невремето има прекин во снабдувањето со електрична енергија, а регистрирани се и проблеми во сообраќајот. Невремето со пороен дожд и силен ветер предизвикало повеќе проблеми и штети.

Невреме проследено со силен ветер и дожд синоќа нешто по 20 часот го зафати Кочани и регионот. На повеќе локации во градот предизвикани се проблеми во сообраќајот и во нормалното движење на луѓето.

Делови од градот беа без електрична енергија. Сообраќајот на магистралниот пат Кочани–Штип беше во прекин поради наноси и паднати дрвја на коловозот.

Блокирани беа и неколку патни правци околу Кочани. Стопиран беше и сообраќајот на излезот од градот кон Виница, поради срушени стебло од дрво и гранки непосредно после СОУ ” Гошо Викентиев”.

Екипи на ТППЕ веднаш изчегоа на терен и до доцна во ноќта го расчистуваа теренот за да ја вратат проодноста и функционалнсота на градот.

Според податоците на Управата за хидрометеоролошки работи најмногу врнежи во изминатите 24 часа се измерени во Крива Паланка – 30 литри на метар квадратен. Поради невремето концертот закажан за синоќа на Градскиот стадион во Крива Паланка се одложи за денеска, недела. Требаше да настапат Слаткаристика, Лепа Брена и Ацо Пејовиќ, но невремето значително ја оштетил сценската и техничката опрема.

Според интензитетот на врнежите, следуваат Струмица со 18 l/m², Виница со 13, Берово со 8, Тополчани со 6, Битола со 3, додека во Радовиш, Пожар и Крушево се измерен по 1 литар на метар квадратен.

Од УХМР напоменуваат дека поради локалниот карактер на временските процеси, количината на врнежи може значително да варира, па на одделни места може да паднал и многу поголем воден талог.

За денеска се очекува сончево и топло време со мала до умерена локална облачност, но наместа ќе има услови за пороен дожд, грмежи и засилен ветер. Максималната температура ќе се движи од 29 до 36 степени.

Во Скопје ќе биде сончево и топло, со максимална температура до 36 степени.

The post 🎥 СИЛНО НЕВРЕМЕ ЈА ПОГОДИ СЕВЕРОИСТОЧНА И ИСТОЧНА МАКЕДОНИЈА Најмногу дожд во Крива Паланка, најкритично во Облешево appeared first on plusinfo.mk.

Сопружници кои се наоѓаат во бракоразводна постапка меѓусебно се пријавиле во полиција за физички напад по инцидент што се случил во станбена зграда во Скопје.

Од СВР Скопје информираат дека на 27 јули 2026 година во 00:15 часот, 25-годишен маж од Крива Паланка пријавил дека претходната вечер, околу 21:00 часот, во станбена зграда во Скопје бил физички нападнат од неговата 31-годишна сопруга од Штип, со која е во бракоразводна постапка.

Неколку часа подоцна, во 02:30 часот, и 31-годишната жена поднела пријава во полиција, тврдејќи дека истиот ден, околу 21:00 часот, во истата станбена зграда во Скопје била физички нападната од нејзиниот 25-годишен сопруг.

Од полицијата велат дека се преземаат мерки за целосно расчистување на случајот и утврдување на сите околности поврзани со инцидентот.

The post ДРАМА СРЕДЕ БРАКОРАЗВОДНА ПОСТАПКА Мажот ја пријавил сопругата дека го тепала, а таа го тврди обратното appeared first on plusinfo.mk.

Пет пожари на отворен простор биле регистрирани низ Македонија во текот на денот до 13 часот, а три од нив и понатаму се активни, информираше Центарот за управување со кризи (ЦУК).

Активни се пожарите кај селото Желино, во општина Желино, каде гори ниска вегетација, како и пожарот кај патарината кон Гостивар, на територија на општина Боговиње, каде исто така е зафатена ниска вегетација.

Третото активно огнено жариште е во општина Крива Паланка, во подрачјето познато како „Думачка Маала“. Таму пожарот зафатил ниска вегетација и багремови насади.

Од ЦУК информираат дека во текот на денот биле изгаснати два пожари.

Едниот пожар бил регистриран во општина Струмица, во близина на селото Просениково, каде горело ѓубре, додека вториот бил во регионот на Старо Нагоричане, каде била опожарена ниска вегетација.

Надлежните служби продолжуваат со следење на состојбата на терен и со преземање активности за локализирање и гаснење на активните пожари.

The post ГОРИ КАЈ ЖЕЛИНО, БОГОВИЊЕ И ВО КРИВА ПАЛАНКА Пет пожари до 13 часот, активни сѐ уште активни appeared first on plusinfo.mk.

„Фондација Македонија“ на контроверзниот Виктор Стојанов, организација финансирана од бугарската држава, вчера на фејсбук-профилот објави пријава до бугарските даночни власти против македонски државјанин, кој наводно имал бугарски пасош. Се работи за бизнисменот Иван Данев од Крива Паланка, кој бил и „спонзор на ДПМНЕ и Мицкоски“.

Според Стојанов, Данев имал бизнис во градежништвото во Бугарија.

„Ќе ги сноси сите последици од тоа дека е пријател и спонзор на партијата Дпмне и Мицкоски. Ќе плати со КАМАТИ ВЕДНАШ!“, пишува „Фондација Македонија“.

На фејбук профилот објавен е и дел од пријавата до Националната агенција за приходите (бугарската Управа за јавни приходи).

Инаку Виктор Стојанов има забрана за влез во Македонија како лице кое претставува закана за јавниот ред и безбедност во земјата, често сметан за провокатор поради неговите активности.

The post БУГАРСКА ФОНДАЦИЈА ПРИЈАВУВА „НЕЛОЈАЛНИ БУГАРИ“ ОД МАКЕДОНИЈА Нова провокација од Виктор Стојанов appeared first on plusinfo.mk.

Во текот на вчерашниот ден, полицијата евидентирала повеќе случаи на семејно насилство и закани во Скопје, Гостивар и Крива Паланка, при што во дел од нив осомничените се приведени, а за еден случај веќе е поднесена кривична пријава.

Во Гостивар, 47-годишна жена од гостиварско село пријавила дека на 20 јуни, околу 13 часот, додека била на работното место во угостителски објект, нејзиниот сопруг С.М. дошол и барал пари, при што ѝ упатувал закани. Таа дополнително пријавила дека вчера повторно добила порака со заканувачка содржина од него. Од полицијата велат дека се преземаат мерки за расчистување на случајот.

Во Скопје, полициски службеници го привеле 40-годишниот Р.В., откако претходно било пријавено дека во семејниот дом физички ја нападнал својата 64-годишна мајка. По целосното документирање на случајот против него ќе биде поднесен соодветен поднесок.

Уште едно приведување имало и во Крива Паланка. Полицијата го лишила од слобода 46-годишниот Д.М. од кривопаланечко село, осомничен дека физички ја нападнал својата 37-годишна сопруга. Тој бил задржан во полициска станица, а по расчистувањето на случајот ќе следува соодветна пријава.

Во меѓувреме, во Скопје е пријавен и случај на физички напад меѓу сосетки. Дваесет и деветгодишна скопјанка пријавила дека на подрачјето на Чаир била физички нападната од својата сосетка И.Ф. По целосното документирање на случајот ќе биде поднесен соодветен поднесок.

Дополнително, Надворешната канцеларија за криминалистички работи Гостивар поднела кривична пријава против 50-годишниот М.Т. поради сомнение за кривичното дело „загрозување на сигурноста“. Според пријавата, на 13 јуни, во дворот на семејната куќа во гостиварско село, тој упатил сериозни закани по животот на својата 69-годишна мајка.

The post НЕМААТ МИР МАЈКИ, СОПРУГИ, ПАРТНЕРКИ… Полицијата интервенирала во повеќе случаи на семејно насилство appeared first on plusinfo.mk.

Педесет и двегодишен вработен во ЕВН го загубил животот додека бил на работна задача во атарот на кривопаланечкото село Огут, информира полицијата.

Според информациите од Министерството за внатрешни работи, на 16 јуни околу 13 часот во ОВР Крива Паланка од Јавната здравствена установа Крива Паланка било пријавено дека на местото викано „Пољана“ во селото Огут има починато лице.

По преземените мерки било утврдено дека станува збор за С.Ј. (52) од Крива Паланка, вработен во ЕВН, кој починал додека извршувал работни задачи.

Лекар констатирал смрт на местото на настанот, а по наредба на јавен обвинител телото на починатиот е предадено на обдукција во Судска медицина, со цел да се утврдат точните причини за смртта.

Увид на местото извршила увидна екипа на ОВР Крива Паланка, а надлежните институции ги испитуваат сите околности поврзани со случајот.

The post ВРАБОТЕН ВО ЕВН ПРОНАЈДЕН МРТОВ Работник починал за време на извршување службени задачи appeared first on plusinfo.mk.

Водич во автобус, косовски државјанин, е лишен од слобода утринава кај Крива Паланка под сомнение за давање поткуп, соопшти полицијата.

Инцидентот се случил денеска (24.05.2026) околу 06:30 часот, кога полициски службеници од Мобилната единица за компензациски мерки при Одделот за гранични работи и миграција запреле автобус „мерцедес“ со косовски регистарски ознаки.

При контрола на возилото било утврдено дека автобусот го управувал државјанин на Турција, додека косовскиот државјанин Н.Ц. бил во улога на водич во патувањето.

Според информациите, при проверка на неговите документи, во патната исправа била пронајдена банкнота од 50 евра, по што полицијата реагирала и го привела.

Н.Ц. е лишен од слобода по член 358 став 1 од Кривичниот законик – „давање поткуп“ и е спроведен во Полициската станица Крива Паланка.

По целосно документирање на случајот, против него ќе биде поднесена соодветна кривична пријава.

The post СТАВИЛ 50 ЕВРА ВО ПАСОШ ЗА „ПОБРЗ ПРЕМИН“ НА ГРАНИЦА Уапсен косовски водич во автобус за поткуп appeared first on plusinfo.mk.

Поранешната мисица Јулија Ѓорѓиевска (28) од Крива Паланка е приведена откако, според полицијата, се обидела да ја попречи акцијата за заплена на добиток спроведена од надлежните служби.

Инцидентот се случил кај местото „Калин камен“, каде екипи на Агенцијата за храна и ветеринарство спроведувале акција за заловување на крупен добиток.

Според информациите од МВР, 28-годишната Ѓорѓиевска пружила отпор и ги попречувала службените лица додека ја спроведувале постапката, по што интервенирала и полицијата.

Таа била приведена и спроведена во полициска станица, а по целосно документирање на случајот против неа ќе биде поднесена пријава.

Ова не е првпат нејзиното име да се поврзува со слични инциденти, каде што таа и нејзини поблиски членови на семејството беа приведувани поради добитокот кој слободно шета во Крива Паланка и околината.

The post ПОВТОРНО ПРИВЕДЕНА ПОРАНЕШНАТА МИСИЦА ОД КРИВА ПАЛАНКА Јулија спречувала заплена на добиток, па завршила во станица appeared first on plusinfo.mk.