По повеќе од две и пол години од исчезнувањето на двегодишната Данка Илиќ, во Вишиот суд во Неготин денеска почна судската постапка против Дејан Драгијевиќ и Срѓан Јанковиќ, обвинети за тешко убиство на девојчето. Двајцата обвинети беа спроведени во судот со полициско возило, со лисици на рацете.

Обвинителството бара доживотен затвор за двајцата, но случајот, кој ја потресе Србија во март 2024 година, и натаму е обременет со бројни неодговорени прашања. Телото на Данка не е пронајдено, двајцата обвинети ги повлекоа првичните признанија, а истрагата ја следеа и контроверзи околу смртта на братот на еден од нив во полициска станица.

Денешното рочиште е подготвително и се одржува зад затворени врати. На него страните во постапката ги изнесуваат своите предлози за докази, сведоци и вештачења, по што треба да биде определен датумот за главниот претрес.

Обвинетите Драгијевиќ и Јанковиќ денеска во судницата за прв пат ќе се сретнат со родителите на Данка, кои присуствуваат како оштетени во постапката.

10 дена потрага, па кобно соопштение

Данка Илиќ исчезна на 26 март 2024 година во Бањско Поле, населба во близина на Бор, во источна Србија. Таа била со мајка си и со постариот брат на семеен имот. Според исказот на мајката, во еден момент се свртела за да му даде вода на синот, а кога повторно погледнала кон Данка, девојчето веќе го немало.

Веднаш почна голема потрага, во која беа вклучени полицијата, спасувачките екипи, кучиња трагачи, хеликоптери и беспилотни летала. Србија за првпат го активираше системот за итно известување за исчезнати деца „Пронајди ме“, по примерот на американскиот систем „Амбер алерт“. Во потрагата беа пребарани околу 200 куќи и 200 станови, проверени повеќе од 400 возила и десетина камери. Биле анализирани и податоци од околу 42.000 мобилни телефони регистрирани на базните станици во Бор на денот на исчезнувањето.

По десет дена, на 4 април 2024 година, српската полиција соопшти дека Данка е убиена и дека се уапсени двајца мажи, Дејан Драгијевиќ и Срѓан Јанковиќ, вработени во јавното комунално претпријатие „Водовод“ во Бор. Според првичната верзија на истрагата, тие со службено возило ја удриле Данка, ја ставиле во автомобилот, а потоа ја убиле и го сокриле нејзиното тело.

Признаа убиство, па ги повлекоа исказите

Според обвинителниот акт, на 26 март двајцата се движеле со службено возило во Бањско Поле кога ја удриле Данка. Обвинителството тврди дека девојчето го ставиле во автомобилот, а потоа Драгијевиќ ја убил. Телото наводно било однесено на локална депонија, а подоцна преместено на друга локација, со помош на членови на семејството на Драгијевиќ.

Двајцата осомничени на почетокот на истрагата признаа вмешаност во злосторството. Но, неколку месеци подоцна ги сменија исказите. Дејан Драгијевиќ го негираше убиството, а Срѓан Јанковиќ, исто така, негираше дека ја удрил или убил Данка. Во своја одбрана тие тврделеа дека признанијата ги дале поради наводна полициска тортура и малтретирање.

Токму прашањето дали признанијата биле изнудени со насилство стана една од најсериозните контроверзи во случајот. Според истражувањето на ЦИНС објавено на 7 октомври 2026 година, двајцата обвинети опишувале дека биле удирани со раце и палки, дека им биле потопувани главите во вода, а Драгијевиќ тврдел дека му било скршено ребро. Јанковиќ, според истите наводи, се жалел на вкочанетост на прстите.

Овие тврдења не се судски утврдени факти. Сепак, тие се предмет на посебна постапка во Вишото јавно обвинителство во Ниш, кое треба да утврди дали имало полициска бруталност и дали признанијата се незаконски изнудени.

Братот на Драгојевиќ почина во полициска станица

Само 3 дена по апсењето на Дејан Драгијевиќ и Срѓан Јанковиќ, на 7 април 2024 година, во полициската станица во Бор почина Далибор Драгијевиќ, брат на Дејан. Тој претходно беше уапсен под сомнение дека му помагал на својот брат во преместувањето и прикривањето на телото на Данка.

Далибор бил во полициско задржување кога починал. Неговата смрт отвори сериозни прашања за постапувањето на полицијата, особено поради тоа што се случила во момент кога бил под целосна контрола на полициските службеници.

Истражувачкиот портал „Радар“, повикувајќи се на обдукциски наод и вештачење до кои дошол во декември 2024 година, објави дека на телото на Далибор биле констатирани бројни повреди и дека наодите укажувале на брутално тепање. Медиумот објави и тврдења за обид за прикривање на околностите под кои починал.

Ниту две и пол години по смртта на Далибор нема завршница на истрагата. Вишото јавно обвинителство во Ниш потврдил дека предметот е во предистражна фаза и дека Секторот за внатрешна контрола при МВР не постапил по повеќе негови барања за проверка на работата на полицијата. Во јули 2026 година, Секторот побарал дополнително време, но до почетокот на октомври обвинителството сè уште немало добиено одговор.

Обвинението беше враќано два пати

Постапката против двајцата обвинети не започна брзо. Обвинителството во Заечар подигна обвинение за тешко убиство во соизвршителство, но Апелацискиот суд во Ниш двапати го враќаше решението за потврдување на обвинителниот акт на повторно разгледување и дополнување.

При второто враќање било наложено за потврдувањето на обвинителниот акт да одлучува нов судски совет. По дополнување на истрагата, предметот бил префрлен во Вишиот суд во Неготин, кој го потврдил обвинението.

Во истрагата беше опфатен и Радослав Драгијевиќ, таткото на Дејан, кој беше осомничен дека му помогнал на синот да го премести телото на девојчето и дека не пријавил кривично дело. Тој беше уапсен на 6 април 2024 година, заедно со Далибор.

Радослав подоцна беше пуштен да се брани од слобода, а постапката против него продолжи. Но, во август 2026 година, судот ја запре постапката против него, па во актуелниот предмет како обвинети останаа само Дејан Драгијевиќ и Срѓан Јанковиќ.

Во меѓувреме, почина и мајката на Дејан и Далибор, Светлана Драгијевиќ, во мај 2024 година. Таа претходно беше сослушана во рамките на истрагата.

Телото на Данка не е пронајдено

И покрај опсежната потрага, пребарувањето депонии и повеќемесечната истрага, телото на Данка никогаш не беше пронајдено. Тоа е една од најголемите пречки во случајот, бидејќи нема форензички наод од телото со кој би можеле непосредно да се утврдат причината и времето на смртта, како и други околности поврзани со настанот.

Обвинителството ја темели својата верзија на исказите на обвинетите од почетокот на истрагата, на материјалните докази, вештачењата и другите собрани докази. Одбраната, пак, ги оспорува наводите и се повикува на повлечените признанија и тврдењата за полициска тортура.

Случајот на Данка Илиќ затоа е еден од најчувствителните и најкомплицираните кривични предмети во Србија во последните години. Судењето треба да даде одговор дали обвинителството ќе успее да ја докаже вината на двајцата обвинети и без пронајдено тело, но и дали ќе бидат расчистени околностите што ја следеа истрагата. За семејството на девојчето, останува и најболното прашање – каде е Данка и што се случи со неа.

The post ПОЧНУВА СУДЕЊЕТО ЗА УБИСТВОТО НА ДВЕГОДИШНАТА ДАНКА ИЛИЌ Родителите на девојчето првпат ќе се сретнат со обвинетите appeared first on plusinfo.mk.

Полицијата во Гринвил, во американската сојузна држава Јужна Каролина, ја заврши истрагата за смртта на актерката Хејден Панетиер, која почина на 16 август, на 36-годишна возраст. Според официјалните наоди, актерката починала од токсичните ефекти на комбинација од повеќе супстанции, а нејзината смрт е класифицирана како несреќен случај.

Од полициската управа во Гринвил соопштија дека истрагата е завршена врз основа на наодите на судскиот лекар и резултатите од спроведените проверки. Претходно, канцеларијата на судскиот лекар во округот Гринвил утврди дека смртта настапила како последица на токсичните ефекти на фентанил, 4-АНПП, алпразолам, метокарбамол и кветиапин.

Обдукцијата не покажала знаци на физичка траума што би придонела за смртта на актерката. Панетиер била пронајдена без свест во стан во Гринвил на 16 август. Медицинските екипи се обидувале да ја реанимираат, но не успеале да ѝ го спасат животот.

На местото на настанот биле нејзиниот поранешен партнер Брајан Хикерсон и неговиот брат Зак, кои повикале итна медицинска помош откако ја пронашле актерката во тешка состојба. Според полицискиот извештај, Хикерсон им покажал на полицајците и кеса со лекови што таа ги земала.

Случајот привлече големо внимание и поради тоа што во истрагата се испитувале околностите под кои актерката можеби дошла до недозволени или фалсификувани лекови. Во истрагата помагала и американската Агенција за борба против дрогата (ДЕА). Засега, затворањето на полициската истрага не значи дека се завршени сите можни проверки од други надлежни институции.

Панетиер, позната по улогите во сериите „Херои“ и „Нешвил“, отворено зборуваше за своите долгогодишни проблеми со зависноста од алкохол и опиоиди. Во своите мемоари, објавени во 2026 година, таа пишуваше и за личните тешкотии низ кои минувала. Зад себе ја остави 11-годишната ќерка Каја, која ја има со поранешниот свршеник, украинскиот боксер Владимир Кличко.

The post ЗАВРШИ ИСТРАГАТА ЗА СМРТТА НА ХЕЈДЕН ПАНЕТИЕР Полицијата потврди што ѝ се случило на холивудската актерка appeared first on plusinfo.mk.

Тажна вест го потресе кнежевското семејство на Монако. Антоан де Меси, роднина на принцот Алберт Втори, бил пронајден мртов во јавен парк во неделата, на 25 октомври. Неговото тело било откриено во близина на булеварот Ларвото, а причината за смртта засега не е утврдена.

Според локалните медиуми, семејството се загрижило откако 29-годишникот не се појавил на договорениот неделен ручек. Откако не успеале да стапат во контакт со него, неговите блиски го пријавиле неговото исчезнување во полиција. Неговото тело набргу потоа било пронајдено во паркот.

Антоан последен пат бил виден во раните утрински часови во неделата, како со несигурни чекори излегува од ноќен клуб, објави локалниот весник „Монако Матен“.

По откривањето на телото, полицијата ги прегледала снимките од надзорните камери и идентификувала маж кој бил во друштво на Антоан. Станува збор за украински државјанин, кој бил приведен во понеделникот, а неговото задржување било продолжено за дополнителни 24 часа.

Сепак, надлежните предупредуваат дека неговата улога во случајот сè уште не е разјаснета. Главниот обвинител на Монако, Стефан Тибо, изјавил дека приведениот во оваа фаза може да биде осомничен или сведок, чиј статус допрва треба да се утврди. Истрагата продолжува, а не е исклучена ниту можноста за несреќен случај.

Антоан де Меси бил син на баронот Кристијан де Меси и Сесил Желабал, а внук на принцезата Антоанета, постарата сестра на принцот Рение Трети, таткото на актуелниот владетел на Монако, принцот Алберт Втори.

Од кнежевската палата соопштиле дека принцот Алберт Втори и принцезата Шарлин со голема тага ја примиле веста за неговата смрт и изразиле сочувство до семејството и блиските на починатиот.

Антоан бил професионален тенисер, а со овој спорт почнал да се занимава уште како тригодишно дете. Подоцна се преселил со семејството на Флорида, каде што тренирал на престижната тениска академија на Ник Болетиери. Сонувал да настапи на Олимписките игри и еднаш изјавил дека сака да стане најдобриот тенисер во светот.

Бил и коосновач на технолошката компанија „Инстант Тек“. Иако потекнувал од кнежевското семејство, претпочитал да го чува својот приватен живот подалеку од јавноста и ретко се појавувал на свеченостите во Монте Карло. Едно од неговите последни јавни појавувања било на традиционалната служба „Те Деум“, по повод Националниот ден на Монако во ноември 2025 година.

 

View this post on Instagram

 

A post shared by Antoine De Massy (@antoinedemassy)

The post ШОК ВО МОНАКО Роднина на принцот Алберт пронајден мртов во парк, приведен е Украинец – го снимиле камерите appeared first on plusinfo.mk.

Писмо испратено до британската полиција во 2019 година повторно го отвори прашањето за вознемирувачките обвинувања против таткото на Меган Маркл.

Во писмото, за кое пишуваат „Пејџ сикс“ и други странски медиуми, неговата прва сопруга Рослин Лавлес навела дека го соочила Томас Маркл со обвинувањата за сексуална злоупотреба на деца. Според нејзините тврдења, тој ги негирал обвинувањата, но потоа дал изјава за своите патувања во Азија што ја вознемирила.

Во писмо до поранешната сопруга, Томас Маркл постариот наводно признал дека одел на Далечниот Исток „затоа што таму 12-годишниците се легални“.

Во 2019 година, законската возраст за согласност за сексуални односи на Филипините беше 12 години, но и понатаму беше незаконски да се плаќа за сексуални услуги од лица помлади од 18 години.

Во 2022 година, земјата ја зголеми минималната возраст за согласност за сексуални односи од 12 на 16 години.

Лавлес беше во брак со таткото на војвотката од Сасекс од 1965 до 1975 година. Таа почина во 2024 година.

Според медиумот, Лавлес го испратила писмото од седум страници до Центарот за процена на заканите од опсесивни лица при Скотланд јард (FTAC), кој се занимава со процена на ризиците за британското кралско семејство, политичарите и други истакнати јавни личности.

Метрополитенската полиција немала надлежност да ги истражува наводите против Томас Маркл постариот изнесени во писмото, бидејќи наводните дела се случиле во странство. Сепак, писмото им било доставено и на Меган и на нејзиниот сопруг, принцот Хари.

Случајот повторно е во фокусот по актуелната истрага на Филипините, каде што Томас Маркл, кој има 82 години, е обвинет за наводно поседување материјали со сексуална злоупотреба на деца. Неговиот син Томас Маркл Џуниор тврди дека пронашол такви материјали во кутиите со лични предмети во домот на татко му во Себу и ги предал на полицијата. Филипинските власти ги испитуваат материјалите и електронските уреди.

Томас Маркл ги негира обвинувањата, нарекувајќи ги „болни лаги“. Тој изјавил дека никогаш немал сексуални односи со лице помладо од 18 години и дека ќе направи сè за да го исчисти своето име. Истрагата е во тек, а наводите сè уште треба да бидат утврдени од надлежните органи.

Меган Маркл минатата недела соопшти дека е длабоко вознемирена од информациите и дека нејзиното оддалечување од татко ѝ, како и одлуката тој да нема контакт со нејзините деца, била донесена за да ги заштити. Таа рече дека се надева оти правдата ќе биде задоволена и дека приоритет ќе остане безбедноста на децата.

The post НОВИ ОБВИНУВАЊА ПРОТИВ ТАТKОТО НА МЕГАН МАРКЛ Во писмо до поранешната сопруга, Томас Маркл наводно признал дека патувал во Азија затоа што таму сексот со 12-годишници бил легален appeared first on plusinfo.mk.

Нови детали се појавија за установата за лекување од зависности во Санта Моника каде што на 20 септември почина Пресли Гербер, синот на славната манекенка Синди Крафорд и претприемачот Ренди Гербер. Американскиот портал ТМЗ објави дека полицијата на истата адреса интервенирала и неколку месеци пред смртта на 27-годишниот манекен.

Според полициските записи до кои дошол ТМЗ, полицајците биле повикани во установата на 18 февруари 2026 година, откако персоналот се посомневал дека една од корисничките се предозирала. Извор запознаен со случајот тврди дека жената била пронајдена во бесознание и дека ѝ биле потребни повеќе дози налоксон, лек што се користи за поништување на ефектите од предозирање со опиоиди.

Според истиот извор, жената се освестила пред да пристигне полицијата, па не била пренесена во болница. Полицајците разговарале со неа, а потоа ја напуштиле установата. Не е познато дали жената сè уште престојувала таму кога Пресли бил примен.

Пресли починал само неколку часа откако пристигнал во установата на 19 септември. Итните служби биле повикани следното утро, а и покрај обидите за реанимација, смртта била прогласена во 9.45 часот. Според претходни извештаи на ТМЗ, советникот кој му помагал во одржувањето на апстиненцијата наводно го предупредил персоналот дека младиот манекен бил под дејство на дрога уште пред приемот. Сепак, установата наводно се согласила да го прими.

ТМЗ, повикувајќи се на извори запознаени со случајот, објави и дека Пресли продолжил да консумира дрога по пристигнувањето, како и дека вработен задолжен за приемот на корисниците добил отказ по неговата смрт. Овие тврдења засега не се официјално потврдени. Сопственикот на установата, д-р Реза Набави, не одговорил на прашањата на медиумите за околностите на приемот на Пресли.

Смртта на Пресли сè уште е предмет на истрага, а официјалната причина не е утврдена. Според „Лос Анџелес тајмс“, полицијата истражува како дошол до дрогата, додека медицинскиот истражител чека дополнителни резултати за да ја утврди причината за смртта. Засега нема индикации за насилна смрт.

Синди Крафорд и Ренди Гербер, заедно со нивната ќерка Каја Гербер, по трагедијата побараа приватност и во емотивна порака напишаа дека им е скршено срцето по загубата на нивниот сакан син и брат. Пресли, кој се занимаваше со манекенство и соработуваше со познати модни брендови, претходно јавно зборуваше за своите проблеми со менталното здравје и зависноста. Неговата смрт повторно го отвори прашањето за безбедноста и надзорот во установите за закрепнување од зависности во Калифорнија.

The post НОВИ ДЕТАЛИ ЗА СМРТТА НА СИНОТ НА СИНДИ КРАФОРД Полицијата и претходно интервенирала во установата каде што почина Пресли Гербер appeared first on plusinfo.mk.

Меган Маркл наводно ставила конечна точка на односот со својот татко, Томас Маркл, со писмо во кое му соопштила дека никогаш нема да му дозволи да ги запознае нејзините деца. Деталите за последната порака повторно ја отворија семејната драма на војвотката од Сасекс, која со татко ѝ не е во контакт од 2018 година.

Според британскиот „Сан“ и Би-Би-Си, Меган му го испратила писмото во декември минатата година, додека Томас бил во болница на Филипините, каде што му била ампутирана левата нога поради сериозни компликации. Во писмото, наводно, му порачала дека нема да ги запознае принцот Арчи и принцезата Лилибет, како и дека таа повеќе нема да стапи во контакт со него.

Причината за ваквата одлука, според извештаите, се сериозни обвинувања поврзани со наводно поседување материјали со сексуална злоупотреба на деца. Томас Маркл ги негира обвинувањата, кои во моментов се предмет на истрага на филипинските власти.

Случајот доби нова димензија откако полубратот на Меган, Томас Маркл Џуниор, изјави дека наводно пронашол голема количина вакви фотографии и видеоснимки во поранешниот дом на татка си во градот Себу на Филипините. Според неговите тврдења, материјалите биле меѓу предметите што ги расчистувал, по што случајот бил пријавен во полиција. Во истрагата, според медиумските извештаи, е вклучено и американското Федерално истражно биро (ФБИ).

Томас Маркл ги отфрли обвинувањата, нарекувајќи ги лаги. Тој изјавил дека е подготвен да соработува со истражителите и дека нема што да крие.

По објавувањето на новите информации, Меган јавно проговори за причините поради кои се дистанцирала од татка си. Во изјава за медиумите рече дека е длабоко вознемирена од она што излегло на виделина и дека мислите ѝ се со сите деца што можеби биле повредени. Нагласи и дека одлуката да го прекине контактот со татко ѝ и да не му дозволи пристап до нејзините деца била донесена со една цел – да ги заштити.

Војвотката откри и дека уште во 2018 година била запознаена со вознемирувачки обвинувања против својот татко. Тогаш било испратено писмо до лондонската Метрополитен полиција, кое подоцна ѝ било предадено на неа и на принцот Хари. Полицијата потврди дека го примила писмото во јануари 2019 година, но призна дека информациите не биле споделени со други органи на прогонот. Сега се преиспитува начинот на кој случајот бил обработен.

Односот меѓу Меган и татко ѝ е нарушен уште пред нејзината венчавка со принцот Хари во мај 2018 година. Томас требаше да ја придружува ќерка си до олтарот, но се откажа од присуството по здравствени проблеми и откако беше откриено дека наместил фотографии за папараците во пресрет на венчавката. Наместо него, Меган до олтарот ја придружуваше тогашниот принц Чарлс, денешниот британски крал.

Оттогаш, Томас повеќепати јавно зборуваше за отуѓувањето од ќерка си и изразуваше желба да се помири со неа и да ги запознае внуците. Сепак, никогаш не ги запознал Арчи и Лилибет. Минатата година, кога се соочил со сериозни здравствени проблеми, Меган се обидела да стапи во контакт со него преку писмо, но најновите информации сугерираат дека тоа можеби била и нејзината последна порака до него.

Томас Маркл, кој има 82 години, по здравствените проблеми и ампутацијата се вратил во САД, каде што, според медиумските извештаи, се опоравува во установа за рехабилитација во Флорида.

The post СЕМЕЈНАТА ДРАМА НА МЕГАН МАРКЛ Војвотката од Сасекс му испратила последно писмо на татко ѝ во кое напишала дека нема никогаш да ги запознае нејзините деца appeared first on plusinfo.mk.

Основното јавно обвинителство Велес, постапувајќи во оформен предмет против едно лице за кривични дела – Измама од член 247 и Надрилекарство од член 209 од Кривичниот законик, обезбеди наредби за претреси на повеќе локации.

Се постапува за обезбедување докази во однос на сознанијата дека осомничениот, со намера да прибави противправна имотна корист, довел во заблуда повеќе лица, лажно нудејќи им „кубански вакцини“ против рак.

При претрес на работното место на осомничениот во Велес, пронајдени се докази кои ќе бидат предмет на вештачење. Одземени се и електронски уреди, а се преземаат и други дејствија на проверки.

Надлежниот јавен обвинител врши распити на оштетени и други лица кои би можеле да имаат сознанија важни за целосно испитување на настанот.

Основното јавно обвинителство Велес до судот достави и предлог за определување на мерки на претпазливост – одземање на патната исправа и обврска на осомничениот да се јавува во Судот.

Лицето во моментов е хоспитализирани во медицинска установа, каде му е врачено решението за определување на мерките.

Како што пристигнуваат дополнителни информации и сознанија, Јавното обвинителство и МВР продолжуваат да преземаат дејствија за обезбедување докази.

The post ИСТРАГА ЗА ВЕЛЕШАНЕЦОТ КОЈ НУДЕЛ „КУБАНСКИ ВАКЦИНИ“ ПРОТИВ РАК Обвинителството бара да му биде одземен пасошот appeared first on plusinfo.mk.

Петнаесет раководители на Службата за борба против дрога при српската Управа за криминалистичка полиција биле преместени на други позиции по заплената на петте тони марихуана од Македонија во близина на Крушевац на почетокот на годинава, објави српскиот истражувачки портал „Крик“.

Медиумот објави писмо што полицајците го испратиле до српскиот премиер Ѓуро Мацут, во кое тврдат дека еден ден по акцијата, во која е запленета историска количина на марихуана, биле сменети раководителите на службата и дека тие и нивните семејства биле изложени на притисоци. Писмото го потпишале 13 полицајци, кои побарале средба со премиерот. Тој до денес не им одговорил на барањата.

„Еден ден по заплената започна уништувањето на службата, при што беа разрешени началникот на службата, заменик-началникот на службата, началниците и замениците во сите четири одделенија на службата, како и пет раководители на одделенија. По нашите отпуштања, започнаа притисоци и отпуштања врз нашите сопруги кои се вработени во Министерството за внатрешни работи, како и разни видови притисоци“, се наведува во писмото што полицајците го испратиле до српскиот премиер Мацут.

Проблемите се појавија, како што е наведено во писмото, откако оваа полициска управа заплени дури пет тони марихуана во куќата на советникот на СНС од Крушевац.

„Клучниот настан е веќе добро познатата заплена на пет тони марихуана во градот Коњух, а потоа, врз основа на нашите информации, заплената на над 40 тони марихуана во Република Северна Македонија. Од таа заплена, поточно следниот ден, започна уништувањето на службата со замена на началникот на службата, заменик-началникот на службата, началниците и замениците во сите четири одделенија на службата, како и пет началници на одделенија“, се наведува во писмото упатено до премиерот.

ОЈО ГОКК за Канал 5 велат дека последните случувања во Србија немаат влијание за проширување на истрагата..

„По предметот за организираниот транспорт на пет тони марихуана од Македонија во Србија се преземаат истражни дејствија. Се очекува наскоро да биде донесена соодветна јавнообвинителска одлука.“, велат од ОЈО ГОКК.

Инаку, шверцот на дрогата беше откриен на 29 јануари годинава во Коњух кај Крушевац, на имот на локален функционер на владејачката Српска напредна партија.

Тогаш српските полицајци пронајдоа документација од македонската компанија „Алфафарм“, по што сознанијата им беа доставени на македонските истражни органи. На почетокот на февруари следуваше голема полициска акција во Македонија, во која од повеќе компании беа запленети над 40 тони марихуана и биомаса.

Според досегашните наоди на Обвинителство, криминалната група во најмалку пет наврати транспортирала големи количини на марихуана преку граничниот премин Табановце, прикриена во камиони со друга декларирана стока.

The post РАСТУРЕНА СРПСКАТА СЛУЖБА ШТО ЈА ОТКРИ МАРИХУАНАТА ОД МАКЕДОНИЈА 15 раководители се распоредени на други позиции appeared first on plusinfo.mk.

Тринаесет лица загинаа, а 34 се повредени откако тежок товарен камион се судри со туристички автобус западно од египетската престолнина Каиро, објавија државните медиуми.

Египетскиот весник „Ал Ахрам“ објави дека судирот се случил на патот Каиро–Асиут, во областа на Западната Пустина, кај 55. километар од патниот правец, пред приклучувањето кон регионалниот пат во насока на Гиза.

Според извештаите на локалните медиуми, ударот бил силен, при што предниот дел од автобусот бил целосно уништен, а остатоци од возилото и седишта биле расфрлани покрај патот. На местото на несреќата биле испратени полициски и спасувачки екипи, а со помош на кран се отстранувале остатоците од автобусот.

Повредените биле пренесени во болници за укажување лекарска помош, а дел од нив биле префрлени во други здравствени установи поради сериозноста на повредите.

Надлежните служби започнале истрага за утврдување на причините за несреќата. Засега нема официјална потврда за точните околности што довеле до судирот.

The post 🎥 СТРАОТЕН СУДИР НА КАМИОН И ТУРИСТИЧКИ АВТОБУС, 13 МРТВИ, 34 ПОВРЕДЕНИ Трагична сообраќајка во близина на Каиро appeared first on plusinfo.mk.

Петмина украински војници загинале во оружен напад во селото Кутузивка, во Харковскиот округ, соопштија украинските медиуми, повикувајќи се на полицијата и на свои извори во безбедносните служби.

Според „Суспилне Харков“, нападот се случил во вторникот, 13 октомври, околу 16 часот. Војниците биле припадници на 72. одделна механизирана бригада на украинските копнени сили.

Според информациите што ги објави медиумот, повикувајќи се на извори во органите за спроведување на законот, вооружен маж во цивилна облека најпрво застрелал еден војник пред куќа во која се наоѓале други припадници на бригадата. Потоа влегол во објектот и продолжил да пука, при што загинале уште четворица војници. Пукањето, според истиот извор, траело околу два часа, по што напаѓачот избегал.

Портпаролката на полицијата во Харковската област, Људмила Прокопенко, потврдила дека на 13 октомври непознато лице отворило оган од автоматско оружје и убило петмина војници. Според неа, случајот е внесен во Единствениот регистар на предистражни постапки, а полицијата работи на утврдување на идентитетот на сторителот и на негово пронаоѓање.

Смртта на војниците ја потврдила и 72. механизирана бригада. Во соопштението од бригадата се наведува дека, според првичните информации, во нападот можеби се вмешани лица кои најверојатно се руски државјани. Поради безбедносни причини, бригадата не објавила дополнителни детали и побарала да не се шират непроверени информации.

Една од верзиите што се појавија во украинските медиуми е дека нападот можеби го извршил руски војник кој избегал од заробеништво. Украинскиот портал „Главком“, повикувајќи се на свои полициски извори, објави дека во Харковската област се трага по двајца руски воени заробеници за кои постојат информации дека избегале од местото каде што биле задржани.

Scene dall’attacco successivo alla sparatoria nel villaggio di Kutuzivka, oblast di Kharkiv, dove cinque soldati ucraini della 72ª Brigata Meccanizzata sono stati uccisi da un prigioniero di guerra russo evaso armato di un fucile d’assalto.

I cinque soldati sono stati tutti

— Filippo (@filipposu22) October 14, 2026

The post 📷 КРВАВ НАПАД ВО ХАРКОВСКАТА ОБЛАСТ Убиени 5 украински војници, се трага по сторителот appeared first on plusinfo.mk.