Денеска сме на улицата Јордан Мијалков, пред уште еден пример за урбанизација што отвора прашање за хуманото живеење во Центар – згради оддалечени едвај неколку метри, недостиг од паркинг и речиси никакво зеленило, а на жителите им се одземаат просторот, приватноста и условите за достоинствен живот, рече Лазар Банов, потпретседател на ОК Центар на ВМРО-ДПМНЕ.

– Господине Герасимовски, заедно со вашиот ментор Филипче, пред изборите ветувавте хуман Центар, а денес граѓаните гледаат бетонски лавиринт! Каде се зеленилото, паркинзите и конкретните решенија за подобар живот – праша Банов.

Не може урбанистичкиот развој да се мери само со нови згради, додека потребите на жителите остануваат во втор план, додаде тој.

– Бетон Герасимовски, време е да одговорите за резултатите од вашето раководење во Општина Центар. Кој ги штити граѓаните и нивниот квалитет на живот? Граѓаните на Центар заслужуваат општина во која ќе има простор за живеење, а не секој слободен метар да се претвора во бетон. Центар не е парцела за градење, туку дом на граѓаните. Ветувањата поминуваат, но последиците од лошото урбанистичко планирање остануваат со години – рече Банов.

The post БЕТОНСКИ ЛАВИРИНТ НАМЕСТО ХУМАН ЦЕНТАР Со Герасимовски потребите на жителите останаа во втор план appeared first on plusinfo.mk.

Потпретседателот на СДСМ и градоначалник на Центар, Горан Герасимовски, си задал цел да ги помири претставниците на Платформата 12:05 и лидерот Венко Филипче со цел партијата да се обедини и да се врати на победничките патеки.

– Моја заложба и цел е да ги помирам спротивставените страни. Добро е за секоја партија да има различни ставови, но тоа треба да нè прави посилни. На крајот на денот треба да седнеме сите на маса, да се обединиме и да тргнеме во победа – рече Герасимовски во интервју за ТВ Сител.

Според него, за надминување на разликите е потребна волја од сите страни. Герасимовски нагласи дека комуникацијата со дел од членовите на Платформата продолжува и дека со нив има другарски однос.

– Другарот Иван Ивановски, на пример, беше дел од мојот победнички штаб за изборите и многу ни помогна во победата. И другите се наши членови и, покрај различните ставови, можеме да се најдеме на иста линија. Се согласувам дека двете страни си испратија неубави пораки, но треба да се дискутира за сè. Поголемиот дел од Извршниот одбор и партиските функционери можат да дојдат до заеднички јазик, но треба волја за тоа – посочи тој.

Герасимовски смета дека единството, отворениот дијалог и заедничката стратегија се неопходни за СДСМ да ја врати довербата кај граѓаните.

– Во тек е консолидирање на партијата. Треба да покажеме резултати, да ги сплотиме сите поделени страни, да седнеме заедно на маса и да ја вратиме партијата на победничките шини – додаде тој.

The post ГЕРАСИМОВСКИ ИМА МИСИЈА ДА ГО ОБЕДИНИ СДСМ Ќе најдат ли заеднички јазик Филипче и Платформерите после сѐ што си кажаа? appeared first on plusinfo.mk.

Нацртот за Деталниот урбанистички план „Барутана“ нема да биде ставен на дневен ред на Советот на Општина Центар сè додека не се најде законски издржано и прифатливо решение за сите отворени прашања, особено за стабилноста на теренот и пристапната сообраќајница, рече градоначалникот на Општина Центар, Горан Герасимовски, на денешниот брифинг со новинарите.

– Мојот став е јасен. Сè додека не најдеме законско и прифатливо решение за сите отворени прашања, јас како градоначалник нема да предложам овој нацрт-ДУП да биде ставен на дневен ред на Советот. За Водно мора да бидеме особено внимателни. Не е доволно само да се исполнат формалните процедури, туку мора да бидеме сигурни дека решенијата се безбедни, законски и во интерес на граѓаните – истакна Герасимовски.

Тој информираше дека Дирекцијата за заштита и спасување (ДЗС) дала позитивно мислење за нацртот за „Барутана“, потврдувајќи дека условите од областа на заштитата и спасувањето се соодветно вградени во планската документација.

Позитивни мислења и оценки доставиле и Комисијата за урбанизам на Град Скопје, Агенцијата за катастар на недвижности, ЈП „Водовод и канализација“ – Скопје, Секторот за води и Секторот за природа при Министерството за животна средина и просторно планирање, Агенцијата за електронски комуникации, ЕСМ-Топлификација, Агенцијата за цивилно воздухопловство, Управата за заштита на културното наследство, АД „Водостопанство“ и Министерството за внатрешни работи.

Герасимовски нагласи дека позитивните мислења од институциите не значат автоматско донесување на нацрт-ДУП-от, ниту дека со нив завршува постапката.

– Мислењата на институциите се важни, но за мене е подеднакво важно да ги отстраниме сите сомнежи околу стабилноста на теренот. Затоа, покрај анализите што веќе ги имаме, ќе ѝ наложиме на планерската куќа да нарача посебна студија од Градежниот факултет за процена на ризикот од ерозија, свлекување и нестабилност на падините. Сакам да имаме јасна и целосна стручна слика пред да се носат какви било конечни одлуки. Имаме законска обврска да ја водиме постапката, но тоа не значи дека нацрт-ДУП-от мора да биде усвоен по секоја цена. Ќе ги разгледаме сите забелешки, ќе ги направиме потребните дополнителни анализи и ќе бараме решение кое нема да ја доведе во прашање безбедноста на граѓаните – рече Герасимовски.

The post ПЛАНОТ ЗА БАРУТАНА ЌЕ СЕ ОТВОРИ КОГА ЌЕ СЕ ЗАТВОРАТ СИТЕ ПРАШАЊА Прво ќе се испита стабилноста на теренот appeared first on plusinfo.mk.

Градоначалникот на Општина Центар, Горан Герасимовски, е избран за потпретседател на СДСМ синоќа на седница на Централниот одбор на партијата. По изборот, тој повика на сплотеност, меѓусебна доверба и заедничка работа во партијата.

– Не мора секогаш да мислиме исто. Не мора секогаш да се согласуваме. Но мора да знаеме што нè спојува. Тоа се нашите принципи, одбраната на социјалдемократијата и борбата за достоинствен живот на граѓаните. Само сплотени можеме силно да се спротивставиме на режимот на ДПМНЕ. Само сплотени можеме да ги браниме нашите вредности. И само сплотени можеме повторно да ја вратиме довербата на граѓаните – рече Герасимовски.

Тој истакна дека различното мислење не треба да биде причина за поделби, туку поттик партијата да стане посилна. Според него, првиот чекор кон враќање на довербата кај граѓаните е членовите повеќе да разговараат, да се слушаат и да работат заедно.

– Нема место за поделби. Нема место за суети. Нема место за стоење настрана и чекање некој друг да ја заврши работата. Секој е важен. Секој е потребен. Силата на СДСМ никогаш не била во еден човек. Силата на СДСМ била во луѓето – рече тој и им се заблагодари на лидерот на СДСМ Венко Филипче и на сопартијците за довербата.

The post ГЕРАСИМОВСКИ ИЗБРАН ЗА ПОТПРЕТСЕДАТЕЛ НА СДСМ Повика на сплотеност во партијата и почитување на различното мислење appeared first on plusinfo.mk.

Стаорци повторно се забележуваат на повеќе места низ Скопје, а снимки од глодари како се движат по улиците и јавните површини граѓаните масовно ги споделуваат на социјалните мрежи. Пријави и видеа има од Капиштец, Аеродром, Драчево, но и од кејот на Вардар.

Поради зголемената појава на глодари, Општина Центар денеска и утре спроведува вонредна дератизација на повеќе локации на својата територија. Акцијата ги опфаќа Буњаковец, Капиштец и Градски ѕид, како и други точки каде што се забележани стаорци или каде што граѓаните пријавиле проблем.

Од Општина Центар велат дека ова е втора вонредна дератизација во последните два месеца. Покрај овие интервенции, во општината веќе била спроведена и редовната пролетна дератизација, додека претстои и есенската.

Градоначалникот на Центар, Горан Герасимовски, сепак, предупредува дека проблемот не може трајно да се реши само со поставување средства против глодари.

– Ова е втора вонредна дератизација во последниве два месеца. Претходно имавме редовна пролетна дератизација, а пред нас е и есенската. Но, само со дератизација не се решава проблемот – изјави Герасимовски.

Тој апелира до Град Скопје и до надлежните градски јавни претпријатија да обезбедат почесто празнење и одржување на контејнерите, како и подобро одржување на канализационата инфраструктура.

Според него, појавата на глодари бара координирана реакција од повеќе институции, бидејќи проблемот не се однесува само на една општина.

– Ваквите инвестиции се решаваат со системски пристап, каде треба да бидат вклучени сите надлежни институции, бидејќи проблемот не е само во една општина, туку пошироко – вели градоначалникот.

Од Општина Центар ги повикуваат граѓаните да ги пријавуваат местата каде што забележале зголемена појава на глодари, со цел надлежните служби навреме да интервенираат.

Општината најавува дека ќе продолжи да ја следи состојбата на терен и да презема мерки за одржување на чиста, безбедна и здрава животна средина.

The post 📽️ СТАОРЦИ ШЕТААТ НИЗ СКОПСКИТЕ НАСЕЛБИ Вонредна дератизација во Центар по пријави од граѓани appeared first on plusinfo.mk.

Шест градилишта во Општина Центар се казнети со по 1.300 евра поради прекршувања утврдени при инспекциски контроли, соопшти Општината.

Инспекциските служби во изминатата недела контролирале 10 активни градилишта на територијата на општината, при што биле констатирани нарушувања на комуналниот ред и непочитување на Законот за јавна чистота.

Контролите биле спроведени и во доцните попладневни часови, а за утврдените прекршоци биле изречени шест казни во висина од по 1.300 евра.

На уште три локации инспекторите отстраниле блокатори и столбчиња кои биле бесправно поставени на јавни површини.

– Инспекциските служби се на терен. Покрај редовните надзори, спроведуваме вонредни контроли со цел заштита на животната средина, спречување на загадувањето, одржување на јавната чистота и безбедни тротоари и улици. Нема да толерираме нарушување на јавниот простор – порача градоначалникот на Општина Центар, Горан Герасимовски.

Од Општина Центар апелираат до инвеститорите и градежните компании да ги почитуваат законските обврски и да преземат мерки за заштита на околината, особено при изведување градежни работи во зони со индивидуално домување.

The post КАЗНИ ОД ПО 1.300 ЕВРА ЗА ШЕСТ ГРАДИЛИШТА ВО ЦЕНТАР Засилени контроли, инспектори затекнале прекршувања appeared first on plusinfo.mk.

Општина Центар е прва општина во државата која на граѓаните им овозможува директен увид во мерењата на бучавата преку општинскиот ГИС-портал, соопшти локалната самоуправа.

Со новата услуга граѓаните можат да ја следат состојбата на 30 локации низ општината, каде што се поставени мерни уреди за бучава, и на својот компјутер да проверат дали измерените вредности се во законски дозволените граници.

Од Општина Центар велат дека пристапот е едноставен: потребно е граѓаните да се регистрираат на порталот, да кликнат на „категории“ и да ја изберат опцијата „мониторинг на бучава“. Со избирање на секоја локација се прикажуваат просечните измерени вредности на бучавата по час, како и просечната дневна вредност.

Мерењата се изразуваат во децибели, во скала од 0 до 145. Секое мерење е обележано со боја-индикатор, при што црвената боја означува надминување на законски дозволената граница на бучава.

Проектот се реализираше во две фази. Прво беа поставени 30 уреди на локациите каде граѓаните најчесто пријавуваа проблеми, а сега со поврзувањето со ГИС-порталот мерењата се јавно достапни.

Градоначалникот Горан Герасимовски вели дека ова е уште едно исполнето предизборно ветување.

– Воведовме паметен систем за мерење на бучавата. Прецизно ги мапиравме најгорливите точки, а сега секој граѓанин може сам да се увери во нивото на бучава во општината и во својата непосредна околина, како и да алармира кога ќе забележи надминување на дозволените граници. Доволно е да се најави на нашиот ГИС-портал, мерењата сега се целосно транспарентни – вели Герасимовски.

Општинските инспектори основа на податоци од мониторингот можат да излезат на терен и да извршат проверки на конкретните локации.

Општина Центар  планира проширување на системот за мониторинг со нови локации, согласно барањата на жителите.

The post ДАЛИ ОВАА БУЧАВА Е НАД ГРАНИЦИТЕ? Центар овозможи увид во мерењата на 30 локации appeared first on plusinfo.mk.

Движењето ЗНАМ – За наша Македонија ги отфрла обидите на градоначалникот на општина Центар Горан Герасимовски да ги дискредитира советниците само затоа што, како што велат, не гласаат според неговите очекувања.

– Откако советниците на ЗНАМ гласаа против суспензијата на дел од ДУП „Буњаковец 1“, Герасимовски јавно праша „чиј интерес се штити – на граѓаните или на инвеститорот?“. Советниците на ЗНАМ го штитат интересот на центарци. А тоа значи и да не дозволат граѓаните повторно да плаќаат за правно неиздржани одлуки. Општина Центар досега има исплатено повеќе од 140 милиони денари по основ на отштети. И кога се повикува на безбедност, Герасимовски треба да ги презентира сите факти. Како ризик се посочува резервоарот за мазут од 115 м³ кај студентскиот дом „Кузман Јосифовски – Питу“. Според документацијата со која располагаме, тој не е во функција од 2024 година, испразнет е, исчистен и хемиски третиран, а домот со реконструкцијата ќе биде приклучен на системот за снабдување со топлинска енергија. Ако градоначалникот има стручен наод дека резервоарот и денес претставува опасност – нека го објави. А кога зборува за безбедноста околу градилиштата, прашуваме: дали истиот аршин важи за сите? – велат од ЗНАМ.

Од партијата велат дека тука се гледаат двојните стандарди на Герасимовски.

– Истовремено, го турка ДУП „Барутана“, со кој се предвидува сериозна изградба на падините на Водно. Советниците на ЗНАМ гласаа против „Барутана“. А кога веќе прашувате „чиј интерес се штити“, одговорете и Вие: Чиј интерес го штитите со „Барутана“ – додаваат од ЗНАМ.

The post ЗНАМ БАРА ОД ГЕРАСИМОВСКИ ДА ПРЕСТАНЕ ДА ГИ ЕТИКЕТИРА СОВЕТНИЦИТЕ Од Движењето го прашаа чиј интерес штити со „Барутана“ appeared first on plusinfo.mk.

Лазар Банов, потпретседател на ОК Центар на ВМРО-ДПМНЕ, го обвини градоначалникот на Центар Горан Герасимовски дека од џебот на центарци платил 6,6 милиони денари за мобилна апликација за која добил само една понуда на тендер.

– Мобилната апликација која Герасимовски ја нарачал, очигледно веќе претходно договорена со добитниците на јавната набавка, центарци ќе ги чини годишно 6,6 милиони денари. Оттука, логично е дека во следните 3 години, наместо нови паркови, чисти улици, реконструкција на училишта и градинки, центарци ќе платат близу 20 милиони денари, за мобилна апликација која Герасимовски ја прави, само за да ги удоволи бизнис интересите на СДС. Очекуваме одговори од Герасимовски и СДС, дали тие сметаат дека е оправдано набавката со проценета вредност од 6,6 милиони денари да заврши со само една понуда, без реална конкуренција? – рече Банов.

Тој прашува што добиваат граѓаните за 100.000 евра годишно дадени за мобилна апликација.

– Јавните пари не се ничии туѓи пари. Тоа се парите на граѓаните. И за секој потрошен денар мора да има јавно оправдување – додаде Банов.

The post ЗА МОБИЛНАТА АПЛИКЦИЈА НА ЦЕНТАР ИМАЛО САМО ЕДНА ПОНУДА Банов обвини за однапред склучен договор зад затворени врати appeared first on plusinfo.mk.

Општина Центар започнува јавна анкета по нацрт деталниот урбанистички план за Градска четврт Ј 05 – Барутана.

Градоначалникот Горан Герасимовски ги повика жителите активно да се вклучат и да достават свои предлози, мислења и забелешки.

– Ниту една одлука не е само моја, ниту само на Општината или на Советот. Одлуките треба да ги носиме заедно со граѓаните. Затоа ги повикувам сите жители да се вклучат во јавната анкета, бидејќи секое мислење е важно и секој предлог заслужува внимание. Само преку отворен дијалог можеме да носиме одлуки што ќе бидат во интерес на граѓаните – порача Герасимовски.

Јавната анкета ќе се спроведува во периодот од 13 август до 14 септември 2026 година.

Граѓаните ќе можат да пополнат анкетни листови во писмена форма, секој работен ден од 8 до 16 часот, во просториите на ООУ „Кочо Рацин“ (улица Салвадор Аљенде бр. 2), каде што нацрт-планот ќе биде изложен во хартиена форма.

Анкетните листови ќе бидат достапни и во електронска форма преку веб-страницата на Општина Центар.

Дополнително, јавната презентација на нацрт ДУП-от ќе се одржи на 3 септември 2026 година, со почеток во 12 часот, во просториите на Општина Центар.

Нацрт-деталниот урбанистички план се однесува на Градска четврт Ј 05 – Барутана, за планскиот период 2025–2030 година.

Планскиот опфат е дефиниран на север, исток и запад по оска на новопланираната собирна улица „Јужна обиколница“, а на југ по границата на Генералниот урбанистички план на Град Скопје. Вкупната површина на планскиот опфат изнесува 6,89 хектари.

За дополнителни информации, граѓаните можат да се обратат на телефоните 02/3203-605 и 02/3203-660, или на е-пошта planiranje@centar.gov.mk.

The post ЈАВНА АНКЕТА ЗА ПЛАНОТ „БАРУТАНА“ НА ВОДНО Градоначалникот Герасимовски ги повика жителите да се вклучат appeared first on plusinfo.mk.