Според последните анализи на Европската комисија, уште еднаш се потврдува дека Македонија заедно со Албанија и со Црна Гора во нашиот регион е признаена како „фронтранер“ во однос на постигнатите реформи согласно Реформската агенда – оцени Антонио Милошоски, член на ИК на ВМРО-ДПМНЕ и пратеник.

– Според правилата на планот за раст на Европската комисија, финансиската поддршка којашто се насочува кон земјите кандидати е условена од степенот на постигнати реформи и тука Албанија, Македонија и Црна Гора се оценети со највисока оценка за разлика од други земји кандидати во регионот.

Оваа потврда од Европската комисија дека Македонија ги спроведува обврските од Реформската агенда, односно дека има значителен напредок е силна потврда, но исто така и мотивација за македонската Влада и за парламентарното мнозинство да продолжиме со ова темпо.

Како држава ја поздравуваме оценката на Европската комисија, како и нивниот план за реалокација на средства од Планот за раст, при што од оние земји коишто постигнале послаби реформи би се одзеле одреден дел на средства и истите би се алоцирале кон Албанија, Македонија и Црна Гора како земји коишто предничат во спроведувањето на реформите согласно Реформската агенда.

Со овие проценки на Европската комисија, за жал на Венко Филипче, се растура нивната манипулација дека Македонија заостанува во реформите, но оваа проценка од Европската комисија ни дава за право да упатиме еден апел до претседателот на СДСМ, Филипче, доколку Европската комисија ги препознава реформите коишто Македонија ги има постигнато, тогаш барем тој како претседател на оваа опозициска партија да не ги попречува законите коишто се дел од обврските во Реформската агенда, исто како и Изборниот законик и да биде прагматичен во интерес на државата, да дозволи и овој закон да биде изгласан и со тоа Македонија да си го зацврсти и својот углед во Брисел пред Европската комисија и да си овозможи добивање на поголем дел на средства од Планот за раст – рече Милошоски.

The post ЕВРОПСКАТА КОМИСИЈА ЈА ПОТВРДИ МАКЕДОНИЈА КАКО ЛИДЕР ВО РЕФОРМИТЕ Милошоски го повика СДСМ да не ги блокира законите од Реформската агенда appeared first on plusinfo.mk.

Собранието со 59 гласа „за“, 3 гласа „против“ и без воздражни ја изгласа потребата да се донесат по скратена постапка измените и дополнувањата на Изборниот законик, кој е дел од реформската агенда.

Потпретседателот на Собранието, Антонио Милошоски ги задолжи Комисијата за политички систем и односи меѓу заедниците, како матично работно тело и Законодавно правната комисија да заседаваат по предлог измените.

Предлогот до Собранието е доставен од група пратеници, и тоа Антонио Милошоски, Зеќирија Таири, Даниел Стојчевски, Блерим Беџети и Иванка Василевска. Левица не го потпиша овој предлог со образложение дека не се согласува со предложениот начин на финансирање на партиите, бидејќи тие иако имаат шестмина пратеници, на партијата ќе ѝ бидат исплатени исто како кога беа двајца.

Со измените, меѓу другото, се предвидува електронско гласање на дијаспората, а има промени и во делот на државното финансирање на партиите.

Предлагачот, образложувајќи зошто Изборниот законик треба да се донесе по скратена постапка, посочи дека за него се дискутира 4 месеци во рамки на Министерството за правда, каде учествуваа претставници на политичките партии, освен СДСМ, кој на почетокот учествувваше во работната група, а потоа се повлече.

– Во рамките на овие дискусии се согласивме за околу 28 препораки на ОДИХР, коишто беа консензуално прифатени. Во работната група во Министерството за правда за ниту една тема немаше надгласување и секогаш се одеше со консензус. Ќе имаме можност тие работи да ги дискутираме и за време на собраниската седница и за време на комисиите – рече Милошоски, образложувајќи го предлогот.

Во врска со изборниот модел, Милошоски укажа дека најголем дел од политичките партии се за една изборна единица, но, една партија била за 8, а друга за 3 изборни единици, па, бидејќи не се постигнал консензус, останува сегашното решение со 6 изборни единици.

За гласањето на дијаспората Милошоски појасни дека е постигнат консензус тоа да биде овозможено согласно праксата во Франција и во Естонија и да има електронско, безбедно и заштитено гласање.

– Морам да напоменам дека учестото на претставници од ДИК, Државниот завод за ревизија, АВМУ и од Антикорупциската комисија беше од голема помош. Овие институции излегоа со свои перпоаки кои во најголем дел беа прифатени. Препораките беа за тоа измените во Изборниот законик на овие институции да им го олеснат спроведувањето на изборите, во смисла да бидат демократски, фер, транспарентни и ефикасни – посочи Милошоски.

Во врска со моделот за користење пари од државвниот буџет за изборно рекламирање, Милошоски рече дека е постигнат едногласен консензус.

– Немаше ниту една партија која надгласала друга или некои преставници на политички партии да занемариле предлог на други колеги од политичките партии и ценам дека овој постигнат консензус од најголем број од политичките партии кои учествуваа во работната група во Министерството за правда треба да се цени како солидно постигнување и унапредување на нормите на Изборниот законик – порача Милошоски.

Тој потенцираше дека предлог измените се во согласност со Реформската агенда. Додаде дека усвојувањето на Изборниот законик ќе го направи одржлив и оправдан во следните 5, 10 и 15 години.

– Согласно тоа сметам дека би било добро во скратена постапка истиот да биде усвоен и поддржан консензуално од сите политички партии во Собранието – појасни Милошоски.

Координаторот на пратеничката група на Левица, Борислав Крмов, реагираше на начинот на кој се носи ИЗ, обвинувајќи дека јавноста е доведена во заблуда со тврдењата дека за текстот е постигнат широк политички консензус.

– Не е точно дека сте имале каков било консензус од партијата Левица за овој документ. Сето тоа се лаги. Ние сме доведени да прифатиме којзнае што, само за да фрлите неколку ситни трошки и потоа да тврдите дека има согласност. Исправањето на неуставните решенија не е услуга кон Левица, туку ваша обврска – изјави Крмов.

Пред гласањето на дневниот ред, координаторот на пратеничката група на СДСМ, Оливер Спасовски, побара точката да биде симната од дневен ред, посочувајќи дека ова законско решение секогаш досега се носело со консензус.

– Точно е дека СДСМ почна да работи во работната група којашто беше за подготовка на Изборниот законик, но мора да потсетиме дека ја напуштивме во моментот кога одлучивте како парламентарно мнозинство да го измените Законот за влада, кој исто така, е донесен со консензус. На почетокот во работната група укажавме дека носењето на Изборниот законик треба исклучиво да биде со консензус помеѓу политичките субјекти – рече Спасовски.

Пратеникот од Левица Сашко Јанчев, исто така, побара симнување на оваа точка од дневен ред, нагласувајќи дека е евидентно дека нема консензус.

И пратеничката Моника Зајкова побара симнување на точка од дневен ред, укажувајќи дека тоа што се прави е класичен заговор против граѓаните, симулирајќи консензус и буткајќи го законот.

Пратениците гласаа по секој од предлозите и во трите гласања не беше усвоено да се симне точката од дневниот ред.

The post ДИЈАСПОРАТА ЌЕ ГЛАСА ЕЛЕКТРОНСКИ, ОСТАНУВААТ 6 ИЗБОРНИ ЕДИНИЦИ Собранието ја изгласа потребата од измени на Изборниот законик appeared first on plusinfo.mk.

Ставот на претседателот на СДСМ, Венко Филипче, којшто изјави дека ќе го блокира предложениот Изборен законик е само доказ дека неговата главна цел е да се спротивставува на законите коишто се дел од Реформската агенда, а за коишто Европската комисија досега даваше високи оценки за нивното донесување и имплементирање, рече денеска пратеникот на ВМРО-ДПМНЕ, Антонио Милошоски на прес-конференција.

– Втората работа, сметам дека Венко Филипче преку најавата за блокада на Изборниот законик, бара можно оправдување, алиби за следниот изборен пораз или евентуално за бојкотирање на следните парламентарни избори, без разлика кога ќе се случат – рече Милошоски.

Третата работа, додаде тој, е многу симптоматична.

– Тоа е прашањето дали Венко Филипче ја следи Левица во нејзините ставови. Бидејќи, денеска имавме најава од Левица за можна блокада и за филибастеринг на овој закон од Реформската агенда, а потоа следува потврдата од Венко Филипче којшто се обидува да го имитира Димитар Апасиев. Дали ова е случајно или координирано, останува да одговори претседателот на СДСМ – рече Милошоски.

Тој порача и дека Филипче ѝ прави штета на државаа.

– И последната поента што сакам да ја упатам, како една остра критика до претседателот на СДСМ, којшто многу често знае реторички да ја истакне важноста на граѓаните на Македонија, без разлика каде живеат, дали во државата или во дијаспората, е што токму овој Изборен законик предвидува електронско гласање на дијаспората, согласно моделите коишто ги видовме во Француската Република и во Република Естонија. Ваквото електронско гласање на дијаспората цениме дека е многу важно и за нивното учество со гласање на изборите за претседател на државата и нивното учество со гласање за избор на пратеници. Но, предавничкиот однос на Венко Филипче, за жал, не се гледа само по неговиот однос кон граѓаните во Република Македонија. Се забележува и преку неговиот пристап кон нашите содржавјани коишто живеат надвор од границите на Македонија. За жал, со ваквиот однос веројатно господинот Филипче ќе ги изгуби и следните парламентарни избори, без разлика кога ќе се случат, но многу е непромислено што со ваквите потези краткорочно можеби наоѓа за себе алиби, но долгорочно ѝ прави штета на Република Македонија. Прво, по однос на нашата Реформска агенда пред Европската комисија и второ, по однос на таа нераскинлива врска на македонските иселеници со матичната држава преку можноста и уставното право тие да гласаат на секои избори – порача Милошоски.

ЛЕВИЦА ЌЕ БЛОКИРА НЕШТО ШТО ПРИФАТИ, А СДСМ НЕШТО ШТО БОЈКОТИРАШЕ! Милошоски за заканите за блокада на измените во Изборниот законик

The post ФИЛИПЧЕ СИ СПРЕМА АЛИБИ ЗА ПОРАЗ ИЛИ ЗА БОЈКОТ НА ИЗБОРИТЕ Со блокадата на Изборниот законик ѝ прави штета на државата appeared first on plusinfo.mk.

Пратеникот од редовите на ВМРО-ДПМНЕ, Антонио Милошоски, во гостување во централниот Дневник на Сител порача дека партијата останува на ставот оти уставни измени не треба да се носат доколку тие не носат јасна европска перспектива и конкретни гаранции за членство во Европската Унија.

Милошоски нагласи дека ВМРО-ДПМНЕ не прифаќа промени кои, како што рече, би ја однеле државата во нова неизвесност без сигурен исход.

– По однос на тоа прашање ние сме јасни, сме го искажале нашиот став. Ние не сметаме дека уставните измени треба да се направат, а притоа таквиот чекор да не однесе во неизвесност и да бидат направени за нешто за коешто не може да ја постигнете целта – изјави Милошоски.

Тој потсети и на претходни уставни измени, наведувајќи дека, според него, ветувањата тогаш не биле исполнети.

– Ние веќе едни такви уставни измени имавме. Тогаш СДСМ и ДУИ ги промовираа како уставни измени по однос на уставното име на Република Македонија, дека тоа ќе ги отвори вратите на ЕУ, дека ќе има бесплатно здравство, бесплатни вакцини, стипендии, беше таа една голема кампања, но видовме дека наместо отворање на поглавјата и преговори со ЕУ, ние добивме затворена врата пред нос од страна на Франција, а потоа од и од соседна Бугарија – рече тој.

Милошоски истакна дека Македонија не смее повторно да влегува во процес на уставни измени без, како што наведе, цврсти и јасни гаранции за зачувување на националниот идентитет, јазикот и историската посебност.

– Поучени од тоа искуство, сметаме дека би било лековерно да се оди во уставни измени, а притоа да немате извесност во процесот дека ќе си зачувате своја национална посебност и дека ќе стигнете до целта како полноправна земја членка на ЕУ – додаде Милошоски.

The post МИЛОШОСКИ СО ПОРАКА ДО БРИСЕЛ Македонија не смее да ризикува без сигурен пат кон ЕУ appeared first on plusinfo.mk.

Над 50 илјади евра досега се потрошени за истражната постапка за набавките на мазут за ТЕЦ Неготино, информираше обвинителката Катерина Коларевиќ на денешен брифинг.

Шефот на Основното јавно обвинителство за гонење организиран криминал и корупција, Ислам Абази, изјави дека ниту како јавен обвинител, ниту како раководител, не вршел притисок или влијание врз обвинителите во предметите по кои постапуваат.

– Јас ни како обвинител, ни како виш, на ниеден обвинител не сум му сугерирал, ниту пак сум ја загрозил неговата самостојност. На ниеден јавен обвинител не сум вршел притисок или влијание да донесе каква било одлука – изјави Абази на брифинг со новинари, одговарајќи на обвинувањата што претходно ги упати ВМРО-ДПМНЕ.

Обвинувањата од Милошоски

Реакцијата на Абази следува по прес-конференцијата на Антонио Милошоски, кој обвини дека раководителот на ОЈО ГОКК донел, како што рече, „контроверзна наредба“ за запирање на постапката за набавките на мазут за ТЕЦ Неготино, вредна 167 милиони евра.

Милошоски тврдеше дека Абази постапувал под политичко влијание и дека со одлуката од одговорност биле ослободени лица блиски до партии од поранешната власт.

Според него, без обвинение останале поранешниот директор на ЕСМ, Васко Ковачевски, кој е во бегство, како и бизнисмените Асмир Јахоски и Ратко Капушевски.

Тој ја доведе во прашање и одлуката обвинителството да не го третира бегството на Ковачевски како дополнителна индиција во предметот, оценувајќи дека со тоа била нарушена довербата во правосудството.

Обвинителството ја запре истрагата

Во меѓувреме, Основно јавно обвинителство за гонење организиран криминал и корупција официјално соопшти дека по едногодишна истражна постапка е донесена наредба за запирање на истрагата за набавките на мазут за ТЕЦ Неготино.

Од обвинителството наведуваат дека од прибраните докази не било утврдено дека осомничените ги сториле кривичните дела што им се ставале на товар, ниту дека постои друго кривично дело што се гони по службена должност.

– Од прибраните докази не се утврди дека осомничените ги сториле кривичните дела што им се ставаа на товар, ниту е утврдено постоење друго кривично дело што се гони по службена должност – се наведува во соопштението.

Што покажала истрагата

Според ОЈО ГОКК, во текот на постапката биле анализирани обемна документација, финансиски и договорни документи, вештачења и искази на сведоци од АД ЕСМ, ТЕЦ Неготино и економски оператори со лиценца за трговија со мазут.

Обвинителството оценило дека набавките биле спроведувани во услови на прогласена енергетска криза и согласно законските исклучоци од Законот за јавни набавки, со цел да се обезбеди непречено производство на електрична енергија.

– Истрагата утврди дека постапките биле спроведувани транспарентно. ЕСМ имало цел да ги вклучи сите оператори што поседувале лиценци за трговија со мазут, во интерес на побрза испорака – наведуваат од обвинителството.

Од таму додаваат дека дел од компаниите не учествувале во постапките поради деловни и економски проценки, високите количини, потребните банкарски гаранции и ризиците на тогашниот енергетски пазар.

Нема утврдена штета

Во образложението се наведува дека мазутот бил навремено и континуирано испорачуван и дека во критичниот период немало рестрикции во снабдувањето со електрична енергија.

Обвинителството тврди дека не е утврдена штета ниту за АД ЕСМ, ниту за државниот буџет.

– Напротив, од доказите произлезе дека измените на годишниот план за јавни набавки и склучувањето на анексите биле спроведени со одлуки на надлежните органи на АД ЕСМ, со цел обезбедување доволни количини мазут за непречено функционирање на ТЕЦ Неготино – посочуваат од ОЈО ГОКК.

Во однос на сомнежите за перење пари, обвинителството заклучува дека исплатените средства не претставуваат противправно стекната имотна корист и дека трансакциите не можат да се третираат како перење пари или прикривање незаконски стекнати средства.

Осомничените остануваат на слобода

Со запирањето на истрагата, без обвинение останаа Јахоски, сопственик на Пуцко Петрол, и Капушевски, сопственик на РКМ, кои беа меѓу главните осомничени во предметот вреден 167 милиони евра.

Јахоски во текот на постапката беше во притвор, а подоцна се бранеше од слобода со гаранција од над два милиони евра, додека Капушевски цело време се бранеше од слобода.

Истрагата опфати вкупно 13 лица, меѓу кои и Ковачевски, како и повеќе поранешни функционери и службени лица од енергетскиот сектор.

По донесената наредба за запирање на постапката, сите осомничени остануваат на слобода, а оштетеното правно лице има право на приговор до Вишото јавно обвинителство во Скопје во рок од осум дена.

The post НЕ СУМ ВЛИЈАЕЛ НА НИТУ ЕДЕН НАЧИН ВРЗ СЛУЧАЈОТ „МАЗУТ ЗА ТЕЦ НЕГОТИНО“ Абази ги отфрла обвинувањата од Милошоски appeared first on plusinfo.mk.

ВМРО-ДПМНЕ го повика шефот на ОЈО ГОКК, Ислам Абази, веднаш да поднесе оставка откако денеска Обвинителството соопшти дека ја запира истрагата во предметот поврзан со набавките на мазут за потребите на ТЕЦ Неготино, вреден 167 милиони евра, во која беа вклучени бегалецот Васко Ковачевски, синот на пратеник од ДУИ, Асмир Јахоски и Ратко Капушевски.

– Ислам Абази, соседот на Али Ахмети од Зајас, си ја одработува добиената функција шеф на ОЈО ГОКК, и по насока на триото Филипче, Ахмети и Заев, донесе одлука да се запре судска постапка во која осомничени меѓу другите беа и членот на СДС и бегалец од правдата Васко Ковачевски, и синот на пратеник од ДУИ, Асмир Јахоски и Ратко Капушевски. Целата јавност во овој скандалозен случај, виде перење пари, криминал и труење на животната средина, само Ислам Абази не виде ништо. Постапката е запрена. Бегалецот е слободен. Довербата во правосудството од 2 проценти, со обвинители како Ислам Абази ќе падне и на 1 процент – реагира денеска на прес конфренеција Антонио Милошоски, член на Извршниот комитет на ВМРО-ДПМНЕ и пратеник.

Обвинителството вели дека немало докази, а Милошоски прашува: зарем бегството на Васко Ковачевски не е доказ или силна индиција дека осомничениот бега од правдата?

– Ковачевски не е во Македонија. Побегна кон крајот на 2024 година и оттогаш за органите на прогонот не е достапен. И наместо тоа да биде дополнителна индиција и мотив Обвинителството да го води овој случај, за обвинителот Абази тоа стана решение да го затвори овој случај. Нема присутен обвинет, нема водење постапка, особено не ако припаѓаат на спонозорите на Ислам Абази. Ова е трагичната шема по која работат остатоците од власта на СДС и ДУИ во судството и обвинителството – рече Милошоски.

Тој потсети дека Антикорупциската комисија утврдила дека на фирмата РКМ ѝ биле платени повеќе пари за помалку доставен мазут. Дури 18.000 тони помалку мазут е скапо наплатен. Парите отишле во нечии џебови, а мазутот не дошол. Сега кажуваат дека нема штета. Дека сè било законски исклучок. Дека енергетската криза оправдувала секаква постапка. Но ниедна енергетска криза не оправдува анекси кои менуваат услови во корист на ист добавувач и плаќање на недоставен мазут.

– Дали дел од тие пари отишле кај менторите на Ислам Абази како обвинител? – прашува Милошоски.

Тој постави три прашања за кои очекува одговор:

– Прво, зошто Ислам Абази одлучи да ја запре оваа постапка и врз основа на чија проценка? Дали проценката е правна или лукративна? Второ, зошто запирањето дојде токму сега, додека Ковачевски е надвор од земјата и е недостапен за органите на прогонот? И трето, дали некој воопшто го побарал сведочењето на сите засегнати страни пред да се донесе оваа контраверзна и лукративна одлука?

Милошоски порача дека Ковачевски треба се врати и да одговара, ако е невин да докаже тоа пред судот.

– Ние нема да го затвориме овој случај само затоа што Ислам Абази одлучи на контроверзен начин да го затвори ова досие – заклучи Милошоски.

The post КАДАРОТ НА ФИЛИПЧЕ, ЗАЕВ И НА АХМЕТИ ИСПОРАЧУВА ЗА БАНДАТА Милошоски побара оставка од Ислам Абази по запирањето на истрагата за ТЕЦ Неготино appeared first on plusinfo.mk.

СДСМ во недостиг на идеи шират манипулации за двојни државјанства на пратеници, вели пратеникот на ВМРО-ДПМНЕ, Антонио Милошоски.

– И во 2021 година и денес СДСМ не престана со злоупотреба, со шпекулации, во прашална форма, никогаш како конкретно тврдење, кој има, кој нема, ваков или таков пасош, во недостаток на други идеи, проекти или можеби поради внатрепартиски слабости. И во 2021 година преку нивниот тогашен сојузник Красимир Каракачанов и сега преку нивната веб страна, злоупотребуваат, клеветат и шират манипулации по однос на двојно државјанство на одредени колеги пратеници. Сметавме дека ова е еден начин како да го повториме нашиот став што го имавме од 2021 година, дека не се сменило ништо, и дека доколку некој смета дека единственото државјанство е концепт којшто е поцврст за македонското Собрание, ние стоиме зад тој предлог, како тогаш, така и денес, затоа и го предложивме – рече Милошоски во гостување на Алфа телевизија.

Пратеникот рече дека обвинувањата од опозициската СДСМдека одреден дел од пратениците се со двојно државјанство се неосновани. Потписници на измената на Законот за пратениците, додаде, се токму актуелни пратеници од пратеничката група на ВМРО-ДПМНЕ, за кои СДСМ наведува дека се со бугарско државјанство.

– Второ, сметаме дека кога сте одбрале да бидете пратеник, има логика, ако сте пратеник во Собранието на Македонија да бидете и според државјанство лојален само на таа држава каде што ви дале доверба да бидете пратеник. Бидејќи кога има двојно државјанство, иако македонскиот Устав не го забранува, сепак има една етичка и политичка дилема на која држава сте повеќе лојален, особено ако во Собранието одлучувате за теми коишто не ја засегаат само Македонија, туку можеби засегаат и други држави – рече пратеникот Милошоски.

The post СДСМ НЕМА ИДЕИ, ПА ЛАЖЕ ДЕКА НЕКОИ ПРАТЕНИЦИ НА ВМРО-ДПМНЕ ИМААТ БУГАРСКО ДРЖАВЈАНСТВО Злоупотребуваат, клеветат и шират манипулации appeared first on plusinfo.mk.

СДСМ се соочува со недостаток на политичка насока, проследена со зголемена агресивност во јавниот дискурс, како и со внатрешна несигурност, вели Антонио Милошоски, пратеник на ВМРО-ДПМНЕ.

– Во моментов раководството на СДСМ нема политички компас на делување. И тоа не го говорам само за нивниот однос кон владејачкото мнозинство, туку го говорам и кон нивните сопствени поистакнати членови во рамките на СДСМ. Секој којшто има различно мислење, без разлика дали е претставник на власт, на собраниско мнозинство или на дисиденти од редовите на СДСМ, наидува на жестока критика, омаловажувања, агресивен речник – рече Милошоски во гостување на Алфа.

Тој посочи дека раководството на СДСМ се чуствува несигурно поради некои можни истраги, предистраги или предмети на надлежните државни органи.

– СДСМ никогаш не била толку агресивна како што е денес, и со вокабуларот и со пристапот кон кој било поинаку размислувачки новинар, политичар, функционер или истакнат член на СДСМ – истакна Милошоски.

Тој вели дека очигледно е оти Венко Филипче се појавува како јавно лице на СДСМ, но според тонот и речникот може да се насети дека вистинското влијание доаѓа од други актери во позадина.

– Некој друг го има далечинското во рацете. Венко Филипче само номинално е претседател на СДСМ, а суштински гледаме дека не ги креира политиките на оваа, до пред извесно време, битна политичка партија во Македонија – рече Милошоски.

The post МОЖНИТЕ ИСТРАГИ И ПРЕДИСТРАГИ ГО ПРАВАТ НЕРВОЗНО РАКОВОДСТВОТО НА СДСМ Партијата е агресивна и нема политички компас appeared first on plusinfo.mk.

Во Собранието на Македонија немало никаква информација за предавањето на осомничениот бегалец Артан Груби од ДУИ, поранешен вицепремиер, осомничен за проневера на 8 милиони евра, кој денеска беше уапсен на граничниот премин Блаце, а за кој имаше меѓународна потерница уште од декември 2024 година, вели пратеникот и член на ИК на ВМРО-ДПМНЕ Антонио Милошоски.

– Веројатно во изминативе 12 или 14 месеци имал време да процени дека нема да има брзи политички промени на власта во Македонија. Тоа што ДУИ го очекуваше или го најавуваше после нивниот пораз на изборите. И тоа може да биде една и од мотивациите на господинот Груби да не одолговлекува и да се пријави на органите на прогонот – рече Милошоски во гостување на Алсат.

Според него, овде станува збор не само за лице кое што е осомничено од македонското јавно обвинителство, туку се работи за функционер кој е на црната листа на САД.

– Која било земја, каде и да престојувал, без да прејудицирам, не верувам дека е расположена бесконечно да му овозможи гостопримство. Дипломатскиот притисок од една или од друга страна може да биде скап за таа земја која што би била домаќин на еден ваков човек којшто е осомничен – истакна Милошоски.

Тој порача дека власта смета оти е време за одговорност, без да прејудицира како ќе почне или ќе заврши процесот.

– После изборите во Косово и формирањето на една постабилна влада таму со која што господинот Груби, можам да кажам, ете и нема некои најдобри релации, проценките беа дека порано или подоцна ќе се појави пред органите на прогонот – заклучи Милошоски.

ЗАВРШИ РАСПИТОТ НА ГРУБИ ВО ОБВИНИТЕЛСТВОТО Изведен е пред судија на претходна постапка

The post НИЕДНА ЗЕМЈА НЕМА БЕСКОНЕЧНО ДА ЧУВА БЕГАЛЕЦ КОЈ Е НА ЦРНАТА ЛИСТА НА САД Груби не е во најдобри релации со новата власт во Косово, па се предаде appeared first on plusinfo.mk.

Со 84 гласа „за“, без ниту еден против или воздржан, на предлог на ВМРО-ДПМНЕ, Вреди и ЗНАМ, Собранието ја формираше Анкетната комисија за утврдување на околностите за трагедијата во Кочани и другите несреќи и трагедии во Македонија.

„Целта е јасна: расветлување на пропустите, утврдување одговорност каде што постои и унапредување на системите што треба да ги штитат граѓаните“, објави пратеникот Бране Петрушевски по гласањето на пратениците.

Во образложението на иницијативата пратеникот Антонио Милошоски рече дека Анкетната комисија има цел неселективно да ги утврди пропустите на институциите за сите трагедии во изминатиот период во кои имаше жртви и да се спречат идни несреќи. Ќе се разгледува пожарот во дискотеката „Пулс“ во Кочани, пожарот во модуларната болница во Тетово и автобуските несреќи на „Дурмо турс“ и на „Беса транс“ вокои загинаа вкупно 138 луѓе.  Добиените наоди Комисијата понатаму ќе ги испрати до Владата и до Јавното обвинителство, за да се лоцира доколку има политичка и кривична одговорност.

– Оваа Анкетна комисија се поднесува заради сериозноста на последиците на трагедиите кои се случија последните неколку години. Целта е да се разгледаат сите пропусти и сметам дека овие трагедии што со човечки животи ги платија недолжни луѓе имаат заеднички именител – кај сите 4 трагични несреќи се забележува сплет на пропусти на многу институции, нефункционалност на добар дел од системот и на раководители на одредени институции коишто создале една опасна замка, во која, за жал ненадоместливо имавме загуба на 138 човечки животи – рече Милошоски.

Пратеникот истакна дека е потреба неселективност за сите трагични настани со што би со дошло до објективно согледување и решавање на системските пропусти и недостатоци.

– Со изгласувањето и формирањето на една ваква Анкетна комисија ние како пратеници и како Собрание би покажале неселективност, затоа сметам дека сите овие 4 трагични настани коишто резултирале со ваква ненадоместлива штета и за семејствата и за целата држава, не треба да бидат селективно разгледувани, туку да бидат разгледувани како една целина, за да можеме со објективни согледувања да дадеме препораки за поправање на одредени системски недостатоци – рече Милошоски.

The post КОИ СЕ ПРИЧИНИТЕ ЗА ПОЖАРИТЕ ВО КОЧАНИ И ВО ТЕТОВО И ЗА АВТОБУСКИТЕ НЕСРЕЌИ КОИ ОДНЕСОА 138 ЖИВОТИ? Одговорот треба да го даде новоформираната Анкетна комисија appeared first on plusinfo.mk.