СЗО: Повеќето вакцинирани делта сојот го минуваат асимптоматски

Луѓето кои биле целосно вакцинирани против ковид-19 се инфицираат со варијантата делта, но Светската здравствена организација (СЗО) тврди дека вакцините ги заштитиле повеќето од сериозни болести или смрт.

– Постојат докази дека има случаи на инфицирани меѓу вакцинираните, особено со варијантата делта. Сепак, повеќето од овие случаи биле со благи симптоми или асимптоматски – рече Соума Суаминатан, кој е на чело на научниот оддел при СЗО.

Сепак, бројот на хоспитализирани лица се зголемува во некои делови на светот, особено каде што нивоата на вакцинација се ниски и се шири многу заразната варијанта делта, додаде таа.

Во Соединетите држави, здравствените власти велат дека скоро сите хоспитализации и смртни случаи од ковид-19 неодамна биле меѓу невакцинираните лица. Болестите кај вакцинираните лица се ретки, а околу 75% од луѓето кои умираат или се хоспитализирани со ковид-19 по вакцинирањето се над 65 години, според податоците на Центрите за контрола и превенција на болести.

– Делта сојот се шири низ светот со брзо темпо, што доведува до зголемување на нови и смртни случаи. Сепак, не се погодени сите на ист начин – рече генералниот директор на СЗО, Тедрос Аданом Гебрејесус, цитиран од „CNBC“.

– Делта варијантата брзо се шири и инфицира ранливи и незаштитени луѓе – вели првиот човек на СЗО.

Суаминатан предупреди дека вакцинираните лица можат да се заразат со коронавирусот и да го пренесат на други, повикувајќи ги луѓето да продолжат да носат маски и да практикуваат социјално дистанцирање.

– Вакцината дефинитивно значително ја намалува веројатноста за сериозни хоспитализации и смрт – додаде таа.

Некои студии покажуваат дека луѓето заразени со ковид-19 по вакцинирањето ослободуваат многу помалку вирус отколку невакцинираните, што го намалува ризикот од пренесување на други. Според СЗО, потребни се повеќе истражувања за да се разбере влијанието на вакцините врз преносот.