СВЕТСКИОТ ЕКОНОМСКИ ФОРУМ ОТВОРИ ИСТРАГА ПРОТИВ ОСНОВАЧОТ Со пари од Форумот, Шваб со сопругата плаќале приватни масажи во хотели

Светскиот економски форум денеска потврди дека започнал истрага против својот основач Клаус Шваб, по добивањето анонимна пријава за злоупотреби на пари на форумот. Шваб кој деновиве ненадејно поднесе оставка ги негира тврдењата и најави тужба.

Во соопштението на Форумот се вели дека Одборот на доверители „едногласно ја поддржал одлуката на Одборот за ревизија и ризик да иницира независна истрага по писмото на свиркачот кое содржи наводи за финансиско и етичко недолично однесување од страна на долгогодишниот лидер и неговата сопруга вклучително и наводите дека семејството Шваб ги измешало нивните лични работи со ресурсите на Форумот без соодветен надзор.

Писмото, кое го имал на увид весникот Волстрит журнал „вклучува наводи дека Шваб побарал од помладите вработени да подигнат илјадници долари од банкоматите во негово име и користел средства од Форумот за да плати за приватни масажи во хотелите“.

„Исто така, се тврди дека неговата сопруга Хилде, поранешна вработена во Форум, организирала интернет состаноци финансирани од Форумот со цел да го оправда луксузното патување за одмор на сметка на организацијата“, пишува весникот.

Таа, според писмото, ја присвоила и Вилата Мунди, со поглед на Женевското Езеро, која Форумот ја купил за 30 милиони долари и платил уште 20 милиони за реновирање.

Писмото, исто така, наводно покренало загриженост за тоа како Шваб се однесувал со вработените жени и како во неговото повеќедецениско раководство наводно дозволил случаите на сексуално вознемирување и дискриминаторско однесување да останат непроверени.

Иако Форумот сериозно ги сфаќа овие наводи, во соопштението, нагласува дека тие остануваат недокажани и ќе го чека исходот од истрагата за дополнително коментирање.

Шваб ги отфрла обвинувањата и се закани со тужби. Тој  веќе се повлече од функцијата извршен претседател минатата година, а поранешниот министер за надворешни работи на Норвешка Борге Бренде го презеде секојдневното управување.

Пред неколку недели, 87-годишниот Шваб рече дека ќе се повлече од функцијата неизвршен претседател, но предавањето ќе трае до јануари 2027 година. Но, во понеделникот тој ненадејно поднесе оставка, што сугерира дека повод за тоа било писмото.

Светскиот економски форум соопшти дека на вонредниот состанок на Одборот на 20 април, Одборот на доверители ја забележа оставката на Клаус Шваб.

„Во согласност со Правилата и регулативите на Форумот, Одборот едногласно го назначи заменик-претседателот Питер Брабек-Летмат за претседавач ад привремен. Исто така, формираше Комитет за пребарување за избор на иден претседател“, се наведува во објавата.

Клаус Шваб 55 години е на функцијата извршен директор на Светскиот економски форум.

Светскиот економски форум, е домаќин на годишниот состанок на богатите, познати и влијателни глобални елити во луксузниот швајцарски ски-центар Давос.