СВЕТСКА ПРЕМИЕРА ВО ВЕНЕЦИЈА „Вера сонува за морето“ на Калтрина Красниќи на Филмски фестивал
Немојте да престанете да сонувате! Мене ми се оствари желбата да бидам дел од одлично сценарио а и да стапнам на црвениот тепих, рече Теута Ајдини-Јегени, која ја толкува Вера.
„Вера сонува за морето“ на Калтрина Красниќи ќе има светска премиера на Интернационалниот филмски фестивал во Венеција. Првиот долгометражен филм на Красниќи, кој е поддржан од Агенцијата за филм на Република Северна Македонија, ќе има вкупно девет проекции во рамките на фестивалските денови во Венеција.
„Вера сонува за морето“ ја раскажува приказната за Вера, преведувач на знаковен јазик која по самоубиството на сопругот, реномиран судија, Фатмир Гаши, се наоѓа во ситуација самата да преговара за иднината на нејзините ќерка и внука со традицијата и со државата, во момент кога сите ги презираат жените како нив.
Вера е во главната улога филмот. Ја игра актерката Теута Ајдини – Јегени, другите улоги ги толкуваат Рефет Абази, Алкета Силај, Астрит Кабаши и др. Режисер на филмот е Калтрина Красниќи, сценариото е на Дорутина Баша, кинематограф Севдије Кастрати, монтажер на филмот е Владимир Павловски, а снимател на звук е Игор Поповски, композитор е Петрит Чеку, дизајнер на звук Дарко Спасовски, а продуцент од Македонија е Дрим Фектори, односно Огнен Антов.
– Живеам во една мала чудесна земја, каде невозможното станува возможно. Каде далечината е блиску, каде желбата станува реалност, каде сонот станува јаве. Немојте да престанете да сонувате! Мене ми се оствари желбата да бидам дел од одлично сценарио а и да стапнам на црвениот тепих – вели Теута Ајдини-Јегени.
Директорот на Агенција за филм Бојан Лазаревски истакна дека со ова учество на Интернационалниот филмски фестивал во Венеција на некој начин се заокружува филмската фестивалска година.
– Новиот филмски бран продолжува, а го обележуваат дебитанти, млади автори и што ми е особено драго – сѐ повеќе женски автори. Драго ми е што Агенцијата за филм го препозна овој ко-продукциски проект, прв долгометражен филм на режисерката Калтрина Красниќи со кој се надевам сите ќе се гордееме – рече Лазаревски.
Филмот е влезен во официјалната селекција на 78. издание на Фестивалот во Венеција во категоријата Хоризонти и третира тема која всушност е една од носечките елементи на овогодинешното издание на фестивалот.
Интернационалниот филмски фестивал во Венеција се одржува од 1 до 11 септември 2021, а светската премиера на „Вера сонува за морето“ е на осми септември.