СУБВЕНЦИИ ЗА 200 ЕЛЕКТРИЧНИ ВОЗИЛА ЗА ТАКСИСТИТЕ Министерството за животна средина ќе плати 15% од цената

Првиот вицепремиер и министер за животна средина и просторно планирање, Изет Меџити, денес на работен состанок со Унијата за здруженија на таксисти го претстави проектот за субвенционирање на првите 200 електрични возила за таксисти, како дел од напорите на Министерството за почист, потивок и поефикасен урбан транспорт за граѓаните на Скопје и целата држава, соопшти Министерството за животна средина.

Овој проект, изјави по средбата Меџити, претставува конкретен и значаен чекор кон трансформација на урбаниот транспорт и е дел од стратегијата за борба против загадувањето на воздухот и подобрување на квалитетот на урбаниот живот.

– Возилото што денес го претставуваме е електрично, со високи еколошки стандарди, без штетни емисии, без бучава и со висока енергетска ефикасност. Овие возила во неколку фази ќе ги заменат постојните кои користат дизел, бензин или гас и ќе донесат значителни придобивки за граѓаните, таксистите и за животната средина – рече Меџити.

Тој додаде дека просечната цена на едно електрично возило е 28.000 евра, вкупната сума за 200 возила изнесува околу 5,6 милиони евра, а Министерството ќе субвенционира 15% од сумата или околу 840.000 евра.

Меџити информираше дека, според еколошките експерти, замената на овие возила ќе резултира со намалување од над 2.700 тони јаглерод диоксид годишно, што е еквивалентно на садење на повеќе од 120.000 садници. Дополнително, тој истакна дека ќе има значително намалување на урбаната бучава, особено во густо населени зони.
Додаде и дека досега Министерството веќе иницираше Car sharing систем со првите 100 електрични возила за јавна употреба, електрични тротинети и велосипеди во неколку градови. Во соработка со Европската Унија преку програмата „ЕУ за чист воздух“, реализирана е донација од 6 електрични автобуси за  Скопје, се зголемени капацитетите за мониторинг на квалитетот на воздухот и се засадени десетици илјади садници низ целата земја.