СУБВЕНЦИИ ПО ДВА ОСНОВИ ЗА ЗЕМЈОДЕЛЦИТЕ Ќе се субвенционира и според обработена површина и според остварено производство

Нов модел на субвенционирање на земјоделците најавија министерот за земјоделство Љупчо Николовски и премиерот Димитар Ковачевски. Првичната верзија е помината на владина седница, а предвидува земјоделците да добиваат субвенции не само за поседување обработлива површина, туку и за остварено производство. Целта е да се поттикне поголемо производство храна и да се намали увозната зависност на земјава, а акцентот ќе биде на стратешките култури, вели Николовски.

Основната субвенција би ја добивале земјоделците кои обработуваат земјоделски површини со едногодишна култура. Дополнителната субвенција, пак, е врзана со остварен принос, но и со предавање на производството во регистрирани домашни капацитети.

Овој начин на субвенционирање веќе се воведе како пилот-проект во текот на изминатата година за сончоглед, пченица, јачмен и други стратешки култури, кои според премиерот Ковачевски веднаш дал позитивни резултати.