КАКО ИМА НАФТА ЗА НЕКОИ АВТОБУСИ, А ЗА ДРУГИ НЕМА? Купиле месечни билети, а нема со што да одат на работа
Од Независниот синдикат на претпријатието велат дека немањето нафта е причина за колапсот на градскиот превоз. Граѓаните се гневни што плаќаат месечни билети, а се оставени со часови на студ да чекаат автобус.
И покрај најавите од Град Скопје дека ЈСП ќе работи со полн капацитет, денеска утрово ситуацијата беше значително поинаква. Автобусите ги немало на најфреквентните линии, а тие што дошле биле претрупани со патници и доцнеле, сведочат скопјани. Патниците вчера чекале и по 40 минути, а некои дури велат дека блокирале други автобуси кај Транспортен центар за да предизвикаат реакција и за да добијат автобус за нивната линија и да се вратат дома.
– Чекав на автобуската постојка 50 минути, автобуси не доаѓаа. Кога автобусот на линија „5“ конечно пристигна, беше толку преполн што немаше каде да се стои. Единствено што ни остана беше да чекаме и да се жалиме. На крајот, моравме да блокираме друга линија за да може барем некој автобус да дојде – изјави една од патничките.
На некои линии како „15“ и „35“, патниците чекале повеќе од еден час.
– Не може да се верува дека автобусите не доаѓаат. На линија „15“ не помина еден автобус цели 60 минути, а патниците беа нервозни и не можеа да стигнат на работа или на училиште – напиша на социјалните мрежи еден од разочараните корисници.
Иако некои линии биле прекинати или не се појавувале воопшто, блокадите и притисоците од граѓаните биле единствениот начин да се постигне некаква реакција од надлежните.
– По неколку часа чекање на линија „67“, ниту еден автобус не дојде. Почнавме да блокираме и други автобуси и, по 5 часа чекање, добивме барем еден автобус – додаде друга патничка.
– Нема нафта за автобусите кои ја поврзуваат населбата Драчево со Ченто и околните села, додека автобусите како број „22“, „3“, „5“, „15А“, „7“, „57“ функционираат редовно. Како се распределуваат ресурсите? – прашува скопјанец.
– На автобусот број „53“, кој беше на пат за Катланово, му се исклучи моторот и не сакаше да ги качи патниците за враќање. Очајни, повторно чекавме за следниот автобус, но и тој не дојде. Возачите ни рекоа дека нема нафта. Се сомневаме дека ова е предизборна тактика на Данела, која нè малтретира со овие хаотични услови – вели една револтирана госпоѓа.
Ова се само дел од реакциите на скопјани кои за време на викендот, а и денеска утрово, не можеле да пристигнат до посакуваните дестинации. Тие се гневни што плаќаат месечни билети, а се оставени со часови на студ да ги чекаат автобусите.
Од Независниот синдикат на претпријатието за ТВ24 велат дека немањето нафта е причина за колапсот на градскиот превоз. Оттаму додаваат дека повеќе од три месеци ЈСП се соочува со недостиг на нафта, но ситуацијата ескалирала вчера кога воопшто не била испорачана нафта во двете автобази. Од синдикатот не знаат што се случува, но велат дека ова е голем срам за Градот.
Автобусите од базата во Автокоманда биле испраќани да точат гориво во Ѓорче Петров, бидејќи нивните резервоари биле празни. Од базата во Ѓорче Петров се точело гориво колку што е потребно за автобусот да направи само две-три тури на одредена линија. Многу од автобусите останале без гориво и на патниците им било кажано дека возилото е во дефект, за да се прикрие проблемот со нафтата.
Претходниот месец, Државниот завод за ревизија (ДЗР) даде неповолно мислење за реалноста и објективноста на финансиските извештаи на ЈСП „Скопје“ и заклучи дека јавното претпријатие не е во состојба да обезбеди квалитетни и навремени услуги на граѓаните.
Во извештајот по ревизијата на финансиските извештаи за 2023 година, нотирани се голем број долгови на ЈСП кон различни доверители. Претходно склучени договори за плаќање на долгот на рати предвидуваат пресметување на казнена камата која е 50 проценти повисока од законската камата.
Вчера нешто пред полноќ, Град Скопје соопшти дека денеска автобусите на ЈСП ќе сообраќаат редовно, откако граѓаните се жалеле дека чекаат и по еден час на автобуските постојки.
„Ве известуваме дека и покрај сите притисоци, ЈСП ќе сообраќа редовно и во полн капацитет,“ соопшти Град Скопје.
Градот не објасни какви притисоци имал во врска со градскиот сообраќај.