СТРУЈАТА ВО МОДУЛАРНАТА БОЛНИЦА ЈА СПРОВЕЛЕ 2 НЕКВАЛИФИКУВАНИ ЛИЦА На вештакот Шаќири му рекле дека пресметките ги направиле во муабет со постари електричари

Во фаза на доказна постапка денеска во Основниот суд Тетово повеќе од 5 часа траеше главната расправа во судскиот процес против обвинетите Флорин Бесими и Артан Етеми како и правното лице ЈЗУ Клиничка болница за кривичното дело Тешки дела против општата сигурност, за пожарот во модуларната болница во кој загинаа 14 луѓе. Беа сослушани вешти лица кои во текот на истрагата изработиле вештачења.

Прво овластениот судски вештак по електротехника Ирфан Шаќири образложи дека по наредба на Јавното обвинителство за првото судење извршил вешт наод за можните индиции за појава на пожарот во објектот на модуларната болница и останува на фактите изнесени во тој извештај.

При поставените прашања од Обвинителството тој рече дека целокупната постапка за доведувањето на електричната енергија од трафостаницата до модифицираниот објект наречен модуларна болница е направенас од 2 неквалификувани лица, вработени во Клиничка болница Тетово.

– Во комуникација со нив во врска со определување тип на проводник, тие не понудија документ. Рекоа дека се направени пресметки врз основа на разговор со повозрасни електричари, кои им кажале каков кабел да користат од трафостаницата, за да има струја во објектот – рече Шаќири.

На прашање на одбраната дали се согласува дека инсталацијата е изведена спротивно на стандардите, вештото лица одговори „да“.

Рубин Бошковски од Министерството за внатрешени работи, кој извршил форензичко испитување, истакна дека утврдиле дека настанало механичко оштетување на продолжниот кабел поради нагмечувања или превиткување, на кој бил приклучен дефибрилатор.

– Високата температура довела до согорување на изолацијата од кабелот и создавање на пламен – посочи Бошковски.

На прашање дали при увидот биле забележани противпожарни апарати, Бошковски рече дека не биле евидентирани во самата болница.

Сведочеше и професорката Анита Грозданова од Технолошко-металуршкиот факултет која ги испитувала материјалите од кои е составена модуларната болница.

– Материјалите за изработка на префабрикуваниот контејнер ги задоволуваат барањата според спецификацијата на Министерството за здравство и истите се анализирани според процедури за соодветни својства, за што гарантирам – рече Грозданова.

Сведочеше и Свето Цветковски од Технолошко-металуршкиот факултет кој ги испитувал металите кои се користени при изведба на привремените објекти познати како модуларни болници. И тој потврди дека металните материјали се според спецификацијата наложена од Министерството за здравство.

Универзитетските професори Влатко Стоилков и Владимир Димчев од Факултетот за електротехника и информациски технологии при Универзитетот „Свети Кирил и Методиј“ во Скопје, изработиле вешт наод и мислење во писмена форма за тоа дали модуларните болница биле изградени според проектната задача, согласно барањата на договорниот орган.

– Според препораките на Светска банка во Македонија имало 4 типски објекти, а во Тетово бил изграден типски објект со ознака ЦЕ (латинско Ц). Во просториите на овие објекти, на еден кревет имало по една приклучница за електрична енергија (штекер) и еден приклучок за кислород – рече Стоилков.

За професорот Владимир Димчев немаше други прашања, а тој рече дека останува на ставовите дадени во писмениот вешт наод и мислење.

По сослушувањето на вештите лица одбраната побара да се сослушаат и вештите лица од Германија кои имаат изработен извештај. Судијата Реџеп Муса истакна дека според насоките на повисокиот Апелациски суд, предлогот на одбраната се одбива.

– Постојат доволно докази за околностите на настанот – посочи судијата.

Судијата ја прекина главната расправа поради истекување на работното време и ја закажа за 8 април во 9.30 часот. Тогаш ќе се читаат писмените докази од одбраната. Следните термини се 22 и 28 април.