Трамп и Меланија се позитивни на ковид-19, Бајден оди во карантин?

Американскиот претседател Доналд Трамп објави на Твитер дека тој и сопругата Меланија се позитивни на ковид-19. Како што наведе, двајцата одат веднаш во карантин.

Претходно соопшти дека неговата блиска соработничка, Хоуп Хикс (31) е позотивна на ковид-19. Хикс е најблискиот соработник на Трамп кој е позитивен на ковид, а според Би-Би-Си, таа патувала со авион со него на дебата со Џо Бајден во Охајо и била снимена како излегува од авионот без маска.

Таа исто така патуваше со Трамп со хеликоптер на митинг во Минесота.

Засега е непознато дали карантинот ќе влијае на втората дебата на Трамп со Бајден, што треба да се одржи на 15 октомври.

– Ќе видиме што ќе се случи – изјави Трамп телефонски за „Фокс њуз“.

Блумберг јави дека Хикс при враќањето од Минесота покажала први симптоми на болеста.

Желби за брзо опоравување преку Твитер искажаа голем број политичари и од Републиканската и од Демократската партија. Меѓу нив е и потпретседателот на САД, Мајк Пенс, кој според американските медиуми, ќе мора да оди во изолација бидејќи бил во близок контакт со Трамп.

Медиумите посочуваат дека Трамп имал голем број контакти во изминатите денови и оти може ќе биде тешко да се следат сите. Во изолација ќе треба да оди и голем дел од персоналот во Белата куќа, па се поставува прашањето како тоа ќе се одрази на понатамошната претседателска кампања.

Си-Ен-Ен посочува дека ќе треба да оди во карантин и да се тестира и демократскиот кандидат Џо Бајден, кој беше во контакт со Трамп за време на првата предизборна претседателска дебата. Медиумите, исто така, посочуваат дека ниту Трамп, ниту неговото семејство, освен Меланија, на дебатата не носеле маски и не ја почитувале мерката за физичко дистанцирање.

Ен-Би-Си њуз потенцира дека досега биле заразени и други политичари, меѓу кои и британскиот премиер Борис Џонсон и бразилскиот претседател Жаир Болсонеро и оти заедничко за тројцата е што ја потценувале сериозноста на вирусот.