Стотина увезени случаи со ковид-19, околу 1.000 имале контакт со заболен во земјава

Од вкупниот број заразени со ковид-19 во Македонија, 96 случаи (5,8%) се импортирани, а вкупно 977 лица (59,9%) имале контакт со веќе потврден случај во земјава, покажуваат официјалните податоци од Институтот за јавно здравје заклучно со 10 мај 2020 година.

Од нив едно заболено лице е детектирано на Меѓународниот аеродром Скопје.

Заклучно со 10.05.2020, пријавени се вкупно 1.664 случаи со ковид-19 во земјава.

Од пријавените случаи, 23,8% (n=396) се/биле хоспитализирани во текот на болеста, а останатите случаи биле/се на домашно лекување и во домашна изолација, асимптоматски или со полесна клиничка слика.

Во однос на симптомите кои се пријавени кај заболените лица, најчесто се регистрирани температура (65,9%), кашлица (54,9%), малаксаност (37,2%), треска (19,9%), главоболка (15,3%), болка во грло (14,9%) и отежнато дишење (14,7%).

Кај 552 или 33,2% од дијагностицираните лица не се регистрирани симптоми на заболувањето. Од нив, 405 или 73,4% имале контакт со веќе потврден случај во земјава.

Во однос на коморбидитети, кај 499 (30,0%) лица се присутни хронична/и здравствени состојби, од кои 342 лица имаат кардиоваскуларна болест, 109 дијабет, 90 лица се со хронична белодробна болест, 21 со хронична бубрежна болест и 72 со други хронични болести.

Од хоспитализираните случаи, кај 207 (52,3%) имало присутни коморбидитети.

Регистрирани се 243 (14,6%) случаи на заболување меѓу здравствени работници.

Регистриран е 91 смртен случај (Лт = 5,5%). Од регистрираните смртни случаи, најголем дел се на возраст над 60 години (n=59) каде е регистриран и највисок специфичен морталитет – 15,4/100.000 жители. Регистрирани се 61 смртни случаи кај лица од машки и 30 кај лица од женски пол. Од починатите, кај 67 (73,6%) се регистрирани коморбидитети.

Во однос на дистрибуцијата по пол, регистрирани се 794 машки и 870 женски лица. Специфичниот морбидитет кај машките е 76,6/100.000, додека кај женските 84,2/100.000.

Возраста на заболените се движи од 0 до 94 години (просек – 45,0 години). Најголем број на заболени се на возраст над 60 години – 360 (21,6%) со инциденца од 93,9/100.000, а највисока специфична инциденца од 125,2/100.000 се регистрира на возрасната група од 50-59 години (348 заболени). Најниска инциденца од 27,1 и 28,8 на 100.000 жители се регистрира кај деца на возраст од 0-9 и 10-19 години, каде се пријавени 62 и 72 случаи соодветно

Од 15.02.2020 до 10.05.2020 тестирани се вкупно 19.241 материјали (детектирани 1.664 позитивни лица) во лабораториите во кои се спроведува молекуларно тестирање за присуство на SARS-CoV-2. Со ова во Македонија се направени 9.299 теста на 1.000.000 жители.

Вкупен број на тестови направени за COVID-19 во Р.С. Македонија (n=19.241)

 

Кумулативен број на тестови	Вкупно тестови	Вкупно позитивни
ВКУПНО	19.241	1.664
ИЈЗ – Вирусологија	13.042	1.353
Ветеринарен Факултет (скрининг)	486	33
Авицена (скрининг)	462	31
Биотек (приватни)	1.033	42
Клиника „Жан Митрев“ (приватни)	3.524	157
Аџибадем Систина (приватни)	487	20
МАНУ	207	28

Според исходот од заболувањето, 373 лица (22,4%) се активни случаи, 1.200 случаи (72,1%) се водат како оздравени (217 од нив се здравствени работници), испишани од болница или се со два негативни теста по домашното лекување. Од случаите кои се водат како оздравени, 218 (18,2%) биле хоспитализирани додека останатите 982 (81,8%) биле на домашно лекување.