Стоилковски: Возачот на бентлито е Бурим Маслам Харачина, осуден криминалец, лежел за обид за убиство дивее во Скопје по цена од 45 евра ВИДЕО

Наум Стоилковски, портпарол на ВМРО – ДППМНЕ на вонредна прес конференција објави дека  возачот на бентлито е Бурим Маслам Харачина, за кој тврди дека е осуден криминалец, лежел за обид за убиство и со две активни кривични, а е заштитен од Заев и Спасовски како бела мечка.

– Харачина дивее во Скопје по цена од 45 евра, во неговиот дом е направен и претрес во акцијата на полицијата во Грчец и Арачиново, најдено е оружје, тоа е човекот кој лумпува по скопските улици, а го казнуваат со  само со 45 евра – рече Стоилковски кој објасни дека според законот на Харачина треба да му се поднесе кривична пријава поради загрозување на безбедноста на граѓаните.

Градоначалникот на Град Скопје денеска изјави дека возачот на автомобилот со марка „Бентли“ кој помина низ новогодишниот декор на скопскиот плоштад е казнет со 45 евра, што предизвика бура од реакции на социјалните мрежи.

– Правдата на Зоран Заев е кога осуден криминалец среде плоштад во Скопје полн со луѓе ќе се втурне со Бентли и за тоа Спасовски формално ќе го казни со само 45 евра, а Шилегов ќе се пофали и кога на пример нечепнат ќе помине сторителот на сообраќајката кај Млечен кога еден човек загина, мајка го загуби плодот, а таа останаа со тешки телесни повреди. Казната од 45 евра е грубо исмевање на правдата и шамар во лицето на чесниот народ. Тоа што се случи вчера на плоштадот во Скопје е последица на тоа што правниот систем на Заев и Спасовски нефункционира и го штити криминалот и ги штити криминалците.  Затоа што осудени криминалци не одговараат за сторени кривични дела а тука Заев, Спасовски и Шилегов глумат правда за прекршок од 45 евра. Срамно! – рече Стоилковски.

Тој рече дека случајот има позадина и наведе:

– Возачот на бентлито е  Бурим Маслам познат како Бурим Харачина, познат на полицијата, кој што бил осуден со затворска казна за тешки дела разбојништво и загрозување со предизвикување на општа опасност. Лежел затвор за обид за убиство. И од лани има две кривични пријави за разбојништво и за насилство. Лани и кај него е направен претрес дома при онаа т.н спектакуларна полициска акција во Грчец и Арачиново кога беше пронајдено нелегално оружје и дрога. Кај него било пронајдено најмалку едно парче недозволено оружје. Овој човек поминува неказнето за илегално оружје, обид за убиство и насилство и затоа дивее низ скопските улици -додаде Стоилковски.

Тој денеска приложи и фотографии и видео од Харачина, снимено со неговиот автомобил бентли.

– Еве го Харачина кој е заштитен како бела мечка од Заев и Спасовски  денес слободно лудува среде Скопје по цена од 45 евра! Објавува снимки по социјалните мрежи како вози со над 220 на час, лудува меѓу украсите на Петре од 200.000 евра, загрозува пешаци на плоштадот, а Заев и Оливер Спасовски прават маркетинг дека му наплатиле 45 евра!! Харачина нема ниту еден ден работен ден стаж, ама има за лудување со луксузни возила, да купува нови како Бентлито купено пред неколку дена, може при претрес да му биде одземено оружје како при акцијата лани, за да потоа во шерифски стил да вози по пешачка зона среде Скопје – вели Стоилковски.

Кој му дава сила и храброст на Харачина, неказнето да се однесува како шериф среде Скопје, со толку кривични пријави? Можеби и вчера ќе убиеше некого, ама помина со казна од 45 евра, праша Стоилковски.

– Како е можно луѓе со кривични пријави за тешки дела да лумпуваат среде Скопје и да минуваат со казни од по 45 евра? Вчерашното лумпување е исто предизвикување општа опасност по член 288 од КЗ, особено што е повторување на делото! Па, го штити ли Заев, возачот кој што дивееше со Бетлито, Бурим Харачина? Почитувани, изворот на ова однесување е неказнивоста заради интересите на Заев и на Оливер Спасовски! ЈО има должност да поднесе Кривична пријава за Бурим Харачина за предизвикување општа опасност од член 288 став 3 од КЗ особено затоа што лицето казнето само со 45 евра и до сега има повеќе тешки и притоа слични дела – вели Стоилковски.