СТОИЛКОВСКИ ГО ПРАША СПАСОВСКИ Дали комадантот на „Тигрите“ Даневски дивееше на Водно?

ВМРО-ДПМНЕ денеска ги праша МВР и министерот Оливер Спасовски  дали командантот на полициските „Tигри“, Митко Даневски е лицето коешто пред три дена управувалo со возило во шума на скопско Водно на полноќ, среде забрана, не почитувал полициска контрола, предизвикал потера којашто завршила со тројца повредени полицајци од кои еден заврши на пет часовна операција?

Портпаролот на партијата Наум Стоилковски на денешната прес-конференција рече дека  МВР молчи и прикрива кој го предизвикал инцидентот во кој се повредени тројца полицајци за да не излезе на виделина името на командантот на „Тигрите“.

–  Информација е пуштена, трет ден минува, нема идентитет, ниту иницијали. Целосно несвојствено за МВР, но и остава простор за шпекулации на штета на „Тигрите“.  Заради чинот и позицијата на Даневски, како и заради неговата блискост со Зоран Заев и Спасовски, МВР мора да одговори дали е тој лицето коешто во време на забрана за движење во шума, навечер возел службено возило „шкода“, придружуван од друго лице, не сопрел на полициска контрола, предизвикал потера, бркотница низ Водно, а се завршува со повредени тројца полицајци и целосно оштетени полициски возила? – рече Стоилковски.

Тој потсети дека полициските „Тигри“ е многу сериозна и единица со реноме за да се дозволи МВР да сокрива ваков скандал, злоупотреби, незаконско и недолично однесување и тоа да се врзува со името на командантот на полициските „Тигри“, Митко Даневски.

– Ниту Зоран Заев ниту Оливер Спасовски, ниту фактот за нивната близина со Даневски не смее да бидат над полициското реноме на единицата „Тигри“ – рече Стоилковски.